Al-sanduug khattooh fi beet Allah
1 Wa wakit kulla l-khidme hana beet Allah kammalat khalaas, al-malik Suleymaan jaab kulla cheyy al-abuuh Dawuud khassasah misil al-fudda wa l-dahab wa l-mawaaʼiin wa khattaahum fi l-makhaazin hana beet Allah.
2 Wa baʼad da, al-malik Suleymaan naada kulla chuyuukh Bani Israaʼiil wa kulla kubaaraat al-gabaayil wa kubaaraat al-aayilaat hana Bani Israaʼiil yilimmu fi Uruchaliim. Wa da achaan yichiilu sanduug muʼaahadat Allah min madiinat Dawuud wa hi Sahyuun wa yiwadduuh beet Allah. 3 Wa kulla rujaal Bani Israaʼiil lammo wara l-malik fi wakt al-iid hana l-chahar al-saabiʼ. 4 Wakit kulla chuyuukh Bani Israaʼiil jo, al-Laawiyiin chaalo al-sanduug. 5 Wa rujaal al-diin al-Laawiyiin chaalo al-sanduug wa kheemat al-ijtimaaʼ wa kulla l-muʼiddaat al-mukhassasiin al-fi lubb al-kheema. 6 Wa l-malik Suleymaan wa kulla jamaaʼat Bani Israaʼiil lammo wa wagafo giddaam al-sanduug. Wa gaddamo dahaaya hana khanam wa bagar katiir marra waahid wa lahaddi naadum ma yagdar yahsibhum wa la yalga adadhum.
7 Wa baʼad da, rujaal al-diin jaabo sanduug muʼaahadat Allah wa dakhkhalooh fi lubb beet Allah fi l-bakaan al-khassasooh leyah fi l-bakaan al-mukhaddas marra waahid tihit janaahe hana l-makhluugiin al-samaawiyiin. 8 Wa l-makhluugiin al-samaawiyiin dool mumattitiin janaaheehum be foog le l-bakaan al-gaaʼid foogah al-sanduug. Wa be misil da, yikhattu al-sanduug wa l-iidaan al-yichiiluuh beehum. 9 Wa l-iidaan al-yichiiluuh beehum tuwaal. Wa khachum al-iidaan dool yinchaaf le l-naadum al-gaaʼid ambeen al-sanduug wa l-madkhal hana l-bakaan al-mukhaddas marra waahid. Wa laakin naadum min barra ma yichiifah. Wa l-sanduug da gaaʼid fi l-bakaan lahaddi l-yoom. 10 Wa l-sanduug da ma indah cheyy daakhal illa l-liihaan al-itneen al-Muusa khattaahum fi lubbah wakit hu gaaʼid fi jabal Huuriib. Wa da, wakit Allah sawwa muʼaahada maʼa Bani Israaʼiil baʼad marigiinhum min balad Masir.
11 Wa rujaal al-diin marago min al-bakaan al-mukhaddas. Wa awwal kulluhum ke khassaso nufuushum wa ma hammo be l-nizaam hana majmuuʼaathum. 12 Wa kulla l-Laawiyiin al-khannaayiin, humman Asaaf wa Heemaan wa Yaduutuun wa iyaalhum wa akhwaanhum laabsiin khulgaan min gumaach hana kattaan wa waagfiin be l-nuss al-sabhaani hana l-madbah be aalaat al-musiikha misil nagaagiir wa amsibeybe wa jigindiiye. Wa maʼaahum 120 rujaal diin al-gaaʼidiin yadurbu al-burunji. 13 Wa l-naas al-yadurbu al-burunji wa l-khannaayiin kulluhum lammo hissuhum sawa le yahmudu Allah wa yachkuruuh. Wakit darabo al-burunji wa l-nagaagiir wa l-aalaat al-aakhariin hana l-musiikha, gaalo : «Allah hu rahiim wa rahmatah daayme ila l-abad.» Wa tawwaali ke, beet Allah anmala be sahaabaay. 14 Wa rujaal al-diin ma gidro yisawwu khidmithum be sabab al-sahaabaay di achaan majd Allah mala beetah.
© Arabe tchadien (alphabet latin) Bible © Alliance Biblique du Tchad, 2019.
