Dawuud bana beetah wa akhad awiin
1 Wa Hiiraam malik balad Suur rassal naas le Dawuud wa waddo leyah hatab al-arz. Wa rassal bannaayiin wa najjaariin al-hatab le yabnu beet le l-malik Dawuud. 2 Wa be da, Dawuud irif kadar Allah sabbatah malik fi Bani Israaʼiil. Wa Allah rafaʼ darajat mulkah fi chaan chaʼabah Bani Israaʼiil.
3 Wa Dawuud akhad awiin aakharaat fi Uruchaliim wa hinna wildan leyah awlaad wa banaat. 4 Wa daahu asaame hana iyaal Dawuud al-wildoohum leyah fi Uruchaliim. Humman Chammuuʼ wa Chuubaab wa Naataan wa Suleymaan 5 wa Yibhaar wa Alichuuʼ wa Alfalat 6 wa Nuga wa Nafag wa Yafiiʼa 7 wa Alichamaʼ wa Baʼliyaadaʼ wa Alifaalat.
Dawuud annasar fi l-Filistiyiin
8 Wa wakit al-Filistiyiin simʼo kadar Dawuud masahooh wa darrajooh malik fi kulla Bani Israaʼiil, kulluhum gammo macho le yifattuchuuh. Wa laakin Dawuud simiʼ beehum wa macha le yiwajjihhum. 9 Wa l-Filistiyiin macho wa hajamo sukkaan fi waadi Rafaayiin.
10 Wa Dawuud saʼal al-Rabb wa gaal : «Namchi nihaarib al-Filistiyiin walla ? Inta tisallimhum fi iidi walla ?» Wa Allah radda le Dawuud wa gaal : «Amchi haaribhum wa ana nisallimhum fi iidak.»
11 Wa l-Filistiyiin macho hillit Baʼal Faraasiim wa Dawuud haarabaahum hinaak wa annasar fooghum. Wa gaal : «Be iidi ana, al-Rabb fatah al-derib wa darabt udwaani misil al-seel.» Wa be sabab da bas, al-bakaan da sammooh Baʼal Faraasiim (maʼanaatah al-Rabb al-darab). 12 Wa l-Filistiyiin khallo asnaamhum fi l-bakaan da wa Dawuud anta amur achaan yutuchchuuhum.
13 Wa battaan al-Filistiyiin macho wa hajamo sukkaan waadi Rafaayiin. 14 Wa battaan Dawuud saʼal al-Rabb. Wa l-Rabb gaal leyah : «Ma tamchi tahjimhum tawwaali laakin hawwig leehum be wara min jiihat al-chadar wa garrib leehum. 15 Wa wakit inta simiʼt haraka misil khatwaat al-rijil fi raas al-chadar, tawwaali amrug wa ahjimhum. Achaan al-Rabb macha giddaamak le yadrub askar al-Filistiyiin.»
16 Wa Dawuud sawwa kulla cheyy al-amarah beyah al-Rabb. Wa khalaas, humman haarabo askar al-Filistiyiin wa taradoohum min hillit Gibʼuun lahaddi hillit Gaazar. 17 Wa min al-yoom da, Dawuud usmah bigi taaliʼ fi kulla l-buldaan. Wa Allah sawwa kulla l-umam yakhaafo min Dawuud.
© Arabe tchadien (alphabet latin) Bible © Alliance Biblique du Tchad, 2019.
