Al-chaʼab gaalo yigabbulu le Allah
1 «Taʼaalu nigabbulu le Allah
achaan hu bas al-jarahna
wa hu bas al-yachfiina.
Hu bas al-darabaana
wa hu bas al-yidaawi uwaarna.
2 Baʼad yoomeen,
hu yantiina al-haya.
Aywa, fi l-yoom al-taalit,
yigawwimna wa niʼiichu giddaamah.
3 Khalli nitaabuʼu Allah le naʼarfuuh.
Jaytah muʼakkada misil nuur al-sabaah
wa hu yajiina misil matar,
misil matar al-richaach al-yazgi al-ard.»
Allah yiriid al-mahabba min al-dahaaya
4 «Ya naas gabiilat Afraayim,
nisawwi leeku chunu ?
Ya Bani Yahuuza,
nisawwi leeku chunu ?
Mahabbitku misil sahaab al-fajur al-yufuut
wa misil karany al-sabaah al-ma yitawwil.
5 Achaan da, ana darabtuku be l-anbiya
wa kataltuku be kalaami
wa nuur chariiʼti nawwarku
misil nuur al-sabaah.
6 Wa mahabbitku nidoorha
ziyaada min al-dahaaya.
Wa kan taʼarfuuni, da akheer leyi
min al-dahaaya al-muharragiin.
7 «Nagado al-muʼaahada fi hillit Adam
achaan fi l-bakaan da, khaanooni.
8 Wa Gilʼaad hillit al-fasliin
mulattakha be l-damm.
9 Wa majmuuʼat rujaal al-diin
bigo misil rabbaatiin al-duruub.
Yaktulu naas fi derib hillit Chakiim.
Aywa, gaaʼidiin yisawwu fiʼil cheen.
10 «Fi usut Bani Israaʼiil,
ana chift fadiihe.
Fi lubbuhum, naas Afraayim achcharmato
aywa, Bani Israaʼiil annajjaso.
11 Wa intu kula, ya Bani Yahuuza,
talgo ikhaabi misil intaaj ziraaʼitku !»
Ikhaab al-chaʼab
«Wakit nigabbil chaʼabi min al-khurba
© Arabe tchadien (alphabet latin) Bible © Alliance Biblique du Tchad, 2019.
