Al-dakhuul fi raahat Allah
1 Waʼad Allah al-bukhuss al-dakhuul fi raahtah lissaaʼ gaaʼid. Angarʼu ! Khalli ayyi naadum minku yadkhul fi l-raaha di bala fachal. 2 Aniina simiʼna al-bichaara misil awwal humman kula simʼooha. Laakin al-kalaam al-humman simʼooh ma jaab leehum faayde achaan al-naas al-simʼooh ma khiblooh be iimaan. 3 Wa aniina al-aamanna bas nadkhulu fi l-raaha al-Allah hajja beeha di wa gaal : <Fi zaʼali, ana halaft wa gult abadan ma yadkhulu fi raahti.> Wa naʼarfu raahtah gaaʼide achaan amalah kammal min hu kawwan al-dunya. 4 Achaan al-Kitaab kallam fi bakaan waahid be l-yoom al-saabiʼ wa gaal : <Allah kammal khidimtah wa fi l-yoom al-saabiʼ, hu wagaf min kulla khidimtah.> 5 Wa battaan, Allah hajja be raahtah wakit hu gaal : <Ma yadkhulu fi raahti.>
6 Wa khalaas, fi niiyit Allah, fi naas yadkhulu fi raahtah. Wa laakin al-naas al-awwal simʼo bichaarat Allah ma dakhalo fi l-raaha di be sabab isyaanhum. 7 Wa battaan, Allah gataʼ le l-naas yoom waahid wa sammaah «al-yoom.» Wa baʼad siniin katiiriin, hu hajja fi kalaam Dawuud al-gaaʼid fi l-Kitaab al-aniina kallamnaah khalaas wa l-kalaam da buguul : <Al-yoom, kan simiʼtu hiss Allah, ma tigawwu ruuseeku.>
8 Achaan kan awwal Yachuuʼ gidir wadda al-chaʼab fi l-raaha khalaas, Allah ma yihajji battaan be yoom aakhar. 9 Wa be da, naʼarfu kadar raaha aakhara misil raahat yoom al-sabt tifaddil le chaʼab Allah. 10 Wa l-naadum al-yadkhul fi raahat Allah yagiif min khidimtah misil Allah wagaf min khidimtah.
11 Wa khalaas, khalli nijaahudu le nadkhulu fi l-raaha di, achaan naadum minnina ma yiwaddir be sabab al-isyaan misil juduudna. 12 Kalaam Allah hayy wa gaadir wa tariin ziyaada min al-seef al-mutarrag min jaay wa jaay. Hu yagtaʼ daakhal fi l-naadum marra waahid lahaddi yalhag al-bakaan al-foogah al-nafas wa l-ruuh, wa l-udaam wa l-muchaach. Kalaam Allah yimayyiz al-afkaar wa l-niiye fi galib al-insaan. 13 Wa ma fi cheyy fi kulla l-khaliige al-mulabbad le Allah. Kulla cheyy makchuuf wa waadih giddaamah hu bas. Wa waajib leena aniina kullina naju be aʼmaalna achaan hu yihaasibna.
Isa kabiir rujaal al-diin
14 Taʼarfu kadar aniina indina raajil diin kabiir wa hu aziim wa talaʼ foog fi l-samaawaat wa hu Isa Ibn Allah. Wa achaan da, khalli nakurbu gawi iimaanna be Isa al-nachhado leyah. 15 Raajil al-diin hanaana da yaʼarif duʼufna achaan hu kula, jarrabooh be kulla l-tajriba misilna laakin hu abadan ma sawwa zanib. 16 Wa khalaas, khalliina nigarrubu le Allah al-Rahiim be amaan achaan hu yarhamna. Wa nalgo minnah al-niʼma al-tisaaʼidna wakit nihtaajo leeha.
© Arabe tchadien (alphabet latin) Bible © Alliance Biblique du Tchad, 2019.
