1 Achaan da, ayyi raajil diin kabiir yaʼazuluuh min al-naas achaan yakhdim le l-naas giddaam Allah wa yigaddim leyah dahaaya chig chig le zunuubhum. 2 Wa hu yaʼarif kikkeef yihajji be nafas baarid le l-naas al-juhhaal wa le l-naas al-muwaddiriin achaan hu kula insaan muʼarrad le l-duʼuf. 3 Achaan da, laabudda hu yigaddim le Allah dahiiye le zunuubah hu wa le zunuub al-chaʼab kula.
4 Wa naadum ma yidarrij nafsah le l-khidme al-mucharrafa hint rujaal al-diin. Allah bas yinaadiih leeha misil zamaan hu naada leeha Haaruun. 5 Wa l-Masiih kula ma darraj nafsah achaan yisawwi nafsah raajil diin kabiir, laakin al-darrajah hu Allah al-gaal leyah : <Inta ibni wa l-yoom, ana bigiit abuuk.> 6 Wa fi bakaan waahid fi l-Kitaab, hu gaal : <Inta bigiit raajil diin daayim misil Malkisaadikh.>
7 Wakit Isa gaaʼid fi l-dunya, hu naada Allah al-yagdar yinajjiih min al-moot wa saʼalah be hiss aali wa dumuuʼ. Wa Allah khibil suʼaalah achaan hu takhi. 8 Sahiih, Isa hu Ibn Allah laakin hu allam kikkeef yitaabiʼ kalaam abuuh be l-taʼab al-tiʼibah. 9 Wa khalaas, hu bigi al-munajji al-kaamil wa bigi derib al-naja al-abadiiye le kulla l-naas al-yitaabuʼu kalaamah. 10 Wa Allah jaʼalah raajil diin kabiir misil Malkisaadikh.
Al-sakhiir fi l-iimaan wa l-aagil
11 Indina kalaam katiir nidooru nuguuluuh leeku fi l-taʼliim da laakin tafsiirah leeku gaasi achaan intu bigiitu mataamiis. 12 Intu al-tawwaltu fi l-derib, waajib tabgo muʼallimiin hana l-iimaan laakin be l-sahiih, intu hawjaaniin le duruus awwalaaniyiin hana kalaam Allah. Intu bigiitu misil al-sakhiir al-lissaaʼah hawjaan le laban ammah achaan hu ma jaahiz le l-akil. 13 Ayyi naadum al-aayich be l-laban lissaaʼ sakhiir wa ma yaʼarif derib al-saalihiin. 14 Wa l-taʼliim al-muhimm, hu misil al-laham wa hu waajib le l-naadum al-aagil fi l-iimaan al-darrasooh lahaddi yaʼarif kikkeef yimayyiz al-kheer min al-charr.
© Arabe tchadien (alphabet latin) Bible © Alliance Biblique du Tchad, 2019.
