Suleymaan bada buna beet Allah
1 Wa Suleymaan bada buna beet Allah fi Uruchaliim fi raas hajar Muriiya. Wa da l-bakaan al-Allah baan foogah le Dawuud abuuh wa da l-bakaan al-Dawuud jahhazah fi madagg hana Urnaan al-Yabuusi. 2 Wa Suleymaan bada al-buna fi l-chahar al-taani fi l-sana al-raabʼe hana hukmah.
3 Wa Suleymaan assas buna beet Allah be asaas tuulah 60 duraaʼ wa urdah 20 duraaʼ hasab al-magaas al-gadiim. 4 Wa khurfit al-madkhal urdaha 20 duraaʼ wa tuulha foog 20 duraaʼ. Wa masahooha min daakhal kullaha ke be dahab saafi. 5 Wa l-khurfa al-kabiire di saddooha be khachab al-sarwi al-mamsuuh be dahab saafi wa nagacho foogah suwar hana salaasil wa chadar nakhal. 6 Wa battaan jammalo al-khurfa di be hujaar khaaliyiin wa be dahab al-jaabooh min balad Farwaayim. 7 Wa kulla l-khurfa di, masahooha be dahab wa da l-maraadiis wa l-madkhal wa l-daraadir wa biibaan al-beet. Wa nagacho suwar hana makhluugiin samaawiyiin fi l-daraadir.
8 Wa fi lubb al-beet da, bano al-bakaan al-mukhaddas marra waahid tuulah 20 duraaʼ wa urdah kula 20 duraaʼ. Wa masahooh be dahab saafi al-waznah yisaawi 20 000 kiilo. 9 Wa l-wazin hana l-masaamiir yisaawi 72 jineeh hana dahab. Wa l-khachab hana l-beet be foog kula masahooh be dahab.
10 Wa fi lubb al-bakaan al-mukhaddas marra waahid, be hatab sanaʼo tamaasiil hana makhluugiin samaawiyiin itneen wa masahoohum be dahab. 11 Wa l-janaahe hana l-makhluugiin al-samaawiyiin dool tuulhum 20 duraaʼ. Jinh waahid hana l-makhluug al-awwalaani, tuulah 5 duraaʼ wa yilimm fi l-durdur hana l-beet. Wa jinhah al-aakhar kula tuulah 5 duraaʼ wa yilimm maʼa l-jinh hana l-makhluug al-taani. 12 Wa l-jinh hana l-makhluug al-taani kula tuulah 5 duraaʼ wa yilimm fi l-durdur hana l-beet. Wa jinhah al-aakhar kula tuulah 5 duraaʼ wa yilimm maʼa l-jinh hana l-makhluug al-awwalaani. 13 Wa l-makhluugiin al-samaawiyiin al-itneen dool waagfiin be tuulhum wa wijihhum mugaabil al-beet wa mumattitiin janaaheehum al-tuulhum 20 duraaʼ. 14 Wa sawwo sitaar min gumaach loonah zahri wa garadi wa ahmar wa kattaan. Wa khayyato foogah suwar hana l-makhluugiin al-samaawiyiin.
Al-amad al-itneen hana nahaas
15 Wa sanaʼo amad itneen hana nahaas giddaam beet Allah wa tuul hana ayyi amuud 35 duraaʼ. Wa sanaʼo leehum ruuse hana nahaas wa khattoohum foog fi l-amad dool wa ayyi waahid min al-ruuse dool tuulah 5 duraaʼ. 16 Wa jammalo al-amad dool be salaasil misil al-fi l-bakaan al-mukhaddas wa allagoohum foog fi ruuse al-amad. Wa battaan sanaʼo 100 rummaan min nahaas wa rassoohum fi l-salaasil. 17 Wa khatto al-amad dool giddaam beet Allah. Al-amuud al-waahid, khattaah be l-zeene wa sammaah Yaakiin (maʼanaatah Allah yisabbit). Wa l-amuud al-taani, khattaah be l-isra wa sammaah Buʼaaz (maʼanaatah al-gudra min Allah).
© Arabe tchadien (alphabet latin) Bible © Alliance Biblique du Tchad, 2019.
