Chaawuul fazaʼ sukkaan Yaabiich
1 Wa baʼad da, Nahaach malik Bani Ammuun macha fi hillit Yaabiich fi turaab Gilʼaad wa haasarha. Wa kulla sukkaan Yaabiich Gilʼaad gaalo leyah : «Sawwi maʼaana muʼaahada wa nagoodu tihtak.» 2 Wa Nahaach gaal leehum : «Tamaam ! Kan nisawwi maʼaaku muʼaahada da, illa nisill kulla uyuunku al-zeenaayaat. Wa be da, nijiib al-ihaana fi kulla Bani Israaʼiil.» 3 Wa chuyuukh Yaabiich gaalo : «Arjaana sabʼa ayyaam. Nirassulu fi kulla balad Bani Israaʼiil wa kan ma ligiina naadum yafzaʼna, khalaas namurgu wa nagoodu tihtak.»
4 Wa wakit al-murassaliin wassalo fi hillit Chaawuul al-usumha Gibeeʼa, hajjo be l-kalaam da le kulla l-chaʼab wa l-chaʼab gammo yabku be hiss aali. 5 Wa fi l-wakit da, Chaawuul jaayi min al-zereʼ wara bagarah wa gaal : «Chunu al-bigi le l-chaʼab wa gaaʼidiin yabku ?» Wa humman oorooh be l-khabar hana naas Yaabiich. 6 Wa wakit Chaawuul simiʼ al-kalaam da, tawwaali Ruuh Allah nazal foogah wa hu ziʼil zaʼal chadiid. 7 Wa chaal bagar itneen dabahaahum wa gattaʼaahum wa rassal lahamhum fi kulla balad Israaʼiil. Wa gaal : «Guulu le Bani Israaʼiil : ‹Ayyi naadum al-ma marag le l-harib wara Chaawuul wa Samuwiil, bagarah nigattiʼhum misil da !›» Wa khalaas, khoof chadiid min Allah dakhal fi guluubhum wa marago kulluhum misil raajil waahid. 8 Wa fi hillit Baazakh, Chaawuul hasab askarah. Wa adad rujaal Bani Israaʼiil 300 000 wa rujaal gabiilat Yahuuza 30 000.
9 Wa l-naas al-lammo gaalo le l-murassaliin al-jo min hillit Yaabiich Gilʼaad : «Guulu le naasku ambaakir gaayle yalgo al-fazaʼ.» Wa l-murassaliin macho wa khabbaro naas hillit Yaabiich wa humman firho bilheen be l-khabar da. 10 Wa gaalo le Bani Ammuun : «Ambaakir aniina nisallumu nufuusna leeku wa tisawwu foogna kulla cheyy al-tidooruuh.»
Chaawuul annasar fi Bani Ammuun
11 Wa ambaakir be fajur badri, Chaawuul gassam askarah ale talaata bakaan wa hajamo muʼaskar Bani Ammuun wa kataloohum lahaddi al-harraay bigat gaayle. Wa l-askar al-faddalo chattato marra waahid, itneen maachiin sawa kula ma fiih !
12 Wa kulla l-naas gaalo le Samuwiil : «Yaatumman al-gaalo : ‹Chaawuul ma yamluk foogna ?› Jiibuuhum hini naktuluuhum !» 13 Wa laakin Chaawuul gaal : «Fi l-yoom da, ma yaktulu naadum waahid kula ! Achaan Allah najja Bani Israaʼiil fi l-yoom da.»
14 Wa Samuwiil gaal le Bani Israaʼiil : «Taʼaalu namchu hillit Gilgaal le nijaddudu sabbitiin al-malik.» 15 Wa khalaas, kulla Bani Israaʼiil macho le hillit Gilgaal wa sabbato al-malik Chaawuul giddaam Allah. Wa gaddamo dahaaya salaama le Allah. Wa baʼad da, Chaawuul wa kulla Bani Israaʼiil firho farha chadiide.
© Arabe tchadien (alphabet latin) Bible © Alliance Biblique du Tchad, 2019.
