Moot Laʼaazar
1 Wa fiyah naadum waahid mardaan. Usmah Laʼaazar wa hu saakin fi hillit Beet Anya wa di hille hana Mariyam wa akhutha Marsa. 2 Wa Mariyam di, hi al-mara al-masahat al-Rabb Isa be itir wa gachchat rijileenah be chaʼarha. Wa akhuuha Laʼaazar mardaan. 3 Achaan da, al-akhwaat rassalan le Isa wa gaalan : «Ya sayyidna, al-naadum al-tihibbah mardaan.» 4 Wa Isa simiʼ al-kalaam da wa gaal : «Al-marad da ma yikammil be l-moot laakin be sababah al-naas yimajjudu Allah. Wa be sababah Ibn Allah kula yimajjuduuh.»
5 Wa Marsa wa akhutha Mariyam wa akhuuhum Laʼaazar humman rufgaan Isa wa hu yihibbuhum. 6 Wa min Isa simiʼ khabar hana marad Laʼaazar, hu gaʼad battaan yoomeen fi l-bakaan al-hu gaaʼid foogah. 7 Wa baʼad al-yoomeen dool, hu hajja le talaamiizah wa gaal : «Namchu nigabbulu fi daar al-Yahuudiiya.» 8 Wa talaamiizah raddo leyah wa gaalo : «Sayyidna, awwal al-Yahuud dawwaro yarjumuuk. Wa battaan tidoor tigabbil fi bakaanhum walla ?» 9 Wa Isa gaal leehum : «Al-nahaar ma indah 12 saaʼa walla ? Kan naadum raayikh fi l-nahaar, hu ma yagaʼ achaan deyy hana l-dunya gaaʼid wa hu yichiif beyah. 10 Wa laakin kan naadum raayikh fi l-leel, hu yagaʼ achaan ma indah deyy.»
11 Wa hu radda leehum be l-kalaam da wa battaan hajja leehum wa gaal : «Rafiigna Laʼaazar naam khalaas laakin namchi leyah nigawwimah.» 12 Wa talaamiizah gaalo : «Sayyidna, kan hu naayim, da sameh. Hu yalga al-aafe.» 13 Wa fi fikir al-talaamiiz, Isa hajja leehum be l-noom bas laakin Isa hajja be l-moot. 14 Wa khalaas, Isa ooraahum be kalaam waadih wa gaal : «Laʼaazar maat. 15 Ana ma kunt hinaak. Wa ana farhaan fi chaanku achaan be misil da, tiʼaamunu beyi. Khalaas, gummu namchu leyah.»
16 Wa Tuuma al-yinaaduuh Chigg al-Toom hajja le l-talaamiiz wa gaal : «Khalaas, namchu maʼaayah wa numuutu maʼaayah.»
Al-Masiih gawwam Laʼaazar
17 Wa wakit Isa wisil fi hillit Beet Anya, oorooh Laʼaazar gaaʼid fi l-khabur min muddit arbaʼa yoom. 18 Wa l-hille gaaʼide misil talaata kiilomitir bas min Madiinat al-Khudus. 19 Wa Yahuud katiiriin jo min al-madiina le yikalwudu le Marsa wa Mariyam fi akhuuhin.
20 Wa wakit Marsa simʼat Isa jaayi, hi gammat wa maragat achaan tilaagiih. Wa Mariyam gaʼadat fi l-beet. 21 Wa Marsa gaalat leyah : «Sayyidna, kan awwal inta haadir, akhuuyi ma yumuut. 22 Laakin hassaʼ kula naʼarif kadar ayyi cheyy al-tasʼalah min Allah, hu yantiik.» 23 Wa Isa gaal leeha : «Akhuuki yugumm.»
24 Wa Marsa gaalat leyah : «Naʼarif kadar hu yabʼas maʼa l-maytiin fi l-buʼaas al-yabga fi yoom al-akhiir.» 25 Wa Isa gaal leeha : «Ana al-buʼaas wa l-haya. Ayyi naadum muʼmin beyi, kan yumuut kula, hu yahya. 26 Wa ayyi naadum al-aayich muʼmin beyi, abadan ma yumuut. Kalaami da, inti muʼmine beyah walla ?» 27 Wa hi gaalat leyah : «Aywa, sayyidna, ana muʼmine beek. Inta al-Masiih Ibn Allah. Inta hu al-laabudda yaji fi l-dunya.»
28 Wa hi gaalat al-kalaam da wa gammat machat le akhutha Mariyam wa hajjat leeha be hiss tihit wa gaalat : «Al-muʼallim ja wa gaaʼid yinaadiiki.» 29 Wakit Mariyam simʼat kalaamha, hi gammat ajala wa machat leyah.
30 Wa Isa lissaaʼ ma dakhal fi l-hille wa gaaʼid fi l-bakaan al-Marsa laagatah foogah. 31 Wa wakit al-Yahuud al-gaaʼidiin maʼa Mariyam fi l-beet chaafooha gammat maragat ajala, humman taabaʼooha. Fi fikirhum, hi tidoor tamchi le l-khabur achaan tabki hinaak. 32 Wa Mariyam jaat fi l-bakaan al-Isa gaaʼid foogah wa wakit chaafatah, hi wagaʼat giddaamah wa gaalat : «Sayyidna, kan awwal inta haadir, akhuuyi ma yumuut.»
