Al-Filistiyiin abooh le Dawuud
1 Wa l-Filistiyiin lammo askarhum fi hillit Afiikh. Wa Bani Israaʼiil kamaan lammo askarhum jamb een al-almi al-gaaʼide fi hillit Yazraʼiil. 2 Wa kubaaraat al-Filistiyiin jarsaso ayyi waahid fi raas miya askar aw fi alif. Wa Dawuud wa naasah jarsaso fi l-akhiir maʼa l-malik Akiich. 3 Wa kubaaraat al-Filistiyiin gaalo : «Al-Ibraaniyiin dool jo yisawwu chunu ?» Wa Akiich gaal leehum : «Da Dawuud masʼuul hana Chaawuul malik Israaʼiil. Hu gaaʼid maʼaayi muddit sana aw santeen. Wa ana ma ligiit foogah cheyy fasil min arrad min sayyidah lahaddi l-yoom.»
4 Wa kubaaraat al-Filistiyiin ziʼilo didd Akiich wa gaalo : «Atrud al-raajil da ! Khalli yigabbil fi l-bakaan al-inta sakkantah foogah ! Ma yamchi maʼaana fi l-harib achaan baʼadeen ma yigabbil diddina. Wa kan yidoor yidalli galib sayyidah, ma yiwaddi leyah ruuseena walla ? 5 Da ma Dawuud al-bikhannu beyah wa buguulu : ‹Chaawuul katal aalaaf wa Dawuud katal acharaat al-aalaaf ?›»
6 Wa khalaas, al-malik Akiich naadaah le Dawuud wa gaal leyah : «Nahlif be Allah al-Hayy, inta adiil ! Da bigi leyi sameh wakit tamchi wa taji maʼaayi fi l-muʼaskar. Wa ana ma ligiit foogak cheyy fasil min jiit leyi lahaddi l-yoom. Wa laakin kubaaraat al-Filistiyiin al-aakhariin ma yidooruuk. 7 Hassaʼ da, gabbil wa amchi be l-salaama achaan ma tisawwi cheyy al-yizaʼʼil kubaaraat al-Filistiyiin.» 8 Wa Dawuud gaal le Akiich : «Laakin ana sawweet chunu ? Wa chunu al-cheyy al-inta simiʼtah minni ana abdak min ana jiitak lahaddi l-yoom achaan tadharni ma namchi nihaarib udwaan sayyidi al-malik ?»
9 Wa Akiich radda le Dawuud wa gaal : «Ana naʼarif kadar inta adiil maʼaayi misil malak al-Rabb. Wa laakin kubaaraat al-Filistiyiin bas gaalo leyi, inta ma tamchi maʼaana fi l-harib. 10 Hassaʼ da, gumm be fajur badri, inta wa l-rujaal al-jo maʼaak. Gabbulu fi l-bakaan al-ana anteetak. Ma tifakkir fi l-kalaam da achaan ana radyaan beek. Wa kan al-wata asbahat, khalaas amchu !»
11 Wa ambaakir fajur badri, Dawuud wa naasah gabbalo fi balad al-Filistiyiin. Wa l-Filistiyiin kamaan faato ale Yazraʼiil.
© Arabe tchadien (alphabet latin) Bible © Alliance Biblique du Tchad, 2019.
