Allah rassal al-khoof le Ayyuub
1 Wa Ayyuub chaal al-kalaam wa gaal :
2 Kan yagdaro yawzunu hizni
wa yukhuttu kulla damaari fi l-miizaan,
3 da tagiil min ramla hana khachum al-bahar,
wa fi chaan da, kalaami bigi ma indah faayde.
4 Achaan nachaachiib al-Gaadir taʼanooni
wa nafsi riwat samm.
Wa l-khoof al-rassalah al-Rabb
misil deech wagaf diddi.
Yaatu yakhbal talab Ayyuub ?
5 Hal humaar al-kadaade yikawwik
kan giddaamah fi gechch walla ?
Wa l-toor yikirr
kan giddaamah fi alfa walla ?
6 Al-maasikh bala mileh yistaakal walla ?
Bayaad al-beed taaʼim walla ?
7 La ! Galbi abaah
wa gabbalah
achaan al-cheyy da
yitammimni fi galbi.
8 Yaatu yakhbal talabi ?
Khalli al-Rabb yihaggig munaayi !
9 Khalli al-Rabb yarhakni
wa yarfaʼ iidah minni
wa yidammirni !
10 Wa fi taʼabi al-ma indah hadd,
ana nunutt wa nafrah
wa nalga al-sabur
achaan ana ma khaalaft
kalaam al-Khudduus !
11 Ween al-gudra al-nasbur beeha ziyaada ?
Wa ween nihaayti fi tuul umri ?
12 Hal ana gawi misil hajar walla ?
Wa jildi gawi misil nahaas walla ?
13 Ana ma indi cheyy al-yisaaʼidni
wa l-fazaʼ baʼʼad minni.
Al-rafag al-ma yanfaʼ
14 Al-taʼbaan, waajib rafiigah yarhamah
hatta kan al-taʼbaan da ma yakhaaf min al-Gaadir kula.
15 Rufgaani khaanooni
misil wudyaan al-almiihum kammal
wa misil majaari al-almiihum faat.
16 Fi aakhir al-chite,
al-barad wa l-talaj yumuuʼu
wa l-wudyaan yinmalu.
17 Fi bidaayit al-seef, almiihum yikammil,
wa fi l-hamu, humman yaybaso.
18 Al-ruhhal yigabbulu minhum
wa yamchu ale l-kadaade
wa yiwadduru.
19 Al-ruhhal min hillit Tiima
yifattuchu al-wudyaan
wa l-ruhhal min balad Saba
yukhuttu achamhum fooghum.
20 Humman alhayyaro
achaan atwakkalo ale almiihum.
Wa wakit wassalo,
achamhum angataʼ.
21 Ya rufgaani, daahu bigiitu
misil al-wudyaan dool !
Intu chiftu damaari wa khuftu !
Ayyuub achamah angataʼ
22 Ana ma gult leeku :
«Antuuni cheyy !»
Wa ana ma gult leeku :
«Gaddumu leyi hadaaya min maalku
23 achaan tinajjuuni min iid al-khasiim
wa tafdooni min iid al-mujrim.»
24 Wassuuni wa ana naskut
wa fahhumuuni min ween ana waddart.
25 Kalaam al-sahiih boojaʼ
wa laakin luwaamitku ma tanfaʼni.
26 Hal achchaawartu le tuluumuuni walla ?
Wa ana al-ma indi acham,
tajʼalo kalaami misil riih walla ?
27 Intu ! Tisawwu amʼiyeedaat le l-atiim !
Lahaddi rafiigku kula,
tukhuttuuh le l-beeʼ !
28 Wa hassaʼ, fakkuru foogi
wa wajjuhu aleyi !
Chiifu ! Hal giddaamku
ana nakdib walla ?
29 Min fadulku, gabbulu taʼaalu !
Ma tazulmuuni !
Gabbulu taʼaalu !
Ana daayman saalih !
30 Hal lisaani yantug be zulum walla ?
Hal ana ma nafham al-damaar walla ?
© Arabe tchadien (alphabet latin) Bible © Alliance Biblique du Tchad, 2019.
