Dawuud dawwar yabni beet le Allah
1 Wa wakit Dawuud saakin fi beetah, yoom waahid gaal le l-nabi Naataan : «Chiif, ana saakin fi beet jamiil hana hatab al-arz. Wa laakin sanduug muʼaahadat Allah gaaʼid fi kheema bas.» 2 Wa Naataan radda le Dawuud wa gaal : «Sawwi kulla cheyy al-fi galbak achaan al-Rabb maʼaak.»
3 Wa laakin fi l-leele di, al-Rabb kallam le Naataan wa gaal : 4 «Amchi guul le abdi Dawuud : ‹Daahu Allah gaal : “Da ma inta al-tabni leyi beet al-ana naskun foogah. 5 Achaan ana abadan ma sakant fi beet min yoom al-ana maragt Bani Israaʼiil min Masir lahaddi l-yoom. Wa laakin ana sirt maʼaahum wa sakant fi kheema. 6 Wa fi ayyi bakaan, ana sirt maʼa kulla Bani Israaʼiil. Wa ana abadan ma kallamt le waahid min hukkaam Bani Israaʼiil al-ana amartuhum le yahkumu foog chaʼabi walla saʼaltah maala ma banaah leyi beet hana hatab al-arz” ?›
7 «Wa hassaʼ da, amchi guul le abdi Dawuud : ‹Daahu Allah al-Gaadir gaal : “Ana jibtak min sarhit al-khanam achaan tabga kabiir hana chaʼabi Bani Israaʼiil. 8 Wa ana kunt maʼaak fi ayyi bakaan al-inta macheet foogah wa gachcheet kulla udwaanak min giddaamak. Wa ana nisawwi usmak aali misil asaame hana l-naas al-kubaar al-fi l-ard. 9 Wa ana nanti bakaan le chaʼabi Bani Israaʼiil wa nimakkinhum. Wa humman yaskunu fi l-bakaan da bala khoof. Wa naas fasliin ma yazulmuuhum battaan misil awwal. 10 Wa min wakit al-ana kallaft hukkaam fi chaʼabi Bani Israaʼiil, ana najjeetak min kulla udwaanak. Wa nikhabbirak kadar ana Allah nisabbit beet aayiltak. 11 Wa wakit ayyaamak yikammulu, tumuut wa talhag abbahaatak. Wa ana naʼazil waahid min zurriiytak wa hu yabga waahid min awlaadak wa ana nisabbit mulkah. 12 Wa hu bas al-yabni leyi beet wa ana nisabbit mulkah ila l-abad. 13 Wa ana nabga leyah abu wa hu yabga leyi ibn. Wa ma nichiil minnah rahmati misil chiltaha min Chaawuul al-hakam gablak. 14 Wa ana nisabbitah fi beeti wa fi mamlakati ila l-abad wa mulkah kula yasbit ila l-abad.”›»
15 Wa Naataan hajja le Dawuud be kulla l-kalaam al-gaalah leyah Allah fi l-ruʼya di.
Salaat Dawuud
16 Wa l-malik Dawuud dakhal fi l-kheema fi hadarat Allah wa gaal : «Ana yaatu, ya Allah Ilaahi ? Wa aayilti tisaawi chunu lahaddi tantiini daraja misil di ? 17 Wa da cheyy hayyiin saakit leek inta, ya Ilaahi, wa inta aahadt aayilat beeti ana abdak fi l-mustakhbal. Wa sawweetni naadum muhimm, ya Allah Ilaahi. 18 Wa inta taʼarifni tamaam ana abdak. Wa nagdar nuguul chunu battaan fi l-daraja al-anteetni ? 19 Ya Allah ! Be sababi ana abdak wa hasab niiytak, inta sawweet leyi al-achya al-kubaar dool le tiʼarrif kulla azamatak. 20 Ya Allah ! Inta ma indak chabiih wa abadan ma fi ilaah illa inta. Wa da hasab kulla l-kalaam al-simiʼnaah. 21 Fiyah umma fi kulla l-ard misil chaʼabak Bani Israaʼiil walla ? Ya Rabb, inta fadeethum wa sawweethum chaʼabak achaan usmak yabga aali. Wa inta sawweet ajaayib kubaar al-bikhawwufu. Wa taradt al-umam al-aakhariin giddaam chaʼabak al-inta fadeethum min balad Masir. 22 Wa sawweet chaʼabak Bani Israaʼiil le yabgo chaʼabak daayman. Ya Allah, inta bigiit leehum Ilaahhum.
23 «Wa hassaʼ da, ya Allah, al-kalaam al-gultah foogi ana abdak wa foog aayilti da, khalli yilhaggag ila l-abad. Wa tammim kulla cheyy al-gultah. 24 Wa khalli kalaamak yilhaggag wa be da, yimajjudu usmak ila l-abad wa yuguulu : ‹Allah al-Gaadir, hu bas Ilaah Bani Israaʼiil !› Wa khalli beeti ana abdak Dawuud yagood saabit giddaamak. 25 Achaan inta zaatak, ya Ilaahi, khabbartini ana abdak wa gult leyi : ‹Nisabbit beet aayiltak fi l-muluk.› Wa fi chaan da, ana abdak ligiit al-chajaaʼa wa gaddamt leek al-sala di.
26 «Wa hassaʼ da, ya Allah, inta bas al-Rabb wa aahadtini ana abdak be kulla l-kheer da. 27 Wa khalaas hassaʼ da, inta chilt niiye tibaarik aayilti ana abdak le yamulku giddaamak ila l-abad. Ya Allah, al-naadum inta bas baaraktah, hu yalga baraka ila l-abad.»
© Arabe tchadien (alphabet latin) Bible © Alliance Biblique du Tchad, 2019.
