Moot Chaawuul wa awlaadah
1 Wa yoom waahid, al-Filistiyiin hajamo Bani Israaʼiil wa humman jaro giddaam al-Filistiyiin wa katiiriin minhum maato fi jabal Gilbuuʼa. 2 Wa l-Filistiyiin haasaroohum le Chaawuul wa awlaadah. Wa humman katalo Yuunataan wa Abinadaab wa Malkichuuʼ, awlaad Chaawuul. 3 Wa fi l-bakaan da, al-harib bigi chadiid le Chaawuul. Wa siyaad al-nuchchaab chaafooh wa wakit hu chaafaahum, gamma yarjif chadiid giddaamhum.
4 Wa Chaawuul gaal le l-sabi al-chaayil leyah silaahah : «Sill seefak wa aktulni. Achaan ma nidoor al-ma mutahhariin dool yiʼazzubuuni wa yaktuluuni.» Laakin al-sabi aba achaan hu khaaf marra waahid. Wa khalaas, Chaawuul chaal seefah wa wagaʼ foogah wa maat. 5 Wa wakit al-sabi chaaf Chaawuul maat, hu kula wagaʼ fi seefah wa maat maʼaayah. 6 Wa be misil da, Chaawuul wa awlaadah al-talaata wa l-sabi al-chaayil leyah silaahah wa kulla askarah al-maʼaayah da maato sawa fi l-yoom da.
7 Wa wakit Bani Israaʼiil al-saakniin khaadi le waadi Yazraʼiil wa l-saakniin khaadi le l-Urdun simʼo be haziimat Bani Israaʼiil wa moot Chaawuul wa awlaadah, humman kula arrado wa khallo hillaalhum. Wa l-Filistiyiin jo wa sakano fi l-hillaal dool.
8 Wa ambaakir wakit al-Filistiyiin jo fi bakaan al-duwaas le yichiilu khumaam al-maytiin, ligo Chaawuul wa awlaadah al-talaata maytiin fi raas jabal Gilbuuʼa. 9 Wa gataʼo raas Chaawuul wa chaalo silaahah. Wa rassalo al-khabar da fi kulla balad al-Filistiyiin wa khabbaro beyah chaʼabhum wa fi buyuut asnaamhum. 10 Wa humman khatto silaah Chaawuul fi beet al-ibaada hana ilaahithum Achtaruut. Wa allago janaaztah fi durdur hillit Beet Chaan.
11 Wa sukkaan hillit Yaabiich fi turaab Gilʼaad simʼo be l-cheyy al-Filistiyiin sawwooh fi Chaawuul. 12 Wa khalaas, kulla l-rujaal al-fahaliin gammo wa raakho tuul al-leel. Wa jo sallo janaazaat Chaawuul wa awlaadah min durdur Beet Chaan wa jaaboohum fi Yaabiich wa tachchoohum. 13 Wa baʼad da, khammo udaamhum wa dafanoohum fi gaʼar al-ardeebaay al-gaaʼide fi Yaabiich. Wa saamo sabʼa yoom.
© Arabe tchadien (alphabet latin) Bible © Alliance Biblique du Tchad, 2019.
