Al-khuul Luyaataan al-misil tumsaah
1 Hal tagdar takrub Luyaataan be jambaat
wa tarbut lisaanah be habil walla ?
2 Hal tagdar tidiss habil fi munkharah
wa tigidd chidgah be jambaat kabiir walla ?
3 Hal hu yagdar yachhadak
wa yihajji leek kalaam halu walla ?
4 Wa yisawwi maʼaak alaakha walla ?
Inta tagdar tiʼabbidah le muddit hayaatah walla ?
5 Hal tagdar talʼab maʼaayah misil teeraay
wa tarbutah le banaatak yalʼaban beyah walla ?
6 Hal al-muchtarikiin yukhuttuuh le l-beeʼ
wa yigassumuuh ambeenaat al-tujjaar walla ?
7 Hal tagdar titaʼʼin farwitah be huraab
wa raasah be kookaab walla ?
8 Wa laakin kan dawwart takurbah be iidak,
tizzakkar fahaaliiytah
wa battaan ma tilammisah.
9 Giddaamah, ayyi naadum achamah yingatiʼ
wa l-yichiifah, al-khoof yakurbah.
10 Wa ma fi naadum yagdar yujukhkhah.
Wa kan misil da,
yaatu yagdar yagiif giddaami ana al-Rabb ?
11 Yaatu dayyanaani cheyy
le nigabbilah leyah ?
Achaan kulla cheyy al-gaaʼid tihit al-sama hanaayi ana !
12 Ana ma naskut fi chaan Luyaataan
wa nikallim be iideenah wa rijileenah
wa gudurtah al-aziime wa chaklah al-jamiil.
13 Yaatu yagdar yaslakh farwitah ?
Wa yaatu yadkhul ambeenaat sawaalfah ?
14 Wa yaatu yagdar yaftah khachmah ?
Achaan sunuunah zaatah bikhawwufu.
15 Wa daharah mukhatta
be riigaan hana darag
al-mulassagiin be nizaam.
16 Al-waahid mulassag maʼa l-aakhar
lahaddi riih kula ma tufuut ambeenaathum.
17 Humman marbuutiin al-waahid maʼa l-aakhar
wa lammiin ambeenaathum ma yinfargu.
18 Wakit yiʼattich,
yamrug minnah nuur
wa uyuunah yiraaru
misil nuur al-sabaah.
19 Wa deyy yamrug min khachmah
wa charaar al-naar yamrug minnah.
20 Wa dukhkhaan yamrug min munkharah
misil bookh al-burma al-hajjo naarha.
21 Wa nafasah yigabbid naar
wa ambalbaala tamrug min khachmah.
22 Wa l-gudra gaaʼide fi ragabatah
wa l-khoof yajri giddaamah.
23 Jildah mutabbag wa mulassag ambeenaatah
wa gaaʼid foogah gawi ma yilharrak.
24 Galbah gawi misil al-hajar
wa gawi misil al-murhaaka.
25 Giddaam azamatah,
al-kubaaraat yakrubhum al-khoof
wa min chiddit al-barjaal,
yiʼarrudu.
26 Wa l-yigarrib leyah,
seefah ma yanfaʼah
wa haribtah wa tabiigah
wa dirʼah kula ma yanfaʼooh.
27 Aywa ! Luyaataan yajʼal al-hadiid misil al-ageeg
wa l-nahaas misil uud al-musawwis.
28 Al-nuchchaab ma yaturdah
wa hujaar al-miglaaʼ leyah misil ageeg.
29 Hu yajʼal al-asa misil ageegaay
wa yichchammat le suffaarit al-harba wakit tufuut.
30 Farwit batnah misil musmaar tariin
wa derbah fi l-tiine misil derib al-harraata.
31 Wa yiharrik al-almi misil gaaʼid yufuur
wa l-almi yilkhayyar wa yabga rikhwe.
32 Wa yikhalli waraayah derib waadih
wa almi al-khariig yabga abyad misil suuf al-chaayib.
33 Khalaas fi l-ard, ma fi mislah
wa hu makhluug bala khoof.
34 Wa yahgir
kulla l-makhluugiin al-mutakabbiriin
wa hu malik
foog kulla l-haywaanaat al-fasliin.
© Arabe tchadien (alphabet latin) Bible © Alliance Biblique du Tchad, 2019.
