Suleymaan talab hikma min al-Rabb
1 Suleymaan wileed Dawuud sabbat mulkah wa Allah Ilaahah gaaʼid maʼaayah wa sawwaah aali. 2 Wa Suleymaan naada kulla Bani Israaʼiil khaassatan khuyyaad al-aalaaf wa khuyyaad al-miyaat wa l-gudiya wa kulla kubaaraat Bani Israaʼiil wa dool kubaaraat al-aayilaat. 3 Wa Suleymaan wa kulla l-chaʼab macho fi bakaan al-ibaada al-fi hillit Gibʼuun achaan fi l-bakaan da bas gaaʼide kheemat al-ijtimaaʼ hana l-Rabb. Wa di bas al-kheema al-sawwaaha Muusa abd Allah fi l-sahara. 4 Wa sanduug al-Rabb kamaan, Dawuud jaabah min hillit Kharyat Yaʼariim wa khattaah fi l-bakaan al-hu jahhazah leyah wa di kheema fi Uruchaliim. 5 Wa l-madbah hana l-nahaas al-sanaʼah Basaliil wileed Uuri wileed wileedah le Huur gaaʼid giddaam kheemat al-ijtimaaʼ. Wa fi l-bakaan da bas, Suleymaan wa kulla l-chaʼab yasʼalo Allah. 6 Wa fi l-bakaan da giddaam Allah, Suleymaan rikib fi l-madbah hana l-nahaas gariib le kheemat al-ijtimaaʼ. Wa gaddam foogah 1 000 dahaaya muharragiin.
7 Wa fi l-leel di, al-Rabb baan le Suleymaan wa gaal leyah : «Atlub minni al-cheyy al-inta tidoorah wa ana nantiih leek.» 8 Wa Suleymaan radda le l-Rabb wa gaal : «Inta sawweet kheer katiir le Dawuud abuuyi wa darrajtini malik fi badalah. 9 Wa hassaʼ da, ya Allah Ilaahi, khalli kalaamak al-gultah le abuuyi Dawuud da yilhaggag achaan inta bas darrajtini malik fi raas al-chaʼab al-katiiriin misil turaab al-ard. 10 Wa antiini al-hikma wa l-ilim le naʼarif kikkeef nuguud al-chaʼab da. Achaan yaatu yagdar yahkim fi chaʼabak al-katiiriin dool ?»
11 Wa l-Rabb gaal le Suleymaan : «Da bas al-cheyy al-galbak dawwarah ! Inta ma talabt minni khuna wa la maal wa la azama. Wa ma talabt moot udwaanak wa la tuul al-umur laakin inta talabt al-hikma wa l-ilim le tahkim fi chaʼabi al-ana darrajtak fooghum malik. 12 Wa fi chaan da, al-hikma wa l-ilim anteethum leek wa niziidak battaan wa nantiik al-khuna wa l-maal wa l-azama al-abadan muluuk al-gablak ma ligooh. Wa baʼadak kula, naadum ma yalgaah.»
13 Wa baʼad da, Suleymaan gabbal fi Uruchaliim min bakaan al-ibaada al-fi Gibʼuun al-gaaʼide foogah kheemat al-ijtimaaʼ. Wa hakam fi Bani Israaʼiil.
Al-khuna hana Suleymaan
14 Wa l-malik Suleymaan lamma arabaat hana harib wa siyaad kheel. Hu indah 1 400 arabaat harib wa 12 000 siyaad kheel. Wa hu wadda waahidiin minhum fi l-hillaal al-yukhutt fooghum arabaatah wa waahidiin kamaan khallaahum maʼaayah fi Uruchaliim. 15 Wa l-malik jaab fi Uruchaliim fudda wa dahab katiir ziyaada misil al-hashas. Wa hatab al-arz kula bigi katiir ziyaada misil chadar al-jimmeez al-yugumm fi sahalat Chafiila. 16 Wa kheel al-malik Suleymaan, gaaʼidiin yijiibuuhum leyah min Masir wa min Kuwi. Wa da tujjaar al-malik bas yamchu wa yachruuhum leyah min hinaak. 17 Wa ayyi araba al-yijiibuuha min Masir tamanha 600 hajar fudda wa ayyi juwaad tamanah 150 hajar fudda. Wa be nafs al-taman da bas, al-tujjaar gaaʼidiin yijiibu arabaat wa kheel le muluuk al-Hittiyiin wa le muluuk Araam kula.
© Arabe tchadien (alphabet latin) Bible © Alliance Biblique du Tchad, 2019.
