Al-sala al-rabbaaniiye
1 Wa Isa gaaʼid yisalli fi bakaan waahid. Wa wakit hu kammal salaatah, waahid min talaamiizah hajja leyah wa gaal : «Sayyidna, allimna nisallu misil Yahya allam talaamiizah yisallu.» 2 Wa Isa gaal leehum : «Wakit tisallu, guulu :
‹Ya Abuuna, khalli yaʼarfu kadar usmak khudduus.
Khalli mamlakatak taji.
3 Antiina al-akil
al-yitimmina kulla yoom.
4 Saamih leena zunuubna
misil aniina gaaʼidiin nisaamuhu
kulla l-naas al-khito foogna.
Ma tidissina fi l-tajriba.›»
Masal al-deef al-ja fi l-leel
5 Wa Isa hajja leehum be masal wa gaal : «Nasʼalku cheyy waahid. Kan naadum minku indah rafiig wa hu yamchi leyah fi ust al-leel, yinaadiih wa yuguul : ‹Ya akhuuyi, antiini talaata khubza. 6 Nidoorhum achaan rafiig waahid musaafir jaani wa ma indi cheyy nidayyifah beyah.› 7 Hal akhuuk al-saʼaltah da yurudd leek min daakhal wa yuguul : ‹Khalliini nunuum ! Al-baab masduud wa iyaali maʼaayi naaymiin. Ma nagdar nugumm leek wa la nantiik cheyy.› Da yabga walla ? 8 Wa nuguul leeku kan akhuuk da ma yidoor yugumm yantiik cheyy fi chaan inta rafiigah kula, akiid hu yugumm yantiik kulla cheyy al-tidoorah fi chaan inta bachtantah.
9 «Wa nuguul leeku asʼalo Allah wa hu yantiiku. Fattuchu wa talgo. Duggu baab Allah wa yinfatih leeku. 10 Achaan kulla naadum al-yasʼal da, Allah yantiih. Wa ayyi naadum al-yifattich, yalga. Wa ayyi naadum al-yudugg baab Allah, al-baab yinfatih leyah.
11 «Wa kan naadum minku abu iyaal wa wileedah yatlub minnah huutaay, yantiih daabi fi badal al-huutaay walla ? 12 Walla kan yatlub minnah beed jidaad, yantiih agrab walla ? Abadan. 13 Intu al-muznibiin kula taʼarfu kikkeef tantu chokhol sameh le iyaalku. Wa laakin abuuku Allah akheer ziyaada minku. Wa hu yanti al-Ruuh al-Khudduus le l-naas al-yasʼalooh.»
Gaalo gudrat al-Masiih min Ibliis
14 Wa yoom waahid, Isa yidoor yatrud cheetaan min naadum waahid al-bigi abkam be sabab al-cheetaan da. Wa l-cheetaan marag wa l-abkam hajja. Wa kulla l-naas alʼajjabo bilheen. 15 Laakin naas waahidiin gaalo : «Al-naadum da yatrud al-chawaatiin be gudrat Ibliis kabiir al-chawaatiin.» 16 Wa naas aakhariin dawwaro yijarrubuuh wa talabo minnah yantiihum daliil al-yiwassif kadar gudurtah di jaaye min al-sama.
17 Wa hu irif fikirhum wa gaal leehum : «Ayyi mamlaka kan naasha yiddaawaso ambeenaathum takhrab. Wa buyuutha yidaffugu al-waahid fi l-aakhar. 18 Wa tuguulu ana natrud al-chawaatiin be gudrat Ibliis. Wa laakin kan Ibliis yidaawis nafsah, kikkeef mamlakatah tagdar tagood saabte ? 19 Wa kan sahiih ana gaaʼid natrud al-chawaatiin be gudrat Ibliis, naasku yaturduuhum be gudrat yaatu ? Wa misil da, naasku bas al-yisabbutu foogku al-tuhma. 20 Wa kan ana taradt al-chawaatiin be gudrat Allah zaatah, khalaas mamlakat Allah gaabalatku. 21 Kan raajil gawi gaaʼid yahris gasrah be silaahah kulla ke, misil da kulla khumaamah gaaʼid be l-salaam. 22 Laakin kan naadum gawi minnah yaji yahjimah, hu yakhlibah wa yichiil minnah silaahah al-awwal kulla achamah gaaʼid foogah. Wa khalaas yigassim al-khumaam le jamaaʼtah.
