Dawuud fi balad al-Filistiyiin
1 Wa Dawuud gaal fi nafsah : «Yoom min al-ayyaam, Chaawuul yaji yaktulni. Wa cheyy aakhar nisawwiih ma fiih illa niʼarrid wa namchi balad al-Filistiyiin. Wa be da, hu yikhalli mutaaradati fi kulla balad Israaʼiil. Wa ana nanja minnah.»
2 Wa Dawuud wa l-rujaal al-suttumiya al-maʼaayah macho le Akiich wileed Maʼuuk malik hillit Gaat. 3 Wa Dawuud macha sakan bakaan Akiich malik Gaat, hu wa l-naas al-maʼaayah, ayyi waahid be aayiltah. Wa Dawuud kula chaal awiinah al-itneen Akhinuuʼam al-min hillit Yazraʼiil wa Abigaayil al-awwal marit Naabaal al-min hillit Karmal. 4 Wa wakit Chaawuul simiʼ kadar Dawuud arrad macha hillit Gaat, hu khalla mutaaradatah.
5 Wa Dawuud gaal le Akiich : «Kan ridiit leyi, antiini hille waahide min al-hillaal dool nagood foogha. Wa maala ana abdak nagood maʼaak fi hillit al-malik ?» 6 Wa khalaas fi l-yoom da, Akiich antaah le Dawuud hillit Sikhlaag. Wa achaan da bas, hillit Sikhlaag gaaʼide fi iideen muluuk Yahuuza lahaddi l-yoom.
7 Wa Dawuud gaʼad fi balad al-Filistiyiin muddit sana wa arbaʼa chahar. 8 Wa Dawuud wa naasah gaaʼidiin yamchu yahjumu al-Gachuuriyiin wa l-Girziyiin wa l-Amaalikh. Wa dool al-naas al-saakniin min zamaan fi l-ard min Chuur lahaddi balad Masir. 9 Wa Dawuud yidammir al-balad wa yaktul kulla l-rujaal wa l-awiin wa yichiil al-khanam wa l-bagar wa l-hamiir wa l-jumaal wa l-khulgaan. Wa yigabbil yaji le l-malik Akiich.
10 Wa l-malik Akiich yuguul leyah : «Al-yoom hajamtu ween ?» Wa Dawuud yakdib wa yuguul : «Hajamna be nuss al-wati hana balad Yahuuza wa ard al-Yarhamiiliyiin wa ard al-Khiiniyiin.»
11 Wa fi l-bakaanaat al-macha hajamhum, Dawuud yaktul kulla l-naas. Ma yikhalli wa la mara wa la raajil achaan kan yijiibuuhum fi hillit Gaat, yihajju wa yiʼooru be l-buldaan al-hu hajamaahum be l-sahiih. Wa da l-cheyy al-Dawuud gaaʼid yisawwiih wakit hu gaaʼid fi balad al-Filistiyiin. 12 Wa Akiich aamanah le Dawuud wa gaal fi nafsah : «Hassaʼ da, Dawuud bigi makruuh le ahalah Bani Israaʼiil. Achaan da, khalli yabga leyi khaddaam daayman.»
© Arabe tchadien (alphabet latin) Bible © Alliance Biblique du Tchad, 2019.
