Masaaʼiil al-muʼminiin
1 Nuguulu kan naadum yidoor yabga waahid min masaaʼiil al-muʼminiin, hu yidoor yugumm be khidme kariime. Wa l-kalaam da hagg. 2 Wa achaan da, khalli ayyi naadum al-masʼuul fi l-muʼminiin yabga naadum al-ma indah ayyi eeb. Waajib yabga raajil martah waahide bas wa aagil wa multazim wa mukarram wa kariim le l-diifaan wa gaadir fi l-allimiin. 3 Waajib ma yabga sakkaari wa la daawaasi laakin waajib yabga naadum indah nafas baarid wa ma siid machaakil wa la tammaaʼ. 4 Waajib yabga naadum al-yichiil masʼuuliiyit beetah wa yirabbi iyaalah le yikarrumuuh fi kulli cheyy. 5 Achaan kan naadum ma yagdar yichiil masʼuuliiyit beetah, kikkeef yagdar yirayyis jamaaʼat al-muʼminiin hana Allah ?
6 Wa khalli naadum ma yabga masʼuul kan dahaabah aaman be l-Masiih. Al-naadum al-misil da akuun yistakbar wa Allah yiʼaakhibah misil aakhab Ibliis. 7 Wa maʼa kulla l-kalaam da, khalli ayyi masʼuul yabga naadum al-yikarrumuuh al-naas al-ma muʼminiin kula. Wa misil da, al-eeb ma yaji foogah wa yagaʼ fi charak Ibliis.
Al-muʼaawiniin
8 Wa nafs al-cheyy le l-muʼaawiniin. Waajib yabgo naas muhtaramiin al-induhum kalaam waahid wa ma itneen wa ma sakkaara wa ma yihibbu riba al-haraam. 9 Wa waajib yitaabuʼu derib al-iimaan al-Allah bayyanah leena wa yakurbuuh gawi be niiye mukhlisa. 10 Wa gubbaal kulla cheyy, waajib yijarrubuuhum. Wa baʼadeen kan ma induhum eeb, khalli yabgo muʼaawiniin wa yakhdumu le jamaaʼat al-muʼminiin.
11 Wa nafs al-cheyy le awiinhum. Waajib marit al-muʼaawin tabga muhtarama wa ma gawwaala laakin aagle wa amiine fi kulli cheyy. 12 Wa khalli ayyi muʼaawin yabga raajil martah waahide bas wa yirabbi iyaalah adiil wa yichiil masʼuuliiyit beetah. 13 Al-naas al-yabgo muʼaawiniin wa yakhdumu adiil dool, iimaanhum be l-Masiih Isa yabga aali wa yabgo saabtiin bilheen wa yalgo charaf.
Amuud al-hagg wa asaasah
14 Nidoor najiik gariib laakin katabt leek al-wasaaya dool achaan 15 kan niʼakhkhir kula, inta taʼarif al-haal al-waajbe le ahal Allah. Humman naas Allah ummat al-Masiih. Wa ummat al-Masiih, hi amuud al-hagg wa asaasah. 16 Wa bala chakak, derib al-takhwa al-Allah bayyanah leena, hu aziim.
Al-Masiih bigi insaan wa baan fi l-dunya
wa l-Ruuh al-Khudduus chahad leyah.
Al-malaaʼika chaafooh fi l-sama
wa naasah bachcharo beyah al-umam.
Naas aamano beyah fi l-dunya
wa Allah rafaʼah foog fi majdah.
© Arabe tchadien (alphabet latin) Bible © Alliance Biblique du Tchad, 2019.
