Adad 20 - Arabe tchadien (alphabet latin) (ShuLatn)

Al-almi al-marag min al-hajar

1 Wa fi l-chahar al-awwal, kulla mujtamaʼ Bani Israaʼiil wassalo fi saharat Siin wa gaʼado fi hillit Khaadich wa da bakaan Mariyam maatat foogah wa dafanooha. 2 Wa fi l-bakaan da, almi ma fiih wa Bani Israaʼiil lammo wa gammo didd Muusa wa Haaruun. 3 Wa humman harajo Muusa wa gaalo : «Akheer leena kan mutna maʼa akhwaanna al-maato min khadab Allah. 4 Maala jibtu jamaaʼat Allah fi l-sahara di ? Achaan numuutu aniina wa bahaayimna walla ? 5 Maala maragtuuna min Masir wa jibtuuna fi l-bakaan al-fasil da ? Wa l-bakaan da ma indah maʼaach wa la indah tiin wa la indah inab wa la indah rummaan. Wa almi hana charaab kula ma fiih.»

6 Wa Muusa wa Haaruun khallo al-chaʼab wa macho fi madkhal kheemat al-ijtimaaʼ wa wagaʼo be wujuuhhum fi l-turaab. Wa khalaas majd Allah baan leehum. 7 Wa Allah hajja le Muusa wa gaal : 8 «Chiil asaatak. Inta wa akhuuk Haaruun limmu mujtamaʼ Bani Israaʼiil wa giddaamhum kulluhum guulu le l-hajar : ‹Amrug almi !› Wa khalaas al-hajar yamrug almi wa be l-almi al-yamrug min al-hajar da, azgi kulla Bani Israaʼiil wa bahaayimhum.»

9 Wa misil Allah amarah beyah, Muusa chaal al-asa min giddaam Allah min kheemat al-ibaada. 10 Wa Muusa wa Haaruun lammo kulla Bani Israaʼiil giddaam al-hajar. Wa Muusa gaal leehum : «Asmaʼo, ya aasiyiin ! Aniina namurgu leeku almi min al-hajar da walla ?» 11 Wa Muusa rafaʼ iidah wa darab al-hajar marrateen be asaatah. Wa khalaas almi jara be katara min al-hajar. Wa mujtamaʼ Bani Israaʼiil chirbo wa zago kulla bahaayimhum.

12 Wa Allah gaal le Muusa wa Haaruun : «Intu ma aamantu beyi wa giddaam Bani Israaʼiil ma ahtaramtuuni ana al-Khudduus. Wa fi chaan da, intu abadan ma tiwaddu al-chaʼab da fi l-ard al-ana anteetha leehum.»

13 Wa l-bakaan da sammooh almi Mariiba (maʼanaatah almi al-huraaj) achaan Bani Israaʼiil gammo didd Allah. Wa fi l-bakaan da, Allah wassaf leehum khadaastah.

Malik Adoom dahar Bani Israaʼiil

14 Wa min Khaadich, Muusa rassal naas le malik Adoom. Wa l-naas dool gaalo le l-malik : «Akhwaanak Bani Israaʼiil yuguulu leek ke : ‹Inta taʼarif kulla l-machaakil al-bigo foogna. 15 Wa juduudna macho fi balad Masir wa aniina sakanna foogha mudda tawiile. Wa hinaak al-Masriyiin sawwo al-fasaala foog juduudna wa foogna aniina kula. 16 Wa aniina sarakhna wa chahadna Allah wa hu simiʼna wa rassal leena malak le yamrugna min Masir. Wa daahu aniina fi Khaadich al-hille al-gariib le huduud baladak. 17 Wa hassaʼ nidooru nuchuggu ardak wa ma nitallufu al-ziraaʼa wa la chadar al-inab wa ma nacharbo almi biyaarak. Aniina nichiilu al-derib al-usmah Derib al-Malik wa la nimayyulu minnah isra wa la zeene lahaddi nagtaʼo ardak.›»

18 Wa laakin malik Adoom gaal : «Ma tuchuggu ardi. Wa kan abeetu, namrug leeku wa nihaaribku.» 19 Wa Bani Israaʼiil gaalo leyah : «Aniina nichiilu al-derib wa kan nidooru almi leena walla le bahaayimna kula, nachruuh minnak chari. Wa laakin nidooru minnak tikhalliina nuchuggu ardak bas.» 20 Wa laakin malik Adoom gaal leehum : «Ma tuchuggu ardi !»

Wa hu marag laagaahum be deech kabiir wa gawi. 21 Wa be misil da, malik Adoom aba ma yikhalliihum le Bani Israaʼiil yuchuggu ardah. Wa humman gabbalo wa macho be derib aakhar.

Moot Haaruun

22 Wa kulla l-mujtamaʼ saaro min Khaadich wa nazalo fi jabal Hoor 23 al-gaaʼid fi huduud balad Adoom. Wa hinaak Allah hajja le Muusa wa Haaruun wa gaal : 24 «Haaruun yumuut wa yalhag abbahaatah. Wa hu ma yadkhul fi l-balad al-ana anteetha le Bani Israaʼiil achaan intu isiitu kalaami fi almi Mariiba. 25 Wa inta, ya Muusa, chiil Haaruun wa wileedah Aliʼaazar wa atlaʼ beehum fi jabal Hoor. 26 Wa sill khulgaan raajil al-diin min Haaruun wa labbishum le wileedah Aliʼaazar wa khalaas Haaruun yumuut fi l-bakaan daak.»

27 Wa Muusa sawwa kulla cheyy misil Allah amarah beyah. Giddaam kulla mujtamaʼ Bani Israaʼiil, humman talaʼo fi jabal Hoor. 28 Wa Muusa salla khulgaan Haaruun minnah wa labbasaahum le wileedah Aliʼaazar. Wa khalaas Haaruun maat fi raas jabal Hoor. Wa baʼad da, Muusa wa Aliʼaazar nazalo min al-jabal. 29 Wa wakit kulla mujtamaʼ Bani Israaʼiil irfo kadar Haaruun maat khalaas, humman bako wa hizno leyah le muddit 30 yoom.