Azzakkar al-Rabb
1 Fi wakit chabaabak, azzakkarah,
hu al-khalagaak.
Azzakkarah gabul ayyaam al-diige
ma yajuuk
wa gabul ma yajuuk al-siniin
al-fooghum inta tuguul :
«Hayaati ma indaha taʼam.»
2 Azzakkarah gabul ma yidallumu
al-harraay wa l-nuur
wa l-gamar wa l-nujuum kula
wa gabul al-sahaab ma yigabbil
baʼad al-matar.
3 Azzakkarah gabul al-haaris ma yarjif min al-khoof
wa rujaal al-fahaliin ma yidanguru
wa gabul awiin al-rahhaakaat al-ma katiiraat yiwaggifan al-rahiik
wa l-yichiifan be chabaabiik ma yiwaddiran jamaalhin.
4 Azzakkarah gabul biibaan al-chawaariʼ abdalfiteen ma yinsaddo
wa harakat al-murhaaka ma tinsamiʼ
wa gabul ma tugumm wakit al-tuyuur yikhannu
wa yaʼayan kulla l-khannaayaat.
5 Azzakkarah gabul ma takhaaf min al-aali
wa min ruʼub al-derib
wa gabul chadarat al-looz ma tinawwir
wa l-jaraad ma yisiir be tagala
wa gabul al-chadara al-tiziid al-chahwa ma tafchul
wa l-insaan ma yamchi le beetah al-abadi
wa l-nawwaahaat ma yamchan fi l-chaariʼ.
6 Azzakkarah gabul al-haya ma tingatiʼ misil habil al-fudda
wa kharraaf al-dahab ma yingadda
wa gabul al-jarr ma yilkassar fi l-hoot
wa l-jurra ma tinkasir wa tagaʼ fi l-biir.
7 Azzakkarah gabul al-insaan ma yigabbil
fi l-turaab al-khalagooh minnah
wa gabul al-ruuh ma tigabbil
le l-Rabb al-khalagha.
8 Al-Muʼallim gaal :
«Al-haya zaayle ! Zaayle saakit !
Kulla cheyy zaayil !»
Kalaam al-akhiir hana l-Muʼallim
9 Al-Muʼallim ma hakiim bas,
hu battaan allam al-maʼrafa le l-chaʼab.
Hu kachaf be maʼrafa wa wazan
wa nazzam adad kabiir hana amsaal.
10 Al-Muʼallim fattach
le yalga kalaam al-yaʼajib.
Wa katab kalaam da adiil
wa da kalaam al-hagg.
11 Kalaam al-hakiimiin misil asa
al-yusuugu beeha al-bahaayim.
Wa muʼallifiin al-kutub gawiyiin misil masaamiir
al-yutugguuhum wa yasbutu.
Wa di hadiiye al-jaaye min raaʼi waahid.
12 Wa l-faddal min al-kalaam da,
khalli yabga leek daris, ya wileedi.
Kitaabit al-kutub ma tikammil
wa katarat al-giraay tiʼayyi al-jisim.
13 Wa fi l-akhiir,
daahu nihaayat al-kalaam ansamaʼat.
Akhaaf min al-Rabb
wa ahfad wasiiyaatah
achaan da l-waajib le ayyi insaan.
14 Achaan al-Rabb yihaasib kulla amal al-insaan
hatta kan mulabbad kula,
kan zeen walla fasil.
© Arabe tchadien (alphabet latin) Bible © Alliance Biblique du Tchad, 2019.
