Awwal kalaam Suufar
1 Wa Suufar al-min Naʼama chaal al-kalaam wa gaal :
2 Katarat al-kalaam di
ma talga radd walla ?
Wa l-naadum al-yaʼarif yihajji
yalga al-hagg walla ?
3 Wa kalaamak al-katiir da
yisakkit al-naas walla ?
Inta tichchammat
wa ma fi al-yikhajjilak walla ?
4 Inta gult : «Ilmi saafi
wa ana kula saafi giddaamak.»
5 Aywa ! Kan al-Rabb kallam
wa kan hu hajja leek
6 wa kan khabbarak be sirr hikmatah,
al-aglak ma yakhbalah.
Wa khalaas be da, inta taʼarif
al-Rabb khalla waahidiin min khataak.
7 Hal tagdar taʼarif asraar al-Rabb ?
Walla tagdar taʼarif kamaal al-Gaadir ?
8 Humman dool aaliyiin min al-sama,
inta tagdar tisawwi chunu ?
Humman khariigiin min al-khabur,
inta taʼarif chunu ?
9 Tuulhum ziyaada min al-ard
wa urduhum ziyaada min al-bahar.
10 Wa kan al-Rabb gamma yisidd naadum fi l-sijin
aw yinaadiih fi chariiʼtah,
yaatu yagdar yamnaʼah ?
11 Achaan hu yaʼarif al-kaddaabiin
wa yichiif al-fasaala,
wa ma yajʼalha walla ?
12 Achaan al-insaan al-fihimah misil al-mukhaffal,
hu misil wileed humaar al-kadaade.
13 Wa laakin inta, ya Ayyuub,
waajib tisabbit galbak
wa waajib timidd iideenak aleyah.
14 Wa kan fi charr fi iideenak,
azgulah baʼiid
wa khalli al-fasaala
ma taskun fi khiyamak.
15 Wa khalaas, inta tarfaʼ raasak bala eeb
wa tukuun saabit wa ma takhaaf.
16 Achaan inta tansa taʼabak
wa tichiifah misil almi al-jara wa faat.
17 Wa hayaatak tidawwi ziyaada
min nuur al-gaayle
wa l-dalaam yabga leek
misil nuur al-sabaah.
18 Wa inta tiʼakkid kadar indak acham
wa kan indak chakk kula,
tunuum be amaan.
19 Wakit tinjamma,
ma fi naadum yibachtinak
wa katiiriin yifattuchu ridaak.
20 Wa laakin uyuun al-aasiyiin yaʼayo
wa ma fi ayyi maljaʼ leehum
wa ma induhum acham illa l-moot bas.
© Arabe tchadien (alphabet latin) Bible © Alliance Biblique du Tchad, 2019.
