Dawuud jaab sanduug al-muʼaahada
1 Wa Dawuud chaawar maʼa khuyyaad al-aalaaf wa maʼa khuyyaad al-miyaat wa maʼa kulla l-chuyuukh. 2 Wa baʼad da, hu gaal le kulla jamaaʼat Bani Israaʼiil : «Kan tikhassudu wa kan Allah Ilaahna yarda beyah, khalli nirassulu le akhwaanna al-gaaʼidiin fi kulla balad Israaʼiil wa le rujaal al-diin wa l-Laawiyiin al-fi mudunhum wa l-fi hillaalhum al-saakniin foogah achaan yaju yilimmu maʼaana. 3 Wa khalaas nigabbulu sanduug al-Rabb wa nijiibuuh fi bakaanna achaan aniina ma jaʼalnaah fi wakit Chaawuul.» 4 Wa kulla l-chaʼab khassado achaan al-cheyy da ajabaahum.
5 Wa Dawuud lamma kulla Bani Israaʼiil min waadi Masir fi l-junuub lahaddi Labu Hamaat fi l-munchaakh le yijiibu sanduug al-Rabb min hillit Kharyat Yaʼariim. 6 Wa Dawuud wa kulla Bani Israaʼiil macho le Baʼla yaʼni Kharyat Yaʼariim hille waahide fi balad Yahuuza achaan yijiibu min hinaak sanduug al-Rabb. Wa da l-sanduug al-foogah usum Allah, hu al-archah gaaʼid been al-makhluugiin al-samaawiyiin al-masnuuʼiin fi sidaadit al-sanduug. 7 Wa humman chaalo sanduug al-Rabb min beet Abinadaab wa khattooh fi kaarro jadiid. Wa awlaad Abinadaab, Uzza wa Akhyu gaadooh wa macho beyah. 8 Wa Dawuud wa kulla Bani Israaʼiil gaaʼidiin yalʼabo giddaam sanduug al-Rabb be kulla gudrithum wa yikhannu fi hiss aalaat al-musiikha misil jigindiiye wa amsibeybe wa tambal wa nuggaara wa burunji.
9 Wa wakit wassalo fi l-madagg hana Kiiduun, al-bagar attartaʼo wa Uzza madda iidah le yakrub al-sanduug. 10 Wa tawwaali Allah khidib khadab chadiid didd Uzza wa tawwaali darabah achaan hu madda iidah wa karab al-sanduug. Wa Uzza wagaʼ maat hinaak giddaam al-Rabb. 11 Wa Dawuud ziʼil zaʼal chadiid achaan Allah khidib didd Uzza wa darabah. Wa samma al-bakaan da Faaris Uzza (maʼanaatah darab Uzza) wa l-usum da gaaʼid lahaddi l-yoom.
12 Wa fi l-yoom da, Dawuud khaaf khoof chadiid min al-Rabb wa gaal : «Ana ma nagdar nijiib sanduug al-Rabb fi beeti.» 13 Wa fi chaan da, Dawuud ma wadda al-sanduug fi beetah fi madiinat Dawuud. Wa laakin waddaah fi beet Ubeed Adoom al-min hillit Gaat. 14 Wa sanduug al-Rabb gaʼad talaata chahar fi beet Ubeed Adoom. Wa Allah baarak beet Ubeed Adoom wa kulla cheyy al-indah.
© Arabe tchadien (alphabet latin) Bible © Alliance Biblique du Tchad, 2019.
