Masal al-wariis
1 Walla be kalaam aakhar, kan wileed waras maal katiir wa hu lissaaʼ ma aagil, hu misil abid bas. 2 Waajib yitaabiʼ kalaam al-masaaʼiil al-gaaʼidiin yirabbuuh wa l-muwakkaliin be maalah lahaddi l-wakit al-abuuh haddadah leyah fi l-wasiiye. 3 Wa awwal bigi misil da leena aniina al-muʼminiin. Awwal aniina misil al-naas al-ma aagliin wa aaychiin misil al-abiid tihit churuut wa aadaat al-dunya.
4 Laakin al-wakit tamma khalaas wa Allah rassal Ibnah fi l-dunya. Hu mawluud min mara wa rabbooh tihit churuut al-Tawraat 5 achaan yafda al-naas al-gaaʼidiin tihit churuut al-Tawraat. Wa khalaas, ligiina beyah al-huguug al-waajib le iyaal Allah. 6 Le yiʼakkid kadar intu kula bigiitu iyaalah, Allah nazzal fi guluubna kullina Ruuh hana Ibnah al-yasrakh : «Abba, abuuna !» 7 Wa khalaas, inta ma abid misil awwal. Bigiit wileed Allah wa kan inta wileedah, Allah jaʼalaak wariisah.
8 Fi l-wakit al-faat, ma iriftu Allah wa intu abiid le l-ilaahaat al-ma ilaahaat be l-sahiih. 9 Laakin hassaʼ dakhaltu fi alaakha maʼa Allah, walla akheer nuguul Allah dakhkhalaaku fi alaakha maʼaayah. Wa kan ke da, maala tidooru tigabbulu titaabuʼu battaan churuut wa aadaat al-dunya al-ma induhum gudra wa la faayde ? Maala tidooru tabgo battaan abiid ? 10 Haay ! Intu gaaʼidiin tukhuttu fikirku fi ayyaam al-aʼyaad wa l-chuhuur wa l-awkaat wa l-siniin ! 11 Haalitku di khawwafatni bilheen achaan akuun al-taʼab al-ana tiʼibtah foogku macha fi riih saakit.
12 Ya akhwaani, awwal ana bigiit misilku intu al-ma Yahuud. Hassaʼ nachhadku, abgo misli ana. Awwal ma sawweetu leyi cheyy fasil. 13 Taʼarfu adiil kadar ana bigiit mardaan wa da antaani fursa le nibachchir leeku al-Injiil awwal marra. 14 Wa taʼabi da bigi leeku gaasi laakin be da kula, intu ma hagartuuni wa la taradtuuni. La, intu dayyaftuuni misil ana malak Allah walla misil ana al-Masiih Isa zaatah. 15 Ween al-farha al-awwal induku ? Nachhad leeku kadar fi l-wakit daak, kan induku gudra achaan tamurgu uyuunku, tawwaali tamurguuhum tantuuhum leyi. 16 Wa hassaʼ da, ana bigiit aduuku achaan ooreetku al-hagg walla ?
17 Al-naas al-yidooru yijiibuuku fi deribhum dool yakhdumu ambeenaatku be niiye waahide laakin niiyithum ma adiile. Yidooru yifaaruguuku minni. Wa yidooru intu titaabuʼuuhum humman bas be niiye waahide. 18 Wa kan niiyitku chadiide, da sameh kan al-sabab sameh. Wa da sameh kan niiyitku chadiide daayman wa ma wakit ana maʼaaku bas. 19 Ya iyaali al-nihibbuku, ana bigiit misil ammuku al-gaaʼide naldaaku marra taaniye. Ana gaaʼid natʼab fi l-talaga lahaddi tabgo saabtiin fi l-Masiih. 20 Nitmanna kadar nagdar nukuun maʼaaku wa nihajji leeku be kalaam baarid. Laakin ana baʼiid minku wa ma naʼarif al-cheyy al-nisawwi leeku.
Masal fi Haajar wa Saara
21 Intu al-tidooru titaabuʼu churuut al-Tawraat, ooruuni cheyy waahid. Intu ma simiʼtu al-kalaam al-maktuub fi l-Tawraat walla ? 22 Al-Kitaab buguul Ibraahiim indah awlaad itneen. Al-waahid hu wileed Haajar al-khaadim wa l-aakhar hu wileed Saara al-hurra. 23 Wileed al-khaadim da, wildooh be l-waaluuda al-aadiiye. Wa laakin al-wileed al-aakhar, waaluudtah bigat hasab waʼad Allah.
24 Wa l-kalaam da masal leena. Al-awiin al-itneen deel yiwassufuuna muʼaahadaat itneen been Allah wa l-naas. Al-awwalaaniiye hi misil al-muʼaahada al-Allah sawwaaha fi jabal Siinaaʼ. Wa hi talda naas fi l-ubuudiiye. Wa di misil Haajar al-khaadim. 25 Haajar wa jabal Siinaaʼ al-fi daar al-Arab yiwassufuuna Madiinat al-Khudus, aasimat al-Yahuud al-gaaʼide fi l-dunya. Achaan al-madiina wa naasha gaaʼidiin fi l-ubuudiiye tihit churuut al-Tawraat. 26 Laakin Madiinat al-Khudus al-gaaʼide foog maʼa Allah, hi hurra wa hi bas ammina. 27 Wa maktuub fi l-Kitaab :
<Zakhriti, al-mara al-aagre,
inti al-ma wilidti !
Iiti be farah wa zakhriti,
inti al-ma dukhti wajaʼ al-talaga !
Achaan iyaal al-mutallaga yabgo katiiriin
min iyaal al-mara al-gaaʼide maʼa raajilha.>
28 Wa khalaas ya akhwaani, intu bigiitu iyaal Allah be waʼad Allah misil Ishaakh. 29 Laakin fi zaman Ibraahiim, al-wileed al-wildooh be l-waaluuda al-aadiiye gamma yitaʼʼib al-wileed al-wildooh be gudrat al-Ruuh al-Khudduus. Wa bigi misil da fi zamanna kula.
30 Laakin al-Kitaab buguul chunu ? Buguul : <Atrud al-khaadim maʼa wileedha. Achaan wileed al-khaadim di ma yawris maʼa wileed al-hurra.> 31 Wa be misil da, ya akhwaani, aniina ma iyaal al-khaadim. Laakin aniina iyaal al-hurra.
© Arabe tchadien (alphabet latin) Bible © Alliance Biblique du Tchad, 2019.
