Hayaat al-aasi tintahi
1 Wa Bildad al-min Chuuha chaal al-kalaam wa gaal :
2 Mata tiwaggif kalaamak da ?
Fakkir wa baʼad da, aniina nihajju.
3 Maala tajʼalna misil bahaayim ?
Wa maala tichiifna aniina misil mukhaffaliin ?
4 Ya Ayyuub, inta gaaʼid tilfajjar
min al-zaʼal
wa laakin fi chaanak inta
al-ard yikhalluuha walla ?
Wa l-jibaal yilhawwalo
min bakaanhum walla ?
5 Aywa ! Hayaat al-aasi tintahi
misil al-nuur al-yumuut.
6 Aywa, al-nuur gaaʼid yidallim fi kheemtah
wa l-faanuus min foog leyah yumuut.
7 Wa khatwaatah al-ajiiliin yabgo tagiiliin
wa niiytah bas tidammirah.
8 Achaan rijileenah yarmuuh fi l-charak
wa yadkhulu fi guduudah.
9 Al-habil yakurbah min kaʼabah
wa l-charak yakurbah.
10 Wa l-habil al-yakurbah mulabbad fi l-turaab
wa amkajjaama gaaʼide fi derbah.
11 Wa l-ruʼub jaayi leyah min kulli jiihe
wa yitaabiʼah min wara.
12 Wa l-aasi, al-juuʼ kammal gudurtah
wa l-damaar gaaʼid jambah.
13 Al-marad yaakul farwitah
aywa, al-marad al-kaatil yaakul kulla jildah.
14 Yamurguuh min kheemtah
al-saakin foogah be amaan
wa yiwadduuh le malak al-moot.
15 Inta taskun fi kheemtah
al-hi battaan ma hintah
wa yitahhuru al-kheema be kibriit.
16 Hu misil chadara uruugha yijiffu min tihit
wa furuuʼha yaybaso min foog.
17 Fi l-balad, ma yizzakkaro al-aasi da
wa battaan al-naas ma yihajju be usmah.
18 Min al-nuur, yilizzuuh le l-dalaam
aywa, min al-aalam yamurguuh.
19 Hu wa la yikhalli iyaal
wa la iyaal fi usut chaʼabah
wa ma yifaddil naadum hayy fi maskanah.
20 Naas al-kharib
yilʼajjabo min damaarah
wa naas al-sabaah,
khoof chadiid yakrubhum.
21 Dool bas masaakin al-mujrim !
Aywa, da bas bakaan al-kaafir !
© Arabe tchadien (alphabet latin) Bible © Alliance Biblique du Tchad, 2019.
