Al-kidib fi l-zaman al-akhiir
1 Wa be kalaam waadih, al-Ruuh al-Khudduus yuguul kadar fi l-zaman al-akhiir, naas waahidiin yamurgu min derib al-iimaan. Wa yitaabuʼu derib al-chawaatiin al-yiwadduruuhum wa yasmaʼo taʼliim min al-chawaatiin. 2 Wa yinkhachcho be sabab al-naas al-yichattutu al-taʼliim da. Wa l-naas dool, humman munaafikhiin wa kaddaabiin wa guluubhum maytiin.
3 Yadharo al-naas min al-akhiide wa yiharrumu le l-naas achya waahidiin min al-akil. Wa laakin al-akil da, Allah khalagah achaan al-naas al-muʼminiin al-yaʼarfu al-hagg yakhbalooh be chukur. 4 Aywa, kulla cheyy al-Allah khalagah sameh wa ma fi cheyy makruuh kan naakuluuh be chukur. 5 Achaan al-akil yabga halaal be kalaam Allah wa duʼa hana l-chukur.
Abga khaddaam adiil le l-Masiih
6 Kan tiʼallim al-akhwaan al-wasaaya dool, inta tabga khaddaam adiil le l-Masiih Isa. Wa kalaam al-iimaan wa l-taʼliim al-adiil al-titaabiʼah, dool yabgo leek misil akil al-yantiik gudra. 7 Angariʼ marra waahid min al-gisas al-baatliin wa l-kalaam al-misil kalaam al-ajaayiz al-kharfaanaat. Darrib nafsak achaan tabga naadum takhi. 8 Sahiih, al-riyaada indaha faayde laakin al-takhwa faayditah ziyaada min kulli cheyy wa nalgo minha, fi l-dunya wa fi l-aakhira, al-haya al-Allah waaʼadaana beeha. 9 Al-kalaam da hagg wa waajib kulla l-naas yisaddugu beyah. 10 Wa fi sabab al-waʼad da, natʼabo wa nijaahudu. Khatteena achamna saabit fi Allah al-Hayy al-hu bas munajji hana kulla l-naas khaassatan al-muʼminiin.
Buulus chajjaʼ Timuutaawus
11 Aamurhum le l-naas achaan yitaabuʼu al-kalaam da wa allimhum leyah. 12 Ma tikhalli naadum yahgirak be sabab inta sakhayyar fi l-umur. Sawwi nafsak masal le l-muʼminiin fi kalaamak wa haalak. Khalli yichiifu foogak al-mahabba wa l-iimaan wa l-tihaara. 13 Lahaddi najiik, ankarib fi giraayit Kitaab Allah le l-naas wa ma tikhalli minnak al-bachchiriin wa l-allimiin.
14 Khutt baalak fi l-baraka al-Allah antaaha leek be l-kalaam al-atnabbaʼo beyah jamaaʼat al-chuyuukh wakit khatto iideehum foogak. 15 Ankarib fi l-waajibaat dool wa jaahid fi chaanhum achaan kulla l-naas yichiifu najaahak. 16 Khutt baalak fi nafsak wa fi taʼliimak le l-naas. Ankarib foogah wa be misil da, tinajji nafsak wa tinajji al-naas al-yasmaʼo kalaamak.
© Arabe tchadien (alphabet latin) Bible © Alliance Biblique du Tchad, 2019.
