1 Daahu kitaab ruʼyat Naahuum al-min hillit Alikhuuch. Wa di muhaakamat madiinat Niinawa.
Allah yiwassif gudurtah wa khadabah
2 Allah hu khayyuur.
Aywa, ma yidoor yaʼabudu ilaah aakhar balaayah
wa yichiil al-taar.
Aywa, Allah hu al-yichiil al-taar
wa siid al-khadab al-chadiid.
Hu yichiil al-taar fi khusmaanah
wa yakhdab le udwaanah.
3 Allah hu al-Sabuur
wa l-Aziim wa l-Gaadir.
Wa laakin le l-muznib,
ma yajʼalah bari.
Wa yisawwi derbah fi riih amzoobaʼaane
wa l-sahaab da ajaajah al-hu yigawwimah.
4 Hu yugumm didd al-bahar wa yijaffifah
wa almi al-wudyaan kula yikammilah.
Wa maraaʼi Baachaan wa jabal al-Karmal yaybaso
wa l-zuhuur fi jibaal Lubnaan yidaffugu.
5 Al-jibaal yarjufu giddaamah
wa l-hujaar yumuuʼu.
Wa giddaamah, al-ard tizzalzal
wa kulla sukkaanha yifatfutu.
6 Wa yaatu yagdar yahmal zaʼalah ?
Wa min chiddit khadabah,
yaatu yagdar yagiif giddaamah ?
Khadabah yinsabba misil al-naar
hatta al-jibaal yichchaggago giddaamah.
7 Allah hu al-Rahiim
wa hu al-maljaʼ fi yoom al-diige
wa yahfad al-naas al-yaljaʼo leyah.
8 Misil seel,
yijiib damaar kaamil fi bakaan udwaanah
wa yitaaridhum lahaddi fi dalaam al-khubuur.
Allah yijiib al-damaar fi Niinawa
9 Ya sukkaan Niinawa,
maala chiltu niiye fasle didd Allah ?
Hu yijiib foogku damaar kaamil
al-battaan ma yitanni be diige aakhara.
10 Intu misil al-chook al-chaabik
wa misil al-sakkaara al-sikro.
Al-naar taakulhum be l-kaamil
misil al-gechch al-yaabis.
11 Wa minku intu bas marag naadum
al-khattat al-fasaala didd Allah
wa mustachaar al-ma naafiʼ.
12 Wa daahu Allah gaal :
«Ya chaʼab balad Yahuuza,
kan udwaanku lammo wa kitro kula,
yangusu wa yikammulu.
Wa kan awwal ana daayagtuku kula
battaan ma nidaayigku.
13 Wa hassaʼ namrugku min iid udwaanku al-gawiiye
wa nigattiʼ guyuudku.»
14 Wa daahu kalaam Allah didduku, ya sukkaan Niinawa :
«Abadan ma talgo zurriiye
tichiil usumku.
Wa fi buyuutku hana l-ibaada,
ana nikassir asnaamku
hana l-hatab wa l-hadiid.
Wa nijahhiz khubuurku
achaan giddaami ana,
intu battaan ma tanfaʼo.»
15 Ya chaʼab Yahuuza, daahu fi l-jibaal
naadum maachi be rijileenah
wa yibachchir wa yiballikh al-salaam.
Ayyudu wa haggugu nazirku
achaan aduuku al-ma naafiʼ
ma yuchugg baladku battaan.
Wa khalaas, kalaamah kammal !
© Arabe tchadien (alphabet latin) Bible © Alliance Biblique du Tchad, 2019.
