Akhazya bigi malik fi Yahuuza
1 Wa sukkaan Madiinat al-Khudus darrajo Akhazya al-wileed al-sakhayyar hana Yahuuraam fi badalah achaan awwal al-Arab al-nahhaabiin jo fi l-muʼaskar wa katalo kulla akhwaanah al-kubaar. Wa be misil da, Akhazya wileed Yahuuraam bigi malik fi mamlakat Yahuuza. 2 Wa Akhazya indah 42 sana wakit bigi malik wa hakam sana waahide fi Madiinat al-Khudus. Wa ammah usumha Atalya min aayilat Umri. 3 Wa hu kula taabaʼ derib aayilat Akhaab achaan ammah gaaʼide tiwassiih le yisawwi al-fasaala. 4 Wa Akhazya sawwa al-fasaala giddaam Allah misil aayilat Akhaab sawwatah achaan baʼad moot abuuh, al-mustachaariin gaaʼidiin yiwassuuh be l-cheyy al-yijiib damaarah. 5 Wa be wasiiyithum, Akhazya macha maʼa Yuuraam wileed Akhaab malik mamlakat Israaʼiil wa haarabo Hazayiil malik balad Araam fi hillit Raamuut al-fi Gilʼaad. Wa l-Araamiyiin jarahooh le Yuuraam. 6 Wa Yuuraam gabbal fi hillit Yazraʼiil le yiʼaalij jiraahah al-jarahooh wakit gaaʼid yihaarib didd Hazayiil malik Araam. Wa Akhazya wileed Yahuuraam malik mamlakat Yahuuza macha hillit Yazraʼiil le yichiif Yuuraam wileed Akhaab achaan hu taʼbaan.
7 Wa be ziyaarat Akhazya le Yuuraam bas, al-Rabb kharrar damaarah. Wakit Akhazya gaaʼid hinaak, hu gamma maʼa Yuuraam wa macho le yigaabulu Yaahu wileed Nimchi. Wa Yaahu da, hu bas al-Allah masahah wa darrajah malik le yidammir aayilat Akhaab. 8 Wa wakit Yaahu gaaʼid yiʼaakhib aayilat Akhaab, hu ligi kubaaraat mamlakat Yahuuza wa iyaal akhwaan Akhazya al-khadamo le l-malik wa katalaahum kulluhum. 9 Wa baʼad da, gamma yifattich Akhazya. Wa Yaahu rassal naas yifattuchu Akhazya wa ligooh fi madiinat al-Saamira fi l-bakaan al-mullabbid foogah wa jaabooh le Yaahu wa katalooh. Wa dafanooh adiil achaan gaalo : «Da wileed Yahuuchafat al-taabaʼ Allah be kulla galbah.» Wa ma faddal naadum min aayilat Akhazya al-yagdar yichiil al-muluk.
Al-malika Atalya chaalat al-muluk
10 Wa wakit Atalya amm Akhazya chaafat kadar wileedha maat, hi gammat tidammir kulla zurriiyit muluuk mamlakat Yahuuza. 11 Wa laakin Yuuchabʼa bineeyit malik Yahuuraam chaalat Yuwaach wileed Akhazya wa maragatah be sirr min lubb iyaal al-malik al-yidooru yaktuluuhum. Wa hi labbadatah maʼa l-mara al-takurbah, fi lubb makhazan al-saraayir. Wa Yuuchabʼa di, hi bineeyit malik Yahuuraam wa marit Yahuuyadaʼ kabiir rujaal al-diin wa akhut Akhazya. Wa be misil da, hi labbadat Yuwaach wileed Akhazya min Atalya wa hu niji min al-moot. 12 Wa Yuwaach gaʼad mulabbad fi beet Allah maʼa l-naas al-najjooh le muddit sitte sana. Wa fi l-mudda di, Atalya gaaʼide tahkim fi l-balad.
© Arabe tchadien (alphabet latin) Bible © Alliance Biblique du Tchad, 2019.