23 «Ayyi naadum al-ma maʼaayi, aduuyi. Wa ayyi naadum al-ma yilimm al-naas maʼaayi, yichattithum.»
Al-cheetaan al-yigabbil
24 Wa Isa gaal battaan : «Wakit cheetaan yamrug min naadum muchootin, al-cheetaan da yamchi misil naadum muwaddir fi l-sahara. Wa yifattich bakaan yinjamma foogah wa ma yalgaah. Wa yuguul : ‹Khalaas, nigabbil fi l-beet al-maragt minnah.› 25 Wa yigabbil le l-naadum da wa yalgaah misil beet nadiif wa mufarrach. 26 Wa l-cheetaan yamchi yijiib maʼaayah sabʼa chawaatiin fasliin minnah ziyaada wa kulluhum yindasso wa yaskunu fi l-naadum da wa khalaas, haalit al-naadum da tabga hawaane min awwal.»
27 Wa wakit hu gaaʼid yihajji le l-naas, mara waahide fi usuthum naadat wa gaalat : «Mabruuk le l-mara al-wildatak wa rabbatak.» 28 Laakin Isa gaal : «Akheer tuguuli mabruuk le l-naas al-yasmaʼo kalaam Allah wa yitaabuʼuuh.»
Talabo min Isa alaama
29 Wa adad al-naas al-yidooru yasmaʼo kalaam Isa gaaʼid yiziid. Wa hu bada yuguul : «Naas al-wakit da fasliin wa yatulbu minni daliil achaan yiʼaamunu beyi. Wa Allah ma yantiihum daliil illa l-daliil hana l-nabi Yuunus. 30 Misil Yuunus bigi alaama le naas madiinat Niinawa, ana Ibn al-Insaan kula nabga alaama le l-naas al-fi wakitna da. 31 Wa fi yoom al-Hisaab, malikat al-wati tugumm sawa maʼa l-naas al-fi wakitna da. Wa hi tisabbit fooghum al-tuhma achaan jaat min aakhir al-ard le tasmaʼ kalaam al-malik Suleymaan al-hakiim. Wa l-yihajji leeku hassaʼ akbar min Suleymaan wa laakin intu ma tubtu. 32 Fi yoom al-Hisaab, naas Niinawa yugummu sawa maʼa l-naas al-fi wakitna da wa yisabbutu fooghum tuhma achaan naas Niinawa taabo min zunuubhum wakit Yuunus ballakh leehum kalaam Allah. Wa l-yihajji leeku hassaʼ akbar min Yuunus wa laakin intu ma tubtu.
Masal nuur al-faanuus
33 «Wa ma fi naadum al-yiʼoogid faanuus wa yilabbidah walla yikhattiih be maaʼuun. Hu yukhuttah fi bakaan foog achaan al-naas al-yadkhulu fi l-beet yichiifu al-deyy.
34 «Wa l-een hi misil faanuus jildak. Kan eenak taybe, kulla jildak gaaʼid fi l-nuur. Wa laakin kan eenak talfaane, jildak yinmali dalaam. 35 Achaan da, khutt baalak. Ma tikhalli al-nuur al-indak yabga adlam. 36 Kan kulla jildak anmala nuur wa ma indah dalaam fi ayyi bakaan, yabga leek misil faanuus yidawwi deyy tamaam.»
