Bichaarat Buulus
1 Ya akhwaani, wakit ana macheet leeku, ballakht leeku sirr Allah al-awwal al-naas ma irfooh. Laakin ma ballakhtah be kalaam saʼab ziyaada wa ma hajjeet leeku misil aalim kabiir. 2 Wa chilt niiye achaan nikallim leeku misil ma naʼarif cheyy illa Isa al-Masiih wa mootah fi l-saliib. 3 Wa ana faagid al-gudra wakit ana gaaʼid maʼaaku wa khaayif bilheen. 4 Wa kallamt leeku be taʼliim hayyin wa ma jibtuku fi l-derib be kalaam al-yiraddiiku wa la be hikmat insaani wa laakin kallamt leeku be kalaam al-indah gudra al-jaayi min al-Ruuh al-Khudduus. 5 Wa misil da, iimaanku ma yilʼassas fi hikmat insaan laakin fi gudrat Allah.
6 Wa laakin kan aniina gaaʼidiin maʼa muʼminiin kubaar fi l-iimaan, nikallumu leehum be hikma adiile. Wa l-hikma di ma tichaabih hikmat naas al-dunya wa la hikmat kubaaraat naas al-dunya al-laabudda yabgo ma fiihum. 7 Wa niʼarrufu al-naas be hikmat Allah al-hi sirr mulabbad al-ma irfooh. Wa gubbaal bidaayit al-dunya, Allah kharrar be l-hikma di yiwaddiina fi majdah. 8 Wa ma fi naadum min kubaaraat al-dunya di fihim hikmat Allah. Kan awwal fihmooha, ma yaktulu Rabbina al-majiid fi l-saliib. 9 Wa khalaas, da muwaafig maʼa l-kalaam al-maktuub fi l-Kitaab : <Al-cheyy al-Allah jahhazah le l-naas al-yihibbuuh, ma chaafatah een wa la simʼatah adaan wa la fakkar foogah insaan.>
10 Laakin al-cheyy da, Allah wassafah leena be l-Ruuh al-Khudduus. Achaan al-Ruuh al-Khudduus yichiif kulla cheyy wa yaʼarif fikir Allah wa asraarah. 11 Akiid, al-naas ma yaʼarfu afkaar naadum illa l-naadum zaatah yaʼarif afkaarah. Wa misil da, ma fi naadum yaʼarif afkaar Allah, illa Ruuh Allah yaʼarif afkaar Allah. 12 Wa Allah antaana al-Ruuh al-Khudduus wa l-Ruuh al-Khudduus da ma jaayi min al-dunya. Hu Ruuh Allah al-naazil leena achaan naʼarfu al-rahma al-Allah antaaha leena.
13 Wa aniina nikallumu be l-barakaat dool le l-naas. Wa ma nihajju beehum be l-kalaam al-allamnaah min al-hikma al-insaaniiye. La. Nihajju be l-kalaam al-allamah leena al-Ruuh al-Khudduus. Wa nifassuru taʼliim al-Ruuh al-Khudduus le l-naas al-induhum al-Ruuh al-Khudduus. 14 Wa l-insaani al-tabiiʼi ma yakhbal kalaam hana Ruuh Allah. Fi fikrah, kalaam al-Ruuh al-Khudduus baatil wa hu ma yafhamah. Achaan naadum ma yafhamah illa be gudrat al-Ruuh al-Khudduus. 15 Wa l-naadum al-indah al-Ruuh al-Khudduus, hu yihaasib kulla cheyy laakin ma fi naadum al-indah hagg yihaasibah. 16 Achaan maktuub fi l-Kitaab : <Yaatu irif afkaar Allah wa bigi leyah siid choortah ?> Wa laakin aniina fikirna wa fikir al-Masiih, waahid.
© Arabe tchadien (alphabet latin) Bible © Alliance Biblique du Tchad, 2019.
