1 Wa Yahuuchafat maat wa lihig abbahaatah wa dafanooh fi khabur juduudah fi madiinat Dawuud. Wa wileedah Yahuuraam hakam fi badalah.
Yahuuraam bigi malik fi Yahuuza
2 Wa Yahuuraam indah akhwaan katiiriin wa humman Azarya wa Yahiyiil wa Zakariiya wa Azaryaahu wa Mikaayiil wa Chafatya dool kulluhum ke iyaal malik Yahuuchafat. 3 Wa abuuhum Yahuuchafat antaahum hadaaya katiiriin misil fudda wa dahab wa khumaam khaali. Wa antaahum masʼuuliiye fi l-mudun al-gawiyiin hana balad Yahuuza. Wa laakin hu anta al-muluk le wileedah Yahuuraam achaan hu bas al-bikir.
4 Wa wakit Yahuuraam chaal muluk abuuh, hu bigi chadiid wa katal kulla akhwaanah wa waahidiin min kubaaraat al-mamlaka kula. 5 Wa Yahuuraam indah 32 sana wakit bigi malik wa hakam 8 sana fi Madiinat al-Khudus. 6 Wa hu taabaʼ derib muluuk mamlakat Israaʼiil misil aayilat Akhaab sawwatah achaan hu akhad bineeyit Akhaab. Wa hu sawwa al-fasaala giddaam Allah. 7 Wa be da kula, Allah ma dawwar yidammir zurriiyit Dawuud achaan al-muʼaahada al-hu sawwaaha maʼa Dawuud wakit gaal leyah daayman naadum waahid min zurriiytah yagood fi l-muluk.
8 Wa fi hukum Yahuuraam malik mamlakat Yahuuza, naas balad Adoom atmarrado didd hukmah wa darrajo leehum malik aakhar. 9 Wa Yahuuraam macha maʼa khuyyaad wa kulla arabaatah hana l-harib le yihaarubu al-Adoomiyiin. Wa be l-leel, al-Adoomiyiin hawwagoohum wa laakin Yahuuraam wa kubaaraat arabaatah hana l-harib gammo haaraboohum. 10 Wa l-tamarrud hana balad Adoom didd hukum Yahuuraam gaaʼid lahaddi l-yoom.
Wa fi l-wakit da, hillit Libna kula atmarradat didd hukum Yahuuraam achaan hu aba Allah Rabb juduudah. 11 Yahuuraam bana bakaanaat aaliyiin hana ibaadat al-asnaam fi ruuse jibaal Yahuuza. Wa lazza sukkaan Madiinat al-Khudus yichcharmato maʼa l-asnaam wa le naas balad Yahuuza, baʼʼadaahum min Allah.
12 Yoom waahid, jawaab ja le Yahuuraam min al-nabi Iliyaas wa gaal :
Daahu Allah Ilaah jiddak Dawuud gaal : «Inta ma taabaʼt derib abuuk Yahuuchafat wa la derib jiddak Aasa malik mamlakat Yahuuza. 13 Laakin inta taabaʼt derib muluuk mamlakat Israaʼiil wa lazzeet naas balad Yahuuza wa sukkaan Madiinat al-Khudus le yichcharmato maʼa l-asnaam misil aayilat Akhaab sawwooh. Wa battaan inta katalt kulla akhwaanak iyaal abuuk al-humman akheer minnak.»14 Wa be sabab da, daahu Allah yinazzil waba chadiid fi chaʼabak wa fi iyaalak wa fi awiinak wa fi kulla maalak. 15 Wa inta kula yakurbuuk amraad khaassatan marad al-batun al-yiziid leek min yoom le yoom lahaddi masaariinak yamurgu min batnak min chiddit al-marad.16 Wa khalaas, Allah lazza al-Filistiyiin wa l-Arab al-gaaʼidiin jamb al-Habachiyiin le yugummu didd al-malik Yahuuraam. 17 Wa humman hajamo mamlakat Yahuuza wa chaggo al-balad wa kasabo kulla l-maal al-fi gasir al-malik wa chaalo iyaalah wa awiinah kula. Wa ma faddal leyah waahid min iyaalah illa wileedah al-sakhayyar Akhazya.
18 Wa baʼad da, Allah nazzal leyah marad al-batun al-ma biddaawa. 19 Wa l-marad da gaaʼid yiziid min yoom le yoom. Wa fi l-sana al-taaniye, masaariinah marago min batnah min chiddit al-marad wa maat fi taʼab chadiid. Wa chaʼabah ma harrago leyah riihe katiire misil sawwooh le juduudah le yicharrufuuhum. 20 Wa Yahuuraam indah 32 sana wakit bigi malik wa hakam 8 sana fi Madiinat al-Khudus. Wa wakit maat, naadum waahid al-baka leyah kula ma fiih. Wa dafanooh fi madiinat Dawuud laakin ma fi khabur al-muluuk.
© Arabe tchadien (alphabet latin) Bible © Alliance Biblique du Tchad, 2019.
