Ayyuub yihajji be hizin galbah
1 Al-haya bakhkhadat leyi.
Ana ma nikhalli chakwiti
wa nihajji be hizni al-fi galbi.
2 Wa nuguul le Rabbi :
«Ma tajʼalni khaati !
Ooriini maala tahrijni ?
3 Hal adiil leek tazlumni ?
Maala taabaani ana khaliigtak
wa tinawwir khittat al-aasiyiin walla ?
4 Uyuunak misil uyuun al-makhluugiin walla ?
Wa tichiif misil Bani Adam walla ?
5 Hal ayyaamak misil ayyaam
Bani Adam walla ?
Wa siniinak misil siniin
al-insaan walla ?
6 Maala tifattich fi khataayi
wa tasʼal min zunuubi ?
7 Inta taʼarif kadar ana ma khaati
laakin ma fi naadum al-yinajjiini minnak.
8 Inta khalagtini
wa iideenak addalooni be l-kaamil
laakin hassaʼ tidoor tidammirni !
9 Min fadlak, azzakkar
inta khalagtini min al-tiine.
Laakin hassaʼ,
tidoor tigabbilni fi l-turaab walla ?
10 Inta sabbeetni misil laban
wa jammadtini misil jibna.
11 Inta baneetni be asab wa udaam
wa kaseetni be laham wa farwa.
12 Wa anteetni al-haya wa l-rahma
wa muraakhabatak hafadat ruuhi.»
Al-duud al-taarid
13 «Laakin daahu al-inta labbadtah fi galbak
wa ana irift al-fi fikrak.
14 Kan naznib, inta tichiifni
wa ma tajʼalni bari min khataayi.
15 Wa kan bigiit khaati,
al-azaab leyi !
Wa kan saalih,
ma nagdar narfaʼ raasi.
Ana chabʼaan min al-ihaana
wa mudayyig min al-taʼab.
16 Wa kan narfaʼ raasi,
titaaridni misil duud,
wa tadrubni battaan be gudurtak al-ajiibe.
17 Inta tijaddid hajamaatak diddi
wa tiziid khadabak foogi
wa duyuuch yaju yahjumuuni.
18 «Maala khalleetni
maragt min batun ammi ?
Kan awwal mutt,
ma fi een tichiifni.
19 Wa nabga ma fiini,
wa min batun ammi bas
yiwadduuni fi l-khabur.
20 Wa ayyaami katiiriin walla ?
Khalli yagiifu minni
wa be da, nagdar nafrah.
21 Wa da, gabul ma nigabbil
fi balad al-dalaam,
al-dalaam al-haalik.
22 Aywa, nigabbil fi balad zarga
misil al-dalaam
wa fi l-dalaam al-haalik
al-indah barjaal.
Wa fi l-bakaan da,
al-nuur misil al-dalaam.»
© Arabe tchadien (alphabet latin) Bible © Alliance Biblique du Tchad, 2019.
