Al-mudun hana l-luju
1 Wa Allah hajja le Yachuuʼ wa gaal : 2 «Guul le Bani Israaʼiil : ‹Khassusu leeku mudun hana luju hasab al-kalaam al-ana gultah leeku be waasitat Muusa. 3 Wa naadum al-katal dimme bala raayah yagdar yajri le waahide minhum. Wa l-mudun dool yagdaro yahfado al-kaatil min siid al-taar. 4 Wa l-kaatil yajri le waahide min al-mudun dool wa wakit yiwassil fi khachum baab al-madiina, hu yigaabil kubaaraat al-madiina wa yihajji leehum muchkiltah. Baʼad da, humman yantu izin yadkhul fi madiinithum wa yantuuh bakaan yagood fi usuthum. 5 Wa kan siid al-taar macha waraayah kula, humman ma yisallumuuh leyah achaan hu katal dimme bala raayah wa ma indah leyah ayyi karaahiiye min awwal. 6 Wa yagood fi l-madiina di lahaddi yagiif giddaam al-mujtamaʼ le yihaakumuuh wa lahaddi moot kabiir rujaal al-diin hana l-zaman da. Wa baʼad da, al-kaatil yagdar yigabbil fi madiintah wa fi beetah yaʼni fi l-madiina al-hu jara minha.›»
7 Wa khalaas, Bani Israaʼiil khassaso Khadach al-Jaliil al-fi jibaal Naftaali wa Chakiim al-fi jibaal Afraayim wa Kharyat Arbaʼa yaʼni Hibruun al-fi jibaal Yahuuza. 8 Wa khaadi le bahar al-Urdun wa sabaah le Ariiha, humman khassaso Baasar al-fi l-sahara fi sahalat gabiilat Raʼuubiin wa Raamuut al-fi turaab Gilʼaad hana gabiilat Gaad wa Joolaan fi turaab Baachaan hana gabiilat Manassa. 9 Wa dool bas al-mudun hana l-luju al-khassasoohum Bani Israaʼiil le nufuushum wa le l-ajnabi al-saakin maʼaahum. Wa ayyi naadum al-katal dimme bala raayah yagdar yajri leehum achaan siid al-taar ma yaktulah gabul ma yagiif giddaam al-mujtamaʼ le yihaakumuuh.
© Arabe tchadien (alphabet latin) Bible © Alliance Biblique du Tchad, 2019.
