Al-akil wa l-asnaam
1 Wa ana nurudd leeku fi l-cheyy al-bukhuss al-laham al-gaddamooh dahiiye le l-asnaam. Al-kalaam al-intu gultuuh : «Aniina al-muʼminiin kullina indina ilim», da maʼruuf. Laakin nuguul leeku al-ilim yisabbib al-istikbaar wa l-mahabba tigawwi al-khuuwa. 2 Kan naadum aarif hu aarif, hu lissaaʼ ma irif misil waajib yaʼarif. 3 Laakin kan naadum yihibb Allah, al-naadum da Allah yaʼarfah.
4 Wa fi l-cheyy al-bukhuss akil al-laham al-gaddamooh dahiiye le l-asnaam, akiid aniina naʼarfu kadar al-sanam, hu yimassil ilaah al-ma mawjuud fi l-dunya. Wa naʼarfu kadar ma fi ilaah illa Allah al-Waahid. 5 Wa akiid, al-naas yuguulu fi ilaahaat fi l-samaawaat wa l-ard. Wa be l-sahiih, al-naas yuguulu fi ilaahaat wa arbaab katiiriin. 6 Wa laakin leena aniina al-muʼminiin, Allah waahid bas. Wa hu abuuna al-khalag kulla cheyy wa aniina nahyo leyah hu. Wa l-Rabb waahid bas wa hu Isa al-Masiih wa beyah hu kulla cheyy mawjuud wa beyah hu aniina hayyiin.
7 Laakin naas waahidiin ma karabo al-ilim da adiil. Wa akhwaan waahidiin fi aadithum gubbaal ma aamano, gaaʼidiin yaʼabudu al-asnaam. Wa fi fikirhum kan yaakulu al-laham da, yichaaruku battaan fi l-ibaada di. Wa kan akalo, yinnajjaso achaan iimaanhum lissaaʼ ma gawi. 8 Wa sahiih, al-akil ma yiziid leena rida Allah. Kan ma naakuluuh, ma nakhsaro cheyy giddaam Allah. Wa kan naakuluuh kamaan, ma nalgo minnah faayde giddaam Allah.
9 Laakin angarʼu ! Le l-muʼmin al-iimaanah ma gawi, ma tikhallu hurriiyitku di tamurgah min al-derib. 10 Achaan inta tuguul inta naadum aalim wa kan naadum iimaanah ma gawi yichiifak inta gaaʼid taakul fi beet al-asnaam, akuun hu kula yaakul al-laham al-gaddamooh dahiiye le l-asnaam. Wa khalaas al-eeb yakurbah. 11 Wa misil da, inta taabaʼt ilmak wa laakin tallaft beyah akhuuk al-Rabbina al-Masiih maat fi chaanah. 12 Wa be misil da, intu takhto fi akhwaanku wa tijiibu al-eeb fi l-akhwaan al-iimaanhum ma gawi wa khalaas khitiitu fi l-Masiih. 13 Achaan da, kan al-laham al-naakulah yamrug akhuuyi min al-derib, ana abadan ma naakul al-laham battaan. Achaan ma nidoor akhuuyi yamrug min al-derib be sababi ana.
© Arabe tchadien (alphabet latin) Bible © Alliance Biblique du Tchad, 2019.
