Ard gabiilat Afraayim wa Manassa
1 Wa gisim al-ard hana zurriiyit Yuusuf yamchi min bahar al-Urdun gariib le Ariiha lahaddi sabaah le Een Ariiha wa yatlaʼ ale l-sahara min Ariiha lahaddi jibaal Beet Iil. 2 Wa min Beet Iil, al-huduud yamchu ale Luuz wa yufuutu be huduud al-Arkiyiin fi Ataruut. 3 Wa yamchu ale huduud al-Yaflitiyiin fi l-kharib wa lahaddi huduud Beet Huruun al-tihit wa lahaddi Gaazar wa lahaddi khachum al-bahar al-Abyad. 4 Wa zurriiyit Yuusuf al-humman gabaayil Manassa wa Afraayim kula ligo warasathum.
5 Wa daahu huduud al-ard hana gabiilat Afraayim hasab khuchuum buyuuthum. Min Ataruut Addaar fi l-sabaah, huduud warasathum yiʼaddu be Beet Huruun al-foog 6 wa yamchu lahaddi l-bahar al-Abyad. Wa fi l-munchaakh, al-huduud yamchu ale Mikmata wa yigabbulu sabaah ale Taanat Chiilooh wa yamchu sabaah ale Yanuuh. 7 Wa l-huduud dool yamchu min Yanuuh lahaddi Ataruut wa Naʼara wa yalhago Ariiha wa minha lahaddi bahar al-Urdun. 8 Wa min Tafuuh, al-huduud yamchu kharib lahaddi waadi Khaana wa yagiifu fi l-bahar al-Abyad. Wa da l-ard al-ligo warasa gabiilat Afraayim hasab khuchuum buyuuthum.
9 Wa fi mudun aakhariin al-antoohum warasa le gabiilat Afraayim fi usut ard gabiilat Manassa wa l-hillaal al-taabʼiin le l-mudun dool. 10 Wa laakin ma chaalo ard al-Kanʼaaniyiin al-gaaʼidiin fi Gaazar. Wa l-Kanʼaaniyiin dool gaaʼidiin yaskunu fi usut gabiilat Afraayim lahaddi l-yoom wa bigo abiid yakhdumu leehum.
© Arabe tchadien (alphabet latin) Bible © Alliance Biblique du Tchad, 2019.
