Allah aakhab Dawuud le zanbah
1 Wa Allah rassal Naataan le Dawuud. Wa l-nabi macha le Dawuud wa gaal leyah : «Fiyah naaseen gaaʼidiin fi hille waahide. Al-raajil al-waahid khani wa l-aakhar fagri. 2 Wa l-khani da indah khanam wa bagar katiiriin. 3 Wa l-fagri da ma indah cheyy, illa sakhala waahide bas al-hu charaaha wa gaaʼid yirabbiiha. Wa hi gaaʼide takbur maʼaayah fi lubb iyaalah wa taakul min aklah wa tachrab min charaabah wa tunuum jambah. Wa hi bigat leyah misil bineeytah. 4 Wa yoom waahid, deef ja le l-raajil al-khani fi beetah. Wa laakin al-khani hanna fi bahaaymah wa ma dawwar yichiil bahiime waahide min khanamah aw bagarah le yidayyif beeha deefah. Hu gamma macha chaal al-sakhala hint al-fagri da wa dayyaf beeha deefah.»
5 Wa wakit Dawuud simiʼ al-kalaam da, ziʼil zaʼal chadiid didd al-raajil al-khani wa gaal le Naataan : «Nahlif be Allah al-Hayy, al-raajil da waajib leyah al-moot. 6 Wa waajib yikaffi arbaʼa khanam fi badal al-sakhala di achaan hu sawwa fiʼil cheen wa ma hanna foogha.» 7 Wa khalaas, Naataan gaal le Dawuud : «Al-raajil da, inta zaatak ! Wa daahu Allah Ilaah Bani Israaʼiil gaal : ‹Ana masahtak wa darrajtak malik fi Bani Israaʼiil wa najjeetak min iid Chaawuul. 8 Wa anteetak masʼuuliiye hana aayilat siidak Chaawuul wa anteetak awiinah kula. Wa anteetak masʼuuliiye hana Bani Israaʼiil wa Bani Yahuuza. Wa da kulla ke, kan chiyya leek, ana niziidak battaan ziyaada min da. 9 Wa maala ma karramt kalaami ana Allah ? Maala sawweet al-cheyy al-fasil da giddaami ? Inta katalt Uriiya al-Hitti be l-seef wa chilt martah wa sawweetha martak. Aywa, inta sallamtah le Bani Ammuun wa katalooh. 10 Wa min al-yoom le giddaam, aayiltak yaktuluuhum be l-seef. Achaan inta ma simiʼt kalaami ana Allah wa chilt marit Uriiya al-Hitti wa sawweetha martak.› 11 Wa hassaʼ da, daahu Allah gaal : ‹Ana niʼassis leek masiibe min lubb ahalak. Naglaʼ minnak awiinak wa nantiihin le waahid min ahalak wa hu yargud maʼaahin be l-nahaar. 12 Aywa, inta sawweet al-cheyy da be achiir laakin ana niwassifah giddaam kulla Bani Israaʼiil be l-nahaar.›»
13 Wa Dawuud gaal le Naataan : «Ana aʼtaraft be zanbi giddaam Allah.» Wa Naataan gaal le Dawuud : «Allah khafar leek zunuubak, inta ma tumuut. 14 Wa laakin inta hagart Allah wa isiitah wa be l-sabab da, al-wileed al-wildooh leek da yumuut.»
15 Wa baʼad da, Naataan gabbal beetah. Wa Allah darab wileed marit Uriiya al-wildatah le Dawuud wa hu bigi mardaan.
Moot wileed Batchaabaʼ
16 Wa Dawuud chahad al-Rabb fi chaan al-wileed wa gaaʼid yusuum. Wa wakit yamchi beetah be l-leel, yargud fi l-turaab. 17 Wa kubaaraat khaddaamiinah jo le yigawwumuuh min al-turaab laakin hu aba ma yugumm wa ma dawwar yaakul maʼaahum. 18 Wa fi l-yoom al-saabiʼ, al-wileed maat. Wa l-masaaʼiil khaafo wa abo ma yikhabburu Dawuud be mootah. Wa gaalo : «Wakit al-wileed lissaaʼ hayy, aniina hajjeena leyah wa hu aba ma yasmaʼ kalaamna. Wa kikkeef nagdaro niʼooruuh moot al-wileed da ? Akuun yisawwi al-fasaala le nafsah.»
19 Wa wakit Dawuud chaaf masaaʼiilah gaaʼidiin yiwaswusu ambeenaathum, hu irif kadar al-wileed da maat. Wa hu saʼalaahum wa gaal : «Al-wileed da maat walla ?» Wa humman raddo leyah wa gaalo : «Aywa siidna, hu maat.»
20 Wa khalaas, Dawuud gamma min al-turaab albarrad wa alʼattar wa khayyar khulgaanah wa macha fi beet Allah wa sajad. Wa baʼad gabbal beetah, hu saʼal yantuuh akil. Wa hu akal. 21 Wa masaaʼiilah gaalo leyah : «Da chunu al-gaaʼid tisawwiih da ? Wakit al-wileed lissaaʼ hayy, inta sumt wa bakeet. Wa hassaʼ wakit al-wileed maat, inta tugumm wa taakul.» 22 Wa Dawuud radda leehum wa gaal : «Wakit al-wileed lissaaʼ hayy, ana sumt wa bakeet achaan gult akuun Allah yihinn foogi wa l-wileed yiʼiich. 23 Wa laakin hassaʼ hu maat. Wa maala battaan nusuum ? Ana ma nagdar nigawwimah. Ana bas namchi nalhagah laakin hu abadan ma yaji leyi.»
Waaluudit Suleymaan
24 Wa Dawuud sabbar martah Batchaabaʼ. Wa ragad maʼaaha wa hi bigat khalbaane wa baʼad da, wildat wileed wa hi sammatah Suleymaan. Wa Allah habbaah 25 wa gaalah le Dawuud be waasitat al-nabi Naataan. Wa fi chaan da, al-wileed sammooh Yadiidya (maʼanaatah mahbuub Allah). Wa da misil Allah gaalah.
Cheeliin madiinat Rabba
26 Wa fi l-wakit da, Yuwaab khaayid al-deech macha hajam Rabba aasimat Bani Ammuun wa chaal aasimat al-mamlaka. 27 Wa Yuwaab rassal naas le Dawuud wa gaal : «Guulu le Dawuud ke : ‹Ana hajamt aasimat Rabba wa chilt minha al-bakaan al-indah almi. 28 Hassaʼ da, ajala limm al-naas al-faddalo wa taʼaal hawwig al-madiina di wa chiilha inta zaatak. Achaan kan ana bas nichiilha, yinaaduuha be usmi.›»
29 Wa khalaas, Dawuud lamma kulla naasah wa gamma macha Rabba wa hajamha wa chaalha. 30 Wa chaal al-taaj min raas Muulak sanam Bani Ammuun. Wa l-taaj da hana dahab wa yawzin gariib 34 kiilo wa mujammal be hajar khaali. Wa khattooh fi raas Dawuud. Wa chaalo khaniime katiire min al-madiina di. 31 Wa Dawuud chaal naas al-madiina di wa khaddamaahum be gu khidme al-yisawwuuha be munchaar wa khaazuug hana hadiid wa faas. Wa asaraahum fi salliliin al-diringeel kula. Wa hu sawwa misil da fi kulla hillaal Bani Ammuun. Wa baʼad da, Dawuud wa kulla l-naas gabbalo fi Uruchaliim.
© Arabe tchadien (alphabet latin) Bible © Alliance Biblique du Tchad, 2019.
