1 Wa baʼad da, Dawuud gaal : «Al-bakaan da yabga beet Allah al-Rabb. Wa l-madbah al-Bani Israaʼiil yigaddumu foogah dahaaya muharragiin.»
Dawuud jahhaz buna beet Allah
2 Wa Dawuud amar yilimmu kulla l-ajaanib al-gaaʼidiin fi balad Israaʼiil. Wa hu kallafaahum yanguchu hujaar le yabnu beehum beet Allah. 3 Wa Dawuud jahhaz hadiid katiir al-yisawwu beyah masaamiir al-biibaan wa hadiid al-yirakkubu beyah al-biibaan. Wa lamma nahaas katiir al-ma yinwazin. 4 Wa lamma hatab al-arz kula katiir ma yinhasib achaan naas min balad Seeda wa Suur jaabo hatab al-arz le Dawuud be katara.
5 Wa Dawuud gaal : «Wileedi Suleymaan lissaaʼ sabi wa ma indah irfe. Wa laakin al-beet al-nabnuuh le Allah waajib yihajju be kubrah wa jamaalah fi kulla l-ard. Wa fi chaan da, ana zaati nijahhiz le buna al-beet da.» Wa be misil da, Dawuud jahhaz khumaam katiir gabul ma yumuut.
Dawuud kallaf wileedah yabni al-beet
6 Wa Dawuud naadaah le wileedah Suleymaan wa amarah yabni beet le Allah Ilaah Bani Israaʼiil. 7 Wa Dawuud gaal le Suleymaan : «Ya wileedi ! Zamaan ana zaati indi niiye nabni beet le Allah Ilaahi. 8 Wa laakin Allah hajja leyi wa gaal : ‹Inta daffagt damm katiir wakit al-huruub al-katiir. Inta ma tabni leyi beet achaan inta daffagt damm katiir fi l-ard giddaami. 9 Wa laakin tijiib wileed wa hu yabga siid al-raaha wa ana nanti leyah raaha min kulla udwaanah al-mujaawiriinah. Wa l-wileed da, yinaadu Suleymaan (maʼanaatah al-salaam). Achaan nijiib al-salaam wa l-amaan fi balad Israaʼiil fi kulla muddit hayaatah. 10 Wa hu bas al-yabni leyi beet. Wa ana nabga leyah abu wa hu yabga leyi ibn. Wa ana nisabbit mulkah fi Israaʼiil ila l-abad.›»
11 Wa Dawuud gaal battaan : «Hassaʼ da, ya wileedi, khalli Allah yukuun maʼaak. Wa be da, tanjah wa tagdar tabni beet Allah Ilaahak hasab al-kalaam al-hu gaalah foogak. 12 Wa khalli Allah yantiik agul wa fihim wakit yidarrijak malik fi Israaʼiil. Wa be da, tagdar tahfad wasaaya Allah Ilaahak. 13 Aywa, inta tanjah kan tahfad al-gawaaniin wa l-churuut al-Allah amar beehum Muusa le Bani Israaʼiil. Abga chadiid wa fahal, ma takhaaf wa la tinbahit. 14 Chiif be taʼab ana jahhazt le buna beet Allah ziyaada min 3 malyuun kiilo hana dahab wa ziyaada min 30 malyuun kiilo hana fudda. Wa lammeet nahaas wa hadiid katiir ma yinwazin. Wa ana jahhazt al-khachab wa l-hajar wa inta tiziid foogah battaan. 15 Wa inta talga khaddaamiin katiiriin wa naggaachiin al-hajar wa najjaariin al-hatab. Wa talga battaan naas al-induhum khibra fi ayyi khidme. 16 Wa hassaʼ indak al-dahab wa l-fudda wa l-nahaas wa l-hadiid bala adad. Gumm wa akhdim ! Allah maʼaak.»
17 Wa Dawuud amar kulla masaaʼiil Bani Israaʼiil yisaaʼudu wileedah Suleymaan. 18 Wa gaal le l-masaaʼiil : «Allah Ilaahku ma yukuun maʼaaku walla ? Wa ma antaaku al-raaha min kulli jiihe ? Achaan Allah sallam leyi kulla sukkaan al-balad di fi iideeni. Wa hassaʼ hi gaaʼide tihit Allah wa chaʼabah. 19 Hassaʼ da, gummu be kulla guluubku wa gudritku le titaabuʼu Allah Ilaahku. Gummu wa abnu beet mukhaddas le Allah Ilaahku le tijiibu sanduug muʼaahadat Allah wa l-muʼiddaat al-mukhassasiin le Allah fi l-beet al-tabnuuh leyah.»
© Arabe tchadien (alphabet latin) Bible © Alliance Biblique du Tchad, 2019.
