1 Jawaab minni ana Buulus wa akhwaani Siila wa Timuutaawus le jamaaʼat al-muʼminiin al-fi hillit Tasaluuniiki, intu chaʼab Allah abuuna wa Rabbina Isa al-Masiih. Aleekum al-salaam wa l-rahma.
Haal al-muʼminiin wa iimaanhum
2 Aniina nachkuru Allah daayman fi chaanku kulluku wa nasʼalo leeku Allah fi kulla salaawaatna. 3 Wa ayyi wakit al-nasʼalo leeku abuuna Allah, nifakkuru fi l-amal al-sawweetuuh be l-iimaan wa l-khidme al-sawweetuuha be l-mahabba wa achamku al-gawi fi Rabbina Isa al-Masiih.
4 Ya akhwaani al-Allah yihibbuku, naʼarfu Allah azalaaku 5 achaan al-bichaara al-ballakhnaaha leeku ma jaat leeku be kalaam bas laakin be gudra wa be khidmit al-Ruuh al-Khudduus wa be acham muʼakkad. Wa intu chiftu haalna maʼaaku wa khidmitna fi chaanku. 6 Wa intu chiltu masalna wa haalku bigat misil haalna wa misil haal hana Rabbina Isa. Wakit al-naas gaaʼidiin yitaʼʼubuuku bilheen kula, intu khibiltu al-kalaam be farah al-jaayi min al-Ruuh al-Khudduus. 7 Wa be da, intu bigiitu masal adiil le kulla l-muʼminiin al-fi buldaan Magiduuniya wa Akhaaya.
8 Minku intu, bichaarat al-Rabb chattat wa machat baʼiid. Ma machat fi Magiduuniya wa Akhaaya bas wa laakin lihgat ayyi bakaan, lahaddi ma nagdaro nuguulu cheyy fiiku kula achaan iimaanku be Allah maʼruuf. 9 Fi ayyi bakaan al-naas gaaʼidiin yihajju beeku wa yuguulu kadar intu karabtuuna adiil wa tubtu le Allah. Wa yuguulu intu khalleetu minku al-asnaam achaan taʼabudu Allah al-Waahid al-Hayy 10 wa tarjo Ibnah al-yigabbil min al-samaawaat wa hu Isa al-Allah baʼasah min ust al-maytiin wa yafzaʼna min al-khadab al-jaayi.
© Arabe tchadien (alphabet latin) Bible © Alliance Biblique du Tchad, 2019.
