Ibraahiim wa Abiimalik
1 Wa baʼad da, Ibraahiim macha fi saharat Nagab wa sakan ambeen Khaadich wa Chuur. Wa macha gaʼad fi hille waahide usumha Garaar. 2 Wa fi l-wakit daak, Ibraahiim gaaʼid yuguul kadar Saara martah di, hi akhtah. Wa Abiimalik malik hana Garaar chaalaaha le Saara achaan tabga leyah mara. 3 Wa laakin be l-leel, al-Rabb baan le Abiimalik fi ruʼya wa gaal leyah : «Inta tumuut fi chaan al-mara al-chiltaha di. Achaan hi indaha raajil.»
4 Wa Abiimalik lissaaʼ ma ragad maʼaaha. Radda le Allah wa gaal : «Ya Rabb, hal tidammir umma bariiye kan hi ma sawwat cheyy walla ? 5 Achaan Ibraahiim zaatah gaal leyi hi akhtah wa hi kula gaalat leyi hu akhuuha. Wa ana sawweet al-cheyy da be niiye mukhlisa wa bari min kulla l-fasaala.» 6 Wa l-Rabb gaal leyah fi l-ruʼya : «Naʼarfak inta sawweetah be niiye mukhlisa wa ana dahartak ma tisawwi zanib. Wa fi chaan da bas, ana ma khalleetak talmasha. 7 Wa hassaʼ gabbil al-mara di le raajilha achaan hu nabi wa hu yasʼalni ana Allah achaan ma tumuut. Laakin kan ma gabbaltaha kamaan, aʼarif kadar inta wa kulla chaʼabak tumuutu.»
8 Wa be fajur badri, Abiimalik gamma naada kulla masaaʼiilah wa hajja leehum be kulla cheyy al-kaan. Wa humman khaafo khoof chadiid. 9 Wa khalaas, Abiimalik naada Ibraahiim wa gaal leyah : «Da chunu al-sawweetah leena da ? Wa chunu al-zanib al-ana sawweetah leek lahaddi tijiib leena masiibe kabiire misil di, leyi ana wa le mamlakati ? Fiʼilak al-sawweetah leena da, ma adiil.»
10 Wa Abiimalik gaal battaan le Ibraahiim : «Chunu al-lazzaak tisawwi al-cheyy da ?» 11 Wa Ibraahiim radda leyah wa gaal : «Ana nahsib naas al-balad di ma yakhaafo al-Rabb wa yugummu yaktuluuni fi chaan marti. 12 Wa kan fi l-sahiih da, hi akhti, bineeyit abuuyi laakin ma bitt ammi. Wa hi bigat marti. 13 Wa wakit al-Rabb maragaani baʼiid min beet abuuyi da, ana gult le Saara : ‹Fi ayyi bakaan al-namchu guuli inti akhti wa da l-kheer al-inti tisawwiih leyi.›»
14 Wa khalaas, Abiimalik anta Ibraahiim khanam wa bagar wa abiid wa khadiim wa gabbal leyah martah Saara kula. 15 Wa gaal le Ibraahiim : «Baladi gaaʼide giddaamak. Chiif al-bakaan al-ajabaak wa askun foogah.» 16 Wa gaal le Saara : «Nanti le akhuuki 1 000 hajar fudda. Wa l-gurus al-katiir da yiwassif le kulla l-naas al-maʼaaki kadar inti bariiye.»
17-18 Achaan be sabab marit Ibraahiim, Allah dahar al-waaluuda le kulla l-awiin al-fi beet Abiimalik. Wa Ibraahiim saʼal Allah al-Rabb wa baʼad da, al-Rabb chafa Abiimalik wa martah wa khaddaamaatah wa gidro wildo.
© Arabe tchadien (alphabet latin) Bible © Alliance Biblique du Tchad, 2019.
