Dawuud yiʼarrid le hillit Nuub
1 Wa Dawuud macha fi hillit Nuub al-bakaan al-gaaʼid foogah Akhiimalik raajil al-diin. Wa wakit Akhiimalik chaaf Dawuud, gaaʼid yarjif. Wa gamma laagaah wa gaal : «Maala naadum maʼaak ma fiih ?» 2 Wa Dawuud gaal le Akhiimalik raajil al-diin : «Al-malik amaraani wa gaal leyi ma nuguul cheyy le naadum be l-muhimma al-rassalaani foogha. Achaan da bas, ana waaʼadt naasi yarjooni fi bakaan maʼruuf. 3 Wa hassaʼ da, indak chunu ? Antiini khamsa khubza walla kan cheyy aakhar kula.» 4 Wa Akhiimalik gaal le Dawuud : «Ana ma indi khubza aadiiye illa l-khubza al-mukhaddasa. Wa nantiiha leek illa kan naasak ma limso awiin.»
5 Wa Dawuud gaal le Akhiimalik raajil al-diin : «Aywa, akiid al-awiin mamnuuʼaat leena min amis wa min awwal kula. Wa da misil fi aadti wakit namrug le l-harib. Hatta fi l-muhimma al-aadiiye kula, naasi jisimhum taahir. Maala jisimhum ma yukuun taahir fi muhimma mukhaddasa misil di ?» 6 Wa khalaas, raajil al-diin anta al-khubza al-mukhaddasa le Dawuud. Achaan ma fi khubza aakhara illa l-khubza al-gaddamooha le Allah. Wa l-khubza di, hi al-khayyarooha be khubza jadiide wa haamiye.
7 Wa fi l-yoom da, fiyah khaddaam hana Chaawuul gaaʼid fi bakaan ibaadat Allah. Wa hu naadum min balad Adoom usmah Duwaag kabiir al-ruʼyaan hana Chaawuul.
8 Wa Dawuud gaal le Akhiimalik : «Daahu be khafla al-malik dawwaraani le l-muhimma di wa ana ma jiit be seef wa la be silaah aakhar. Hal indak harba walla seef tantiini ?» 9 Wa raajil al-diin gaal : «Illa l-seef hana Jaaluut al-Filisti al-inta kataltah fi waadi al-Butum. Da gaaʼid mulawlaw be gitʼe wara l-farmala. Chiilah kan tidoorah achaan ma fi seef aakhar hini.» Wa Dawuud gaal : «Seef misil hu da ma fiih. Jiibah leyi !»
10 Wa fi l-yoom da, Dawuud arrad baʼiid min Chaawuul wa macha bakaan Akiich malik hana hillit Gaat. 11 Wa khaddaamiin Akiich gaalo leyah : «Da ma Dawuud malik balad Israaʼiil walla ? Da ma hu al-bikhannu beyah wa buguulu : ‹Chaawuul katal aalaaf wa Dawuud katal acharaat al-aalaaf ?›»
12 Wa l-kalaam da barjalah le Dawuud wa hu khaaf ziyaada min Akiich malik Gaat. 13 Wa khalaas, hu sawwa nafsah misil muchootin fi usuthum wa gaaʼid yichakhkhit fi l-biibaan wa riyaaltah tisiil fi dignah.
14 Wa Akiich gaal le khaddaamiinah : «Al-raajil da muchootin ! Maala jibtuuh leyi ? 15 Ana mugassir leyi muchootiniin walla ? Maala tijiibu leyi muchootin yisawwi chawaatiinah giddaami hini ? Maala hu yadkhul fi beeti ?»
© Arabe tchadien (alphabet latin) Bible © Alliance Biblique du Tchad, 2019.
