Al-harib maʼa l-Filistiyiin
1 Wa Chaawuul indah 30 sana wakit bigi malik fi Bani Israaʼiil wa hu hakam 42 sana lahaddi maat.
2 Wa yoom waahid, Chaawuul azal 3 000 raajil min Bani Israaʼiil. Wa 2 000 khattaahum maʼaayah fi Mikmaach wa fi jabal Beet Iil. Wa 1 000 kamaan khattaahum maʼa Yuunataan wileedah fi hillit Gibeeʼa Banyaamiin. Wa l-faddalo min al-rujaal, Chaawuul gaal khalli ayyi waahid yigabbil beetah.
3 Wa yoom waahid, Yuunataan katal khaayid al-Filistiyiin al-gaaʼid fi Gabaʼ. Wa l-Filistiyiin kula simʼo be l-khabar da. Wa Chaawuul amar le yadurbu al-buug fi kulla l-balad wa gaal : «Khalli kulla l-Ibraaniyiin yasmaʼo al-khabar da !» 4 Wa kulla Bani Israaʼiil simʼo kadar Chaawuul katal khaayid al-Filistiyiin wa humman irfo kadar al-Filistiyiin gaaʼidiin yakrahoohum. Wa khalaas, kulla rujaal Bani Israaʼiil wagafo misil raajil waahid wara Chaawuul fi hillit Gilgaal. 5 Wa l-Filistiyiin kula lammo le yihaarubu Bani Israaʼiil wa humman induhum 30 000 arabaat al-harib wa 6 000 siyaad al-kheel wa rujaal katiiriin misil ramla hana khachum al-bahar. Wa jo wa dallo fi hillit Mikmaach sabaah le hillit Beet Awan. 6 Wa wakit rujaal Bani Israaʼiil chaafo kadar aduuhum ja leehum gariib, humman barjalo wa jaro allabbado fi l-karaakiir wa l-nugaar wa l-hujaar wa l-khaaba wa l-biyaar. 7 Wa waahidiin min al-Ibraaniyiin gataʼo bahar al-Urdun wa wassalo balad Gaad wa Gilʼaad. Wa laakin Chaawuul kamaan gaʼad fi Gilgaal. Wa kulla l-rujaal al-maʼaayah gaaʼidiin yarjufu min al-khoof.
8 Wa Chaawuul gaʼad sabʼa yoom hasab al-waʼad al-antaah leyah Samuwiil. Wa laakin Samuwiil ma ja leyah fi Gilgaal. Wa l-rujaal bado yichattutu minnah. 9 Wa khalaas, Chaawuul gaal : «Jiibu leyi bahaayim le l-dahiiye al-muharraga wa dahaaya al-salaama.» Wa hu gaddam al-dahiiye al-muharraga.
10 Wa wakit Chaawuul kammal min gaddimiin al-dahiiye al-muharraga, tawwaali chaaf Samuwiil wassal. Wa hu marag laagaah. 11 Wa Samuwiil gaal leyah : «Chunu al-sawweetah da ?» Wa Chaawuul gaal : «Wakit ana chift al-rujaal gaaʼidiin yichattutu minni wa inta zaatak ma jiit fi l-waʼad wa l-Filistiyiin lammo fi Mikmaach, 12 ana gult akuun al-Filistiyiin yahjumuuni fi Gilgaal gubbaal ma nachhad Allah. Wa khalaas, ana anjabart wa gaddamt al-dahiiye al-muharraga.»
13 Wa Samuwiil gaal le Chaawuul : «Inta sawweet cheyy bala fikir wa ma taabaʼt wasiiyat Allah Ilaahak al-hu amarak beeha. Wa kan awwal inta taabaʼt wasiiyat Allah, hu yisabbit mulkak daayman fi Bani Israaʼiil. 14 Wa hassaʼ da, mulkak ma yitawwil. Achaan Allah azal naadum aakhar al-hu radyaan beyah wa darrajah le yahkim chaʼabah. Wa laakin inta ma taabaʼt wasiiyat Allah al-amarak beeha.» 15 Wa baʼad da, Samuwiil gamma min Gilgaal wa macha le Gibeeʼa fi ard Banyaamiin. Wa Chaawuul hasab al-rujaal al-maʼaayah wa adadhum bigi hawaale 600 raajil.
16 Wa Chaawuul wa wileedah Yuunataan wa l-rujaal al-maʼaahum gaʼado fi Gabaʼ ard Banyaamiin. Wa l-Filistiyiin kamaan khatto muʼaskarhum fi Mikmaach. 17 Wa l-mukharribiin min al-Filistiyiin marago min muʼaskarhum wa angasamo ale talaata majmuuʼaat. Al-majmuuʼa al-awwalaaniiye chaalat derib Ufra ale balad Chuuʼal. 18 Wa l-majmuuʼa al-taaniye machat ale derib Beet Huruun. Wa l-majmuuʼa al-taalta kamaan chaalat derib al-maachi le l-huduud ale waadi al-Maraafʼiin fi l-sahara.
19 Wa fi l-wakit daak, ma fi haddaadi fi kulla balad Israaʼiil achaan al-Filistiyiin khaafo wa gaalo : «Akuun al-Ibraaniyiin yasnaʼo suyuuf walla huraab.» 20 Wa ayyi naadum min Bani Israaʼiil waajib yamchi le haddaad al-Filistiyiin hatta yitarrugu leyah jarraaytah aw haffaarah aw faasah aw kadankitah. 21 Wa tarrigiin al-jarraay aw al-kadanka tamanah itneen tilit hana hajar fudda. Wa tarrigiin al-faas aw addiliin raas al-kookaab tamanah tilit hana hajar fudda. 22 Wa achaan da fi yoom al-harib, ma fi seef walla harba fi iideen kulla l-rujaal al-gaaʼidiin maʼa Chaawuul wa Yuunataan. Illa Chaawuul wa wileedah Yuunataan bas musallahiin.
23 Wa l-Filistiyiin marago min al-muʼaskar wa gaʼado fi derib Mikmaach.
© Arabe tchadien (alphabet latin) Bible © Alliance Biblique du Tchad, 2019.
