Safanya yinaadi al-naas le l-tooba
1 Limmu wa fakkuru,
ya naas al-umma al-ma taʼarfu eebku.
2 Gabul ma tabgo misil al-uttaab
al-chaayle al-riih
wa gabul khadab Allah al-muhrig
ma yalhagku
wa gabul ma yaji al-yoom
al-yanzil foogah khadab Allah,
3 gummu fattuchu Allah,
intu kulluku masaakiin al-ard
al-gaaʼidiin titabbugu gawaaniinah al-hu khattaahum.
Fattuchu al-adaala
wa maskunu nufuusku !
Wa be da, mumkin tanjo
fi yoom khadab Allah.
Allah yiʼaakhib chaʼab al-kharib
4 Madiinat Khazza takhrab
wa hillit Achgaluun tiddammar.
Wa sukkaan Achduud yaturduuhum gaayle
wa madiinat Akhruun tabga ma fiiha.
5 Al-azaab le sukkaan khachum al-bahar
wa le l-umma al-jaaye min jaziirat Kiriit !
Daahu kalaam Allah didduku :
«Ya Kanʼaan, ard al-Filistiyiin,
ana nidammirki
wa tabge faadiye min sukkaanki.
6 Wa khachum al-bahar yabga
kadaade bakaan hana sarha
wa biyaar le l-ruʼyaan
wa zaraayib le l-khanam.
7 Wa l-mantaga di tabga hint
al-naas al-faddalo min Bani Yahuuza.
Humman yasraho foogha
wa be achiiye, yinjammo fi buyuut Achgaluun.
Achaan ana Allah Ilaahhum nugumm fi chaanhum
wa nigabbilhum min balad al-khurba.»
Allah yiʼaakhib chaʼab al-sabaah
8 «Ana simiʼt muʼyaar Muwaab
wa chamaatat Bani Ammuun
al-gaaʼidiin yiʼayyuru beyah chaʼabi
wa yiwassuʼu arduhum fi turaab chaʼabi.
9 Wa fi chaan da,
ana nahlif be usmi al-Hayy,
Muwaab tiddammar misil Saduum
wa Ammuun takhrab misil Amuura.
Yabgo bakaan haskaniit
wa nugra hint mileh
wa kharaab ila l-abad.
Wa l-faddalo min chaʼabi yanhaboohum
wa l-baagyiin min ummati yaglaʼo baladhum.»
Wa da kalaam Allah al-Gaadir Ilaah Bani Israaʼiil.
10 Wa daahu al-yalgooh fi chaan istikbaarhum achaan humman ayyaro chaʼab Allah al-Gaadir wa wassaʼo arduhum fi turaabhum. 11 Allah yikhawwifhum wa yidammir kulla ilaahaat al-ard. Wa kulla l-umam al-baʼiidiin yasjudu giddaamah, ayyi umma fi baladha.
Ikhaab naas al-wati wa l-munchaakh
12 «Wa intu kula, ya l-Habachiyiin,
seefi yaktulku.»
13 Allah yarfaʼ iidah didd balad al-munchaakh
wa yidammir balad Achuur.
Madiinat Niinawa tabga ard kharbaane
wa jafaaf misil al-sahara.
14 Wa fi usutha, yunuumu al-bahaayim
wa ayyi nafar hana haywaanaat.
Amʼakk wa amguggum yunuumu fi ruuse amadha
wa hissuhum yinsamiʼ fi l-chubbaak.
Wa min baab ayyi beet,
al-damaar yinchaaf
wa hatab al-arz al-jammalo beyah buyuuthum daffag.
15 Wa awwal, di madiinat al-farah
al-gaaʼide be amaan.
Wa hi gaalat fi nafisha :
«Ana bas al-jamiile
wa ma fi balaayi.»
Hassaʼ chiifu ! Hi bigat kharaab
wa margad haywaanaat.
Ayyi waahid al-yufuut jambaha
yisaffir wa yihizz raasah min al-ajab.
© Arabe tchadien (alphabet latin) Bible © Alliance Biblique du Tchad, 2019.
