Al-aasiyiin yiʼiichu fi l-halu
1 Wa Ayyuub chaal al-kalaam wa gaal :
2 Asmaʼo ! Asmaʼo kalaami !
Khalli da bas yukuun sabbiriinku leyi.
3 Khalluuni nihajji
wa baʼad hajjeet,
intu achchammato !
4 Wa ana, chakwiti didd insaan walla ?
Wa gaaʼid niwaddir sabri
bala sabab walla ?
5 Wajjuhu aleyi wa be da, intu tibarjulu
wa tukhuttu iideeku fi khuchuumku !
6 Wa wakit nifakkir fi l-cheyy al-foogi,
ninbahit wa jildi kulla yarjif.
7 Maala al-aasiyiin gaaʼidiin hayyiin ?
Wa maala yiʼiichu umur tawiil
al-yijaddid gudrithum ?
8 Yichiifu zurriiyithum
yasbutu hawaaleehum
aywa, iyaal iyaalhum
yakburu giddaamhum.
9 Fi bakaan al-aasiyiin,
ma fi khoof, illa l-salaam
wa asaat khadab al-Rabb
ma tadrubhum.
10 Tiiraanhum yiʼachchuru fi kulla wakit
wa bagarhum yaldo, abadan ma yatraho.
11 Humman yikhallu iyaalhum yajru misil al-humlaan
wa iyaalhum al-dugaag yinattutu.
12 Wa yikhannu maʼa hiss al-tambal wa l-jigindiiye
wa yafraho maʼa hiss al-suffaara.
13 Ayyaamhum yagdamo
wa yikammulu fi l-halu
wa humman yanzulu fi l-khabur
be raaha.
14 Wa laakin humman gaalo le l-Rabb :
«Baʼʼid minnina !
Aniina ma nidooru naʼarfu duruubak !
15 Al-Gaadir, hu yaatu
achaan naʼabuduuh ?
Wa kan nachhadooh,
yanfaʼna be chunu ?»
16 Wa be da kula,
kheerhum ma jaayi minhum.
Choorit al-aasiyiin di,
hi baʼiide minni.
17 Hal chiftu faanuus al-aasiyiin maat ?
Hal chiftu al-waba wagaʼ fooghum ?
Aw chiftu khadab al-Rabb dammar iyaalhum ?
18 Hal humman bigo misil tibin
al-chaayle al-riih
walla misil al-gechch al-chaayle
amzoobaʼaane ? Abadan !
Nihaayat al-aasiyiin al-hayne
19 Wa yuguulu al-Rabb yijahhiz
ikhaabah le iyaal al-aasi.
Laakin le l-aasi zaatah,
khalli al-Rabb yiʼaakhibah
achaan al-aasi yaʼarif fasaaltah.
20 Wa be uyuunah, khalli hu zaatah
yichiif taʼabah
wa waajib hu bas yachrab
min kaas khadab al-Gaadir.
21 Achaan ma lammaah
be taʼab aayiltah baʼad mootah
wakit ayyaam hayaatah muhaddadiin.
22 Hal le l-Rabb,
yigarruuh al-ilim walla ?
Yigarruuh leyah hu al-yihaakim
al-gaaʼidiin fi l-sama ? La !
23 Al-waahid yumuut be gudurtah
fi raaha bala hamm.
24 Nawaaytah malaaniin be chaham
wa sihhitah kaamile.
25 Wa l-aakhar yumuut taʼbaan
wa ma daakh abadan al-halu.
26 Wa laakin humman al-itneen yumuutu
wa yarugdu fi l-turaab
ayyi waahid jismah yiʼaffin
wa l-duud yikhattiih.
27 Aywa ! Ana naʼarif khittitku intu
wa niiyitku wa muʼaamaratku diddi !
28 Tuguulu : «Ween beet al-masʼuul
wa ween al-kheema al-yaskunu foogha al-aasiyiin ?
Ma fiihum khalaas !»
29 Wa intu ma saʼaltu al-musaafiriin walla ?
Wa ma saddagtu be chahaadithum walla ?
30 Fi yoom al-masiibe, al-fasil yanja
wa fi yoom al-khadab, hu mahfuud.
31 Yaatu yagdar yathamah giddaamah ?
Wa yaatu yagdar yilkaffa al-cheyy al-hu sawwaah ?
32 Wa leyah hu, yiwadduuh fi l-masaatir
wa yiraakhubuuh fi khaburah.
33 Hatta daraadim turaab al-waadi
khufaaf leyah fi khaburah.
Wa kulla l-naas yamchu waraayah
wa katiiriin bala adad yamchu giddaamah.
34 Wa be da, kikkeef tisabburuuni
be kalaam ma indah faayde ?
Kalaamku kulla ke khachch !
© Arabe tchadien (alphabet latin) Bible © Alliance Biblique du Tchad, 2019.
