1 Jawaab minni ana Buulus abd Allah wa rasuul hana Isa al-Masiih, murassal achaan nijiib al-naas al-Allah azalaahum fi derib al-iimaan wa niʼarrifhum al-hagg al-yiwaddiihum le l-takhwa. 2 Wa be sabab al-iimaan da, yarjo be acham al-haya al-abadiiye al-hu waaʼadaahum beeha min gubbaal bidaayit al-dunya. Wa Allah abadan ma yakdib. 3 Wa fi l-wakit al-Allah haddadah, hu nazzal kalaamah fi l-Masiih. Wa Allah munajjiina kallafaani be l-kalaam da wa amaraani achaan niballikhah.
4 Wa naktib leek inta, ya Tiitus, al-bigiit wileedi al-sahiih be l-iimaan al-nichaaruku foogah. Aleekum al-salaam wa l-rahma min Allah abuuna wa Isa al-Masiih munajjiina.
Khidmit Tiitus fi Kiriit
5 Ana khalleetak fi jaziirat Kiriit achaan tiʼaddil kulli cheyy al-lissaaʼ ma indah nizaam adiil. Waajib taʼazil min al-muʼminiin naas fi ayyi hille achaan yabgo leehum chuyuukh misil ana awwal wasseetak beyah. 6 Kulli cheekh waajib yabga naadum ma indah eeb. Khalli yabga raajil martah waahide bas wa iyaalah muʼminiin wa ma fi naadum waahid yuguul fooghum kadar humman faasdiin walla aasiyiin. 7 Masʼuul al-muʼminiin, hu wakiil Allah wa achaan da, waajib yabga naadum ma indah eeb. Ma waajib yabga naadum mustakbir wa la naadum al-yazʼal ajala wa la sakkaari wa la siid al-machaakil wa la naadum al-yiriid riba al-haraam.
8 Laakin waajib yabga naadum kariim le l-diifaan wa yiriid al-kheer wa aagil wa aadil wa saalih wa yisabbit nafsah. 9 Hu waajib yakrub gawi al-kalaam al-sahiih al-allamnaah leyah achaan yichajjiʼ akhwaanah be taʼliim adiil wa yurudd le l-naas al-yikhaalufuuh.
10 Achaan fi naas katiiriin aasiyiin wa khachchaachiin wa yihajju kalaam saakit wa katiiriin minhum Yahuud. 11 Waajib niwaggufuuhum achaan tallafo iimaan hana kulla l-naas fi buyuut waahidiin be taʼliimhum. Gaaʼidiin yiʼallumu kalaam ma adiil achaan yarbaho gurus be kidibhum. 12 Naadum waahid min Kiriit al-bigi leehum misil nabi gaal : «Naas hana Kiriit humman daayman kaddaabiin wa misil haywaanaat khatiiriin. Humman yihibbu al-akil wa ma yiriidu al-khidme.»
13 Wa kalaamah da sahiih. Wa achaan da, ahrijhum be chidde achaan yagoodu saabtiin fi l-iimaan 14 wa ma yasmaʼo battaan al-gisas al-baatliin al-jaayiin min ust al-Yahuud wa la churuut al-naas al-abo al-hagg.
15 Le l-naas al-guluubhum taahiriin, kulli cheyy taahir. Wa laakin le l-naas al-guluubhum ma taahiriin wa le l-ma muʼminiin, ma fi cheyy waahid taahir. Afkaarhum wa guluubhum ma taahiriin marra waahid. 16 Yuguulu yaʼarfu Allah laakin be amalhum yakfuru beyah. Naas misil dool makruuhiin wa aasiyiin wa ma yanfaʼo le ayyi amal hana kheer.
© Arabe tchadien (alphabet latin) Bible © Alliance Biblique du Tchad, 2019.
