Allah kallaf al-nabi Ichaʼya
1 Wa fi sanit moot al-malik Uzziiya,
ana chift al-Rabb gaaʼid fi kursi
marfuuʼ foog marra waahid
wa daayir khalagah
mala al-beet al-mukhaddas.
2 Wa l-makhluugiin al-niiraaniyiin
waagfiin min foog leyah
wa ayyi waahid indah sitte janaahe.
Itneen yikhatti beehum wijhah
wa itneen yikhatti beehum rijileenah
wa itneen yitiir beehum.
3 Wa l-waahid yinaadi al-aakhar
wa yuguul :
«Khudduus ! Khudduus ! Khudduus !
Allah al-Gaadir !
Majdah yamla kulla l-ard.»
4 Wa l-biibaan anhazzo
min al-hiss al-gaaʼid yinaadi
wa l-beet al-mukhaddas
anmala be l-dukhkhaan.
5 Wa khalaas, ana gult :
«Al-azaab leyi ! Ana waddart !
Achaan ana naadum
khachmi ma taahir
wa saakin fi usut chaʼab
khuchuumhum ma taahiriin.
Wa uyuuni chaafo al-malik
wa hu Allah al-Gaadir !»
6 Wa waahid min al-makhluugiin
al-niiraaniyiin dool
chaal jamraay min al-madbah be kullaab
wa taar ja aleyi.
7 Wa hu limis khachmi beeha wa gaal :
«Min al-jamraay di limsat chalaaliifak,
aʼarif kadar khataak anmaha
wa zanbak angachcha.»
8 Wa ana simiʼt hiss al-Rabb gaal :
«Yaatu al-nirassilah ?
Wa yaatu al-yamchi leena ?»
Wa ana gult :
«Daahuuni ana ! Rassilni !»
9 Wa hu gaal :
«Amchi wa guul le l-chaʼab dool :
‹Tasmaʼo wa laakin ma tafhamo
wa tichiifu wa laakin ma taʼarfu.›
10 Gawwi guluub al-chaʼab dool
wa sidd udneehum
wa aʼami uyuunhum
achaan ma yichiifu
wa la yasmaʼo wa la yafhamo.
Wa be da, ma yutuubu
le yalgo al-chifa.»
11 Wa ana gult :
«Da le mata, ya Rabbi ?»
Wa hu gaal :
«Lahaddi kulla l-mudun yiddammaro
wa yabgo faadiyiin min sukkaanhum
wa l-buyuut yabgo bala naas
wa l-ard tiddammar wa takhrab.
12 Lahaddi ana Allah nibaʼʼid al-naas
wa l-balad tagood faadiye marra waahid.
13 Wa hatta kan faddalo uchur
min al-sukkaan kula,
battaan yahrago be naar.
Wa humman yabgo
misil chadar al-butum
aw al-balluut al-gataʼooh.
Yifaddil illa dumburah
laakin dumburah
yijiib zurriiye mukhaddasa.»
© Arabe tchadien (alphabet latin) Bible © Alliance Biblique du Tchad, 2019.
