Bani Rikaab karramo amur jidduhum
1 Wa fi ayyaam hukum Yahuuyakhim wileed Yuuchiiya malik Yahuuza, Allah hajja leyi ana Irmiya wa gaal : 2 «Amchi le Bani Rikaab wa hajji leehum. Waddiihum fi beeti ana Allah wa dissuhum fi khurfa wa antiihum khamar yacharbo.»
3 Khalaas, ana Irmiya macheet fattacht Yaazanya wileed Irmiya wileed Habasinya wa akhwaanah wa kulla iyaalah wa kulla Bani Rikaab. 4 Wa ana waddeethum fi beet Allah fi khurfit talaamiiz Hanaan abd Allah wileed Yigdalya wa da jamb khurfit al-kubaaraat wa foog le khurfit Maʼasiiya wileed Challuum haaris madkhal beet Allah. 5 Wa ana khatteet giddaam naas Bani Rikaab mawaaʼiin malaaniin be khamar wa kiisaan wa gult leehum : «Acharbo khamar !»
6 Wa laakin humman raddo leyi wa gaalo : «Aniina ma nacharbo khamar achaan jiddina Yunadaab wileed Rikaab antaana amur. Wa l-amur da buguul : ‹Abadan ma tacharbo khamar wa la intu wa la zurriiyitku. 7 Wa ma tabnu buyuut wa la tisawwu ziraaʼa wa la timaggunu jineenaat inab wa la tamulku cheyy minha. Wa laakin askunu fi khiyam fi kulla muddit hayaatku wa be da, umurku yabga tawiil fi l-ard al-intu tanzulu foogha.› 8 Wa aniina nikarrumu kulla amur Yunadaab wileed Rikaab jiddina. Abadan ma chiribna khamar fi kulla muddit hayaatna wa la aniina wa la awiinna wa la awlaadna wa la banaatna. 9 Wa ma baneena buyuut le naskunu fooghum wa ma indina wa la jineenaat inab wa la ziraaʼa wa la ard mazruuʼa 10 wa sakanna fi khiyam. Karramna amur Yunadaab jiddina wa sawweena sawa sawa misil hu amaraana beyah. 11 Wa illa wakit Nabuukhadnasar malik Baabil gamma hajam al-balad di, aniina gulna nisiiru niʼarrudu min deech al-Baabiliyiin wa deech Araam wa naju wa nanzulu hini fi Madiinat al-Khudus. Wa da bas al-sabab al-jaabaana wa sakkanaana fi Madiinat al-Khudus.»
12 Wa khalaas, Allah hajja le Irmiya. 13 Daahu Allah al-Gaadir Ilaah Bani Israaʼiil gaal : «Amchi le Bani Yahuuza wa sukkaan Madiinat al-Khudus wa guul : ‹Maala intu ma khassadtu be adabi wa la simiʼtu kalaami ? Wa da kalaam Allah. 14 Chiifu daahu al-naas dool simʼo amur jidduhum Yunadaab wileed Rikaab. Hu amar zurriiytah ma yacharbo khamar. Wa khalaas, humman ma chirbooh lahaddi l-yoom da wa karramo amur jidduhum. Wa ana Allah kamaan hajjeet leeku daayman wa intu abadan ma simiʼtuuni. 15 Wa daayman ana rassalt leeku abiidi al-anbiya wa da le yuguulu leeku : “Khalli ayyi waahid yigabbil min derbah al-fasil wa yisallih amalah. Wa ma titaabuʼu ilaahaat aakhariin wa taʼabuduuhum wa be da, taskunu fi l-ard al-ana anteetha le juduudku wa leeku intu.” Wa laakin be da kula, intu ma khatteetu adaanku leyi ana Allah le tasmaʼooni. 16 Ajab ! Zurriiyit Yunadaab wileed Rikaab simʼo amur jidduhum al-amaraahum beyah. Wa laakin intu al-chaʼab dool abeetu ma tasmaʼooni.›»
17 Wa fi chaan da, daahu Allah al-Ilaah al-Gaadir Ilaah Bani Israaʼiil gaal : «Akiid ana nijiib foogku intu Bani Yahuuza wa fi kulla sukkaan Madiinat al-Khudus kulla l-fasaala al-ana kharrartaha didduku. Achaan ana kallamt leeku wa intu ma simiʼtuuni wa naadeetku wa ma raddeetu leyi.»
18 Wa baʼad da, Irmiya gaal le Bani Rikaab : «Daahu Allah al-Gaadir Ilaah Bani Israaʼiil gaal : ‹Intu simiʼtu amur Yunadaab jidduku wa tabbagtu kulla kalaamah sawa sawa misil hu amaraaku beyah.› 19 Wa fi chaan da, daahu Allah al-Gaadir Ilaah Bani Israaʼiil gaal : ‹Daayman yukuun naadum min zurriiyit Yunadaab wileed Rikaab ambeen khaddaamiini.›»
© Arabe tchadien (alphabet latin) Bible © Alliance Biblique du Tchad, 2019.