Al-Masiih haraj al-ulama
37 Wa wakit Isa kammal al-kalaam da, Fariizi waahid azamah achaan yaakul fi beetah. Wa Isa macha fi beetah wa gaʼad le l-akil. 38 Wa Isa ma khassal iideenah le yabgo taahiriin gubbaal ma yaakul wa l-Fariizi chaafah wa alʼajjab minnah bilheen. 39 Wa l-Rabb Isa gaal leyah : «Intu al-Fariiziyiin wakit tilwaddo, da yabga misil tikhassulu al-kaas wa l-sufra min barra bas. Laakin fi guluubku daakhal intu malaaniin min al-sirge wa l-fasaala. 40 Ya l-juhhaal, intu ma taʼarfu kadar Allah al-khalag al-nuss al-barraani khalag al-nuss al-dakhlaani kula ? 41 Antu al-khumaam al-gaaʼid daakhal fi sufritku wa khalli yabga sadakha le l-masaakiin wa kulla cheyy yabga leeku taahir.
42 «Ya l-Fariiziyiin, al-azaab yarjaaku achaan intu munkaribiin fi l-uchur lahaddi tantu le Allah min al-naʼnaaʼ wa l-kammuun wa ayyi nabaat hana l-haraar al-yugumm fi hoochku. Wa laakin intu nisiitu al-adaala wa mahabbat Allah ! Awwal cheyy, waajib tisawwu al-achya al-muhimmiin dool wa battaan ma tanso kalaam al-uchur.
43 «Ya l-Fariiziyiin, al-azaab yarjaaku achaan tiriidu tagoodu fi l-saff al-awwal fi buyuut al-sala wa intu farhaaniin kan al-naas yisallumuuku be ihtiraam fi l-suug. 44 Al-azaab yarjaaku achaan intu misil al-khubuur al-ma induhum wasim wa l-naas raaykhiin fooghum wa ma yaʼarfu kadar humman khubuur. Al-najaasa al-gaaʼide fiiku daakhal al-naas ma yaʼarfuuha.»
45 Wa waahid min ulama al-Tawraat radda leyah wa gaal : «Ya l-sayyid, be kalaamak da ayyartina aniina kula.»
46 Wa Isa gaal : «Al-azaab yarjaaku intu al-ulama kula ! Be taʼliimku tisawwu al-diin tagiil le l-naas lahaddi bufuut raashum wa abadan ma tidooru tiʼaawunuuhum hatta be cheyy sakhayyar kula. 47 Al-azaab yarjaaku achaan intu gaaʼidiin tabnu khubuur al-anbiya al-juduudku aboohum wa kataloohum. 48 Wa misil da, intu gaaʼidiin tachhado kadar tikhassudu be l-cheyy al-juduudku sawwooh. Aywa, achaan humman bas al-kataloohum wa intu bas al-tabnu khubuurhum. 49 Wa fi chaan da, Allah wassaf hikmatah wakit gaal : ‹Nirassil leehum anbiya wa rusul. Waahidiin minhum yaktuluuhum wa waahidiin minhum yitaʼʼubuuhum.› 50 Wa khalaas kulla l-anbiya al-kataloohum fi ayyi zaman, dimmithum taji fi raas hana l-naas al-fi wakitna da. 51 Aywa, nuguul leeku min dimmit Haabiil wileed Adam lahaddi dimmit Zakariiya al-katalooh been beet Allah wa l-madbah, dimmithum kulluhum taji fi raas al-naas al-fi wakitna da.
52 «Ya intu al-ulama, al-azaab yarjaaku achaan chiltu muftaah al-ilim. Intu zaatku ma andasseetu wa battaan al-naas al-yidooru yindasso, intu dahartuuhum minnah.»
53 Wakit Isa gamma macha min hinaak, al-ulama wa l-Fariiziyiin bado yikhaalufuuh be chidde wa yasʼalooh suʼaal katiir 54 achaan yalgo fursa le yakurbuuh be kalaamah al-yuguulah.
© Arabe tchadien (alphabet latin) Bible © Alliance Biblique du Tchad, 2019.