33 Wa wakit Isa chaaf dumuuʼha wa dumuuʼ al-Yahuud al-maʼaaha, hu hizin marra waahid wa barjal. 34 Wa saʼalaahum wa gaal : «Ween al-bakaan al-dafanooh foogah ?» Wa raddo leyah wa gaalo : «Taʼaal sayyidna, chiif.» 35 Wa Isa baka. 36 Wa achaan da, al-Yahuud al-jo fi l-maytam gaalo : «Chiifuuh. Hu yihibbah le Laʼaazar bilheen.» 37 Wa laakin naas waahidiin gaalo : «Haay ! Da bas al-naadum al-fatah uyuun al-amyaan. Kikkeef ma gidir yadhar al-moot min al-naadum da ?»
38 Wa Isa hizin marra waahid battaan wa ja le l-khabur. Wa l-khabur hu karkuur wa saddooh be hajar kabiir. 39 Wa Isa gaal : «Lizzu al-hajar min khachum al-khabur.» Laakin Marsa akhut al-marhuum gaalat : «Sayyidna, hu mayyit min arbaʼa yoom wa akiid al-janaaza affanat.» 40 Wa Isa gaal leeha : «Ana ma ooreetki walla ? Kan tiʼaamini, tichiifi gudrat Allah al-majiide.»
41 Wa lazzo al-hajar. Wa Isa rafaʼ raasah wa gaal : «Abuuyi, nachkurak achaan inta simiʼt hissi. 42 Ana irift inta daayman tasmaʼ hissi wa laakin gult al-kalaam da achaan al-naas al-haadiriin yiʼaamunu kadar inta bas rassaltini.» 43 Wa wakit hu gaal al-kalaam da khalaas, hajja be hiss aali wa gaal : «Ya Laʼaazar, amrug !» 44 Wa l-mayyit marag. Iideenah wa rijileenah malfuufiin be l-gabag al-kaffanooh beyah wa mindiil marbuut fi wijhah. Wa Isa amaraahum le l-naas wa gaal : «Fartugu minnah al-kafan wa khalluuh yamchi.»
45 Wa be misil da, naas katiiriin min al-Yahuud al-jo yikalwudu le Mariyam chaafo al-ajab al-Isa sawwaah wa aamano beyah.
Al-kubaaraat achchaawaro fi l-Masiih
46 Wa laakin waahidiin minhum macho le l-Fariiziyiin wa ooroohum be l-cheyy al-Isa sawwaah. 47 Wa achaan da, kubaaraat rujaal al-diin wa l-Fariiziyiin naado naas hana l-majlas al-kabiir yilimmu. Wa assaaʼalo ambeenaathum wa gaalo : «Nisawwu chunu ? Al-naadum da gaaʼid yisawwi ajaayib katiiriin. 48 Kan ma nadharooh min al-cheyy al-gaaʼid yisawwiih, kulla l-naas yiʼaamunu beyah wa l-Roomaaniyiin yaju wa yidammuru beetna al-mukhaddas wa yichattutu chaʼabna.»
49 Wa naadum waahid minhum usmah Gayaafa wa fi l-sana di, hu kabiir rujaal al-diin. Wa hu hajja leehum wa gaal : «Intu ma taʼarfu cheyy. 50 Ma fihimtu kadar akheer leeku kan naadum waahid yumuut le l-chaʼab wa be misil da, kulla l-umma ma tiwaddir.»
51 Wa kalaamah da ma jaay min nafsah. Hu kabiir rujaal al-diin fi l-sana di wa achaan da, hu atnabbaʼ wa gaal Isa yumuut le l-umma. 52 Wa da ma le ummat al-Yahuud wiheedha. Da yabga le kulla iyaal Allah al-muchattatiin le yilimmuuhum umma waahide.
53 Wa min al-yoom da, bado yichchaawaro ambeenaathum achaan yaktulu Isa. 54 Wa achaan da, hu waggaf ruwaakhtah fi ust al-Yahuud. Wa gamma min hinaak wa macha fi hille waahide jamb al-sahara al-usumha Afraayim wa gaʼad hinaak maʼa talaamiizah.
55 Wa iid al-Yahuud al-binaaduuh iid al-Fisha garrab. Wa naas katiiriin gammo min hillaalhum wa macho fi Madiinat al-Khudus achaan yitahhuru nufuushum gubbaal al-iid. 56 Wa l-naas dawwaro yichiifu Isa. Wa fi fadaayit beet Allah gaaʼidiin yissaaʼalo ambeenaathum wa yuguulu : «Fikirku chunu ? Hu yaji hini fi l-iid walla ?» 57 Wa kubaaraat rujaal al-diin wa l-Fariiziyiin amaroohum le l-naas wa gaalo leehum kan naadum yaʼarif al-bakaan al-Isa gaaʼid foogah, waajib yaji yiʼooriihum achaan yakurbuuh.
© Arabe tchadien (alphabet latin) Bible © Alliance Biblique du Tchad, 2019.
