Al-kalaam didd Muwaab
1 Muhaakamat Muwaab.
Fi leele waahide bas, hi addammarat !
Hillit Aar al-fi Muwaab bigat ma fiiha.
Aywa fi l-leele al-hi addammarat foogha,
hillit Khiir al-fi Muwaab kula bigat ma fiiha !
2 Wa chaʼabha gaaʼidiin yabku wa talaʼo
fi l-bakaanaat al-aaliyiin hana l-ibaada
al-fi hillit Habeet wa fi hillit Diibuun.
Naas Muwaab yunuuhu
le hillaal Nabu wa Miidba
wa kulla ruuseehum muzayyaniin
wa duguunhum magtuuʼiin min al-hizin.
3 Wa fi l-chawaariʼ,
laabsiin khulgaan al-hizin
wa fi ruuse al-buyuut wa l-nagaʼaat,
kulluhum yunuuhu wa yabku be hizin.
4 Wa naas Hachbuun wa Aliʼaala
gaaʼidiin yikooruku
wa hissuhum gaaʼid yinsamiʼ
lahaddi hillit Yahaas.
Wa fi chaan da, askar Muwaab yiʼiitu
wa laakin chajaaʼa ma induhum.
5 Galbi anjarah le naas Muwaab.
Al-muʼarridiin minha lihgo
lahaddi hillaal Suukhar wa Aglat Chaliicha.
Wa gaaʼidiin yatlaʼo fi gooz Luhiit be baki
wa yasrakho siraakh chadiid fi derib Hurunaayim.
6 Achaan almi rijil Nimriim chirib
wa l-gechch yibis.
Wa l-haya aba ma yugumm
wa l-khadaar bigi ma fiih.
7 Wa fi chaan da, humman chaalo khumaamhum al-faddal
wa waddooh khaadi le waadi al-Gana.
8 Wa korooraakhum ansamaʼ
fi kulla ard Muwaab
wa nuwaahhum macha
lahaddi hillit Aglaayim
wa wassal lahaddi biir Iliim.
9 Almi Diibuun malaan damm
wa Allah gaal :
«Ana ninazzil fi Diibuun
masaayib ziyaada.
Al-duud yaktul
al-muʼarridiin hana Muwaab
wa yaakul al-faddalo fi turaabha.»
© Arabe tchadien (alphabet latin) Bible © Alliance Biblique du Tchad, 2019.
