Dahab fi maaʼuun hana tiine
1 Wa khalaas, Allah bas rahamna be l-khidme di wa achaan da, abadan ma naksalo minha. 2 Wa aniina abeena ma taabaʼna al-haal al-tijiib al-eeb wa la l-zunuub al-yisawwuuhum al-naas be achiir. Naabo ma nisawwu cheyy be najaada wa abadan ma nibaddulu kalaam Allah. La. Laakin giddaam Allah nikallumu al-hagg be kalaam waadih wa nikhallu galib hana ayyi naadum yachhad le haalna al-adiile.
3 Wa kan al-bichaara al-niballukhuuha ma tinfahim, hi ma tinfahim illa le l-naas al-muwaddiriin bas. 4 Al-naas al-ma muʼminiin dool guluubhum amyaaniin achaan Ibliis indah sulta fi l-dunya di wa hu amaahum. Hu yidoor yadharhum ma yichiifu al-nuur al-majiid hana l-Masiih al-niballukhu beyah al-bichaara. Al-Masiih hu suurat Allah.
5 Wa l-kalaam al-niballukhuuh ma bukhuss nufuusna. Laakin niballukhu be Isa al-Masiih wa nuguulu hu bas al-Rabb. Wa aniina khaddaamiin bas wa nakhdumu leeku fi chaanah. 6 Wa zamaan Allah gaal : «Khalli al-nuur yidawwi fi ust al-dalaam.» Wa hu bas al-nawwar guluubna achaan naʼarfu nuur Allah al-majiid al-gaaʼid fi wijih Isa al-Masiih.
7 Wa l-baraka al-indina di misil dahab saafi al-gaaʼid fi maaʼuun hana tiine. Wa da yiwassif kadar al-gudra al-ajiibe al-nakhdumu beeha, hi min Allah bas wa ma minnina aniina. 8 Aniina yidaayuguuna fi ayyi bakaan laakin ma yiwaggufuuna. Wa aniina mutahayyiriin laakin ma waddarna al-acham. 9 Wa l-naas yitaʼʼubuuna laakin Allah ma yikhalliina. Yarmuuna laakin ma yidammuruuna. 10 Al-Masiih tiʼib wa maat. Wa fi ayyi bakaan, aniina kula natʼabo mislah achaan hayaat Isa tinchaaf fi jisimna. 11 Aniina hayyiin wa laakin daayman yisallumuuna le l-moot fi chaan khidmitna le Isa. Wa da yabga leena achaan hayaat Isa tinchaaf fi jisimna al-yumuut. 12 Wa khalaas, aniina niʼiichu fi ust al-moot achaan intu talgo al-haya al-abadiiye.
13 Maktuub fi l-Kitaab : <Ana aamant wa achaan da kallamt.> Wa aniina kula indina iimaan misil al-iimaan da. Aniina muʼminiin wa achaan da nikallumu. 14 Wa naʼarfu kadar Allah al-baʼas Rabbina Isa min ust al-maytiin yabʼasna aniina kula maʼa Isa wa yiwaddiina maʼaaku fi hadaratah. 15 Wa kulla khidmitna di le faayditku. Wa nakhdumu achaan rahmat Allah talhag kulla l-naas wa humman yachkuru Allah ziyaada wa kulluhum yimajjuduuh.
16 Achaan da abadan ma naksalo. Sahiih, jisimna gaaʼid yumuut wa laakin al-haya al-jadiide gaaʼide tiziid fi guluubna kulli yoom. 17 Wa l-taʼab al-indina hassaʼ da, hu khafiif wa ma yitawwil. Laakin al-taʼab da yijahhizna le l-majd al-aziim al-abadan ma yikammil. 18 Wa ma nukhuttu baalna fi cheyy al-binchaaf. Nukhuttu baalna fi cheyy al-ma binchaaf. Achaan al-binchaaf yikammil wa laakin al-ma binchaaf yagood ila l-abad.
© Arabe tchadien (alphabet latin) Bible © Alliance Biblique du Tchad, 2019.
