Al-Rabb yiʼaddib al-insaan
1 Wa Aliihu gaal battaan :
2 Asburni chiyya,
nidoor nikhabbirak
achaan battaan kula indi kalaam
fi chaan al-Rabb.
3 Irfiti ligiitha min baʼiid
wa niwassif kadar al-khalagaani aadil.
4 Achaan be l-sahiih, kalaami da ma kidib
wa ana al-fikri tamaam nagood maʼaak.
5 Al-Rabb gaadir, ma yahgir al-insaan
wa ma fi cheyy al-hu ma yaʼarfah.
6 Le l-aasi, ma yikhalliih yiʼiich
wa laakin yanti al-masaakiin huguughum.
7 Wa nazrah ma yifaarig al-saalih
wa yukhuttuhum fi kursi al-muluk
wa yabgo aaliyiin daayman.
8 Wa kan humman masaajiin
fi lubb al-janaaziir
wa kan karaboohum fi
guyuud al-mudaayaga,
9 khalaas be misil da,
al-Rabb yikhabbirhum be amalhum
wa isyaanhum wakit humman astakbaro.
10 Hu yufukk adaanhum le yiʼaddibhum
wa yaamurhum yigabbulu min al-fasaala.
11 Wa kan humman simʼo kalaamah
wa abadooh,
khalaas yiʼiichu kulla hayaathum be kheer
wa kulla muddit umurhum fi niʼma.
12 Wa laakin kan ma simʼo kalaamah,
yumuutu be l-silaah
wa yiddammaro min gillit al-fihim.
13 Al-kuffaar guluubhum malaaniin be zaʼal
wa ma yikooruku le l-fazaʼ wakit yijanzirhum.
14 Humman yumuutu fi chabaabhum
ust al-charaamiit fi buyuut asnaamhum.
15 Wa laakin al-Rabb yikhallis al-miskiin be l-taʼab
wa be l-diige, yihazzirah.
16 Ya Ayyuub, inta kula al-Rabb yamurgak min al-diige
le yantiik hurriiye kaamile
wa mawaaʼiinak yinmalu be akil halu.
17 Wa laakin hassaʼ, inta ligiit muhaakama
misil al-aasi
wa l-muhaakama di,
ma tanja minha.
18 Fakkir ! Ma tikhalli al-khuna yiwaddirak
wa ma tikhalli al-rachwa tibaʼʼidak.
19 Wa la khunaak wa la dahabak ma yitimmuuk
wa kulla gudrat jismak ma tisaaʼidak.
20 Ma titmanna al-leel
wakit yamurgu al-naas min bakaanaathum.
21 Angariʼ ma tiwajjih ale l-charr,
ma taʼazilah fi chaan taʼabak.
Al-Rabb aali min kulla cheyy
22 Chiifu ! Al-Rabb aali be gudurtah.
Yaatu muʼallim mislah ?
23 Yaatu yagdar yihaasibah fi amalah ?
Yaatu yagdar yuguul leyah :
«Inta sawweet zulum» ?
24 Azzakkar wa azzim amalah,
amalah al-yikhannu beyah al-naas.
25 Ayyi insaan yichiifah
wa ayyi naadum yanzurah min baʼiid.
26 Al-Rabb aziim wa hu faayit fihimna
wa ma fi naadum yahsib siniin umrah.
27 Wa yilimm bukhaar almi fi l-sahaab
wa yinazzilah battaan matar min jadiid.
28 Al-sahaab yusubb al-matar da
wa almiih yisiil le naas katiiriin.
29 Yaatu yafham
kikkeef al-Rabb yukhutt al-sahaab
wa yirassil al-raʼad min lubb al-sama ?
30 Hu yirassil al-nuur hawaaleeyah
wa yikhatti al-bahar al-khariig.
31 Wa be kulla l-cheyy da,
yahkim fi l-chuʼuub
wa yantiihum maʼaach be katara.
32 Hu yichiil al-barraaga be iideenah
wa yiwassif leeha hadafha.
33 Be l-raʼad, yiwassif jaytah
wa l-bahaayim yihissu kan hu garrab.
© Arabe tchadien (alphabet latin) Bible © Alliance Biblique du Tchad, 2019.
