Amal hana l-malik Suleymaan
1 Fi muddit 20 sana, Suleymaan bana beet Allah wa gasir le nafsah. 2 Wa hu bana battaan al-hillaal al-Hiiraam antaahum leyah wa antaahum le Bani Israaʼiil le yaskunu fiihum. 3 Wa Suleymaan macha hajam hillit Hamaat Suuba wa chaalha. 4 Wa battaan kula bana hillit Tadmuur al-fi l-sahara wa bana hillaal fi balad Hamaat le yabgo makhaazin. 5 Wa Suleymaan bana hillit Beet Huruun al-foog wa hillit Beet Huruun al-tihit wa humman dool mudun gawiyiin induhum daraadir wa biibaan wa gafala. 6 Wa bana hillit Baʼalat wa kulla l-hillaal al-yakhzin fooghum wa l-hillaal al-yukhutt fooghum arabaatah hana l-harib wa kheelah. Wa Suleymaan bana kulla cheyy al-yidoorah fi Madiinat al-Khudus wa fi jibaal Lubnaan wa fi kulla mamlakatah al-hu gaaʼid yahkim foogha.
7 Wa fi l-balad, yifaddil naas min al-Hittiyiin wa l-Amuuriyiin wa l-Firizziyiin wa l-Hiwwiyiin wa l-Yabuusiyiin. Wa l-naas dool humman ma min Bani Israaʼiil. 8 Wa Bani Israaʼiil ma dammaro al-naas dool kulluhum wa fi chaan da, waahidiin min zurriiyithum faddalo fi l-balad. Wa Suleymaan astaʼmalhum fi l-khidme al-ijbaariiye lahaddi l-yoom. 9 Wa Suleymaan ma anta khidmit al-ijbaariiye di le naadum waahid min Bani Israaʼiil. Wa laakin hu sawwaahum askarah wa masaaʼiilah wa kubaaraat arabaatah hana l-harib wa siyaad kheelah. 10 Wa daahu adad kubaaraat al-hukkaam hana l-malik Suleymaan. Humman 250 rujaal al-yiraakhubu al-khaddaamiin.
11 Wa Suleymaan hawwalaaha le bineeyit Firʼoon min madiinat Dawuud le l-beet al-hu bana leeha. Wa Suleymaan gaal : «Marti ma tagood fi gasir Dawuud abuuyi malik Bani Israaʼiil. Achaan ayyi bakaan al-sanduug Allah gaʼad foogah, al-bakaan da mukhaddas.»
Nizaam al-ibaada
12 Wa Suleymaan gaddam dahaaya muharragiin fi l-madbah al-banaah giddaam khurfit madkhal hana beet Allah. 13 Wa hasab wasaaya Muusa, Suleymaan yigaddim dahaaya kulla yoom wa fi kulli yoom al-sabt wa awwal yoom fi kulli chahar. Wa battaan yigaddim dahaaya fi wakit al-aʼyaad al-talaata al-kubaar fi l-sana misil iid al-Khubza bala Tawwaara wa iid al-Gatiʼ wa iid al-Lagaadiib. 14 Wa Suleymaan tabbag al-kharaar al-Dawuud abuuh chaalah wa hu khatta majmuuʼaat rujaal al-diin wa l-Laawiyiin fi khidmithum. Al-Laawiyiin yachkuru Allah wa yisaaʼudu rujaal al-diin fi khidmithum hana kulla yoom. Wa l-hurraas mugassamiin fi ayyi baab hasab majmuuʼaathum. Achaan da bas al-amur hana Dawuud abd Allah. 15 Wa humman ma tarrafo min amur Dawuud, al-bukhuss rujaal al-diin wa l-Laawiyiin wa fi ayyi cheyy al-bukhuss al-maal.
16 Wa be misil da, Suleymaan haggag kulla l-khidme al-badaaha min yoom khatto asaas beet Allah, lahaddi yoom kammalooh. Wa beet Allah kammal tamaam. 17 Wa khalaas, al-malik Suleymaan macha hillit Asyuun Giibar wa hillit Ilaat wa l-hillaal dool fi khachum al-bahar hana balad Adoom. 18 Wa Hiiraam malik Suur rassal leyah khaddaamiinah al-yaʼarfu al-bahar adiil wa l-sufun kula. Wa l-khaddaamiin dool saafaro sawa maʼa khaddaamiin Suleymaan le balad Ufiir. Wa jaabo min hinaak dahab ziyaada min 15 000 kiilo le l-malik Suleymaan.
© Arabe tchadien (alphabet latin) Bible © Alliance Biblique du Tchad, 2019.
