Abiiya bigi malik fi Yahuuza
1 Fi sanit 18 hana hukum Yarubaʼaam wileed Nabaat fi mamlakat Israaʼiil, Abiiya bigi malik fi mamlakat Yahuuza. 2 Wa hu hakam talaata sana fi Madiinat al-Khudus. Wa ammah usumha Mikaaya bineeyit Uriyiil min hillit Gibeeʼa.
Wa kaan harib ambeen Abiiya wa Yarubaʼaam. 3 Wa Abiiya bada al-harba be deech adadah 400 000 askar furraas min ahsan al-muhaaribiin. Wa Yarubaʼaam kamaan gaabalah be rujaal furraas min ahsan muhaaribiinah wa adadhum 800 000. 4 Wa Abiiya talaʼ fi raas jabal Samaraayim al-fi jibaal Afraayim wa gaal : «Asmaʼni, ya Yarubaʼaam ! Wa asmaʼooni, ya kulla naas mamlakat Israaʼiil ! 5 Intu ma taʼarfu kadar Allah Ilaah Bani Israaʼiil anta muluk Bani Israaʼiil le Dawuud wa iyaalah ila l-abad walla ? Wa di ma muʼaahada daayme al-ma tingatiʼ walla ?
6 «Wa laakin Yarubaʼaam wileed Nabaat hu awwal abid Suleymaan wileed Dawuud wa gamma atmarrad didd siidah. 7 Wa baʼad da, lammo maʼaayah naas al-kaslaaniin wa l-ma naafʼiin wa humman gammo didd Rahabʼaam wileed Suleymaan. Wa fi l-wakit da, Rahabʼaam lissaaʼ sabi ma indah gudra. Wa be da, hu ma gidir yasbit giddaamhum.»
8 Wa Abiiya gaal battaan : «Hassaʼ da, intu tuguulu intu gawiyiin wa tichiilu muluk Allah al-fi iid zurriiyit Dawuud. Wa intu naas katiiriin marra waahid wa induku maʼaaku ajjaal hana dahab al-sawwaahum leeku Yarubaʼaam misil ilaahaatku. 9 Wa ma intu bas al-taradtu rujaal al-diin hana Allah wa dool min zurriiyit Haaruun wa l-Laawiyiin ? Wa darrajtu leeku rujaal diin aakhariin misil naas gaaʼidiin yisawwu fi buldaan aakhariin ? Wa ayyi naadum al-yaji be toor wa sabʼa kubchaan, khalaas hu yabga raajil diin hana asnaam dool wa humman ma ilaahaat.
10 «Wa kan leena aniina kamaan, ma abeena Allah Ilaahna. Wa rujaal al-diin al-gaaʼidiin yakhdumu le Allah, humman min zurriiyit Haaruun. Wa l-Laawiyiin kula gaaʼidiin yisawwu khidmithum. 11 Fi kulli fajur wa achiiye, yiharrugu dahaaya wa bakhuur muʼattar le Allah wa yigaddumu al-khubza fi l-tarabeeza al-taahire. Wa kulli achiiye yiʼoogudu niiraan al-faanuus al-min dahab. Achaan aniina gaaʼidiin nahfado khidmit Allah Ilaahna al-intu abeetuuh. 12 Chiifu ! Allah wa rujaal al-diin hineeyah gaaʼidiin maʼaana wa indina al-burunji al-nadurbuuh le harakat al-harib didduku. Ya naas mamlakat Israaʼiil, ma tihaarubu Allah Rabb juduudku achaan intu ma tanjaho !»
13 Wa wakit Abiiya gaaʼid yihajji, Yarubaʼaam rassal askarah wa hawwagoohum wa karaso le askar mamlakat Yahuuza. Wa khalaas, askar mamlakat Israaʼiil hajamo askar mamlakat Yahuuza be giddaam wa l-askar al-karaso leehum kamaan be wara. 14 Wa wakit askar mamlakat Yahuuza anlafato waraahum, chaafo kadar hajamoohum min giddaam wa min wara. Wa khalaas, humman koorako le Allah. Wa wakit rujaal al-diin darabo al-burunji, 15 askar mamlakat Yahuuza koorako wa wakit humman koorako, al-Rabb haarab Yarubaʼaam wa kulla askar mamlakat Israaʼiil giddaam Abiiya wa askar mamlakat Yahuuza. 16 Wa askar mamlakat Israaʼiil arrado giddaam askar mamlakat Yahuuza wa l-Rabb sallamaahum fi iid askar mamlakat Yahuuza. 17 Wa Abiiya wa naasah annasaro fooghum nasur kabiir wa 500 000 raajil min ahsan al-muhaaribiin hana mamlakat Israaʼiil maato. 18 Wa fi l-wakit da, askar mamlakat Israaʼiil anhazamo. Wa askar mamlakat Yahuuza kamaan annasaro achaan humman atwakkalo ale Allah Rabb juduudhum. 19 Wa Abiiya tarad Yarubaʼaam lahaddi galaʼ minnah madiinat Beet Iil wa madiinat Yachaana wa madiinat Afruun wa l-hillaal al-taabʼiin leehum.
20 Wa fi kulla wakit hukum Abiiya, Yarubaʼaam ma ligi battaan gudra misil awwal. Wa Allah darab Yarubaʼaam wa hu maat. 21 Wa Abiiya kamaan bigi chadiid. Hu akhad 14 awiin wa wilid 22 wulaad wa 16 banaat. 22 Wa l-baagi min amal Abiiya wa l-cheyy al-sawwaah wa kalaamah maktuubiin fi kitaab al-taariikh al-katabah al-nabi Iddu.
© Arabe tchadien (alphabet latin) Bible © Alliance Biblique du Tchad, 2019.
