Hagg al-banaat fi l-warasa
1 Wa Saluufhad wileed Hiifar wileed Gilʼaad wileed Makiir wileed Manassa indah banaat. Wa l-banaat deel asaameehin Mahla wa Nuuʼa wa Hugla wa Milka wa Tirsa. Wa hinna min gabiilat Manassa wileed Yuusuf. Wa yoom waahid, jin 2 wa wagafan giddaam Muusa wa raajil al-diin Aliʼaazar wa l-chuyuukh wa kulla mujtamaʼ Bani Israaʼiil fi madkhal kheemat al-ijtimaaʼ. Wa gaalan : 3 «Abuuna maat fi l-sahara wa hu ma maʼa Bani Israaʼiil wa Khuurah al-gammo didd Allah. Wa laakin hu maat be sabab zanbah halaalah. Wa ma indah wileed. 4 Hal usum abuuna yingachcha min khachum beetah be sabab hu ma indah wileed walla ? Antiina aniina kula warasatna min al-ard misil tanti akhwaan abuuna.»
5 Wa daliimat al-banaat di, Muusa gaddamaaha le Allah. 6 Wa Allah gaal le Muusa : 7 «Banaat Saluufhad indihin hagg. Antiihin warasathin min al-ard misil tanti akhwaan abuuhin. Antiihin kulla l-warasa hana abuuhin. 8 Wa guul le Bani Israaʼiil : ‹Kan naadum maat wa ma khalla wileed, warasatah antuuha le bineeytah. 9 Wa kan ma indah bineeye, warasatah antuuha le akhwaanah. 10 Wa kan ma indah akhwaan, warasatah antuuha le akhwaan abuuh. 11 Wa kan abuuh ma indah akhwaan, warasatah antuuha le l-gariib leyah min khachum beetah. Wa hu da bas yichiil al-warasa di. Wa da yabga gaanuun hagg le Bani Israaʼiil misil ana Allah amartak beyah, ya Muusa.›»
Muusa anta masʼuuliiye le Yachuuʼ
12 Wa Allah gaal le Muusa : «Atlaʼ fi raas jabal Abaariim wa chiif al-balad al-ana nantiiha le Bani Israaʼiil. 13 Inta tichiifha wa baʼad da, tumuut inta kula misil akhuuk Haaruun wa talhag abbahaatak. 14 Wa da achaan fi saharat Siin wakit mujtamaʼ Bani Israaʼiil gammo diddi, intu kula isiitu awaamiri. Achaan ana gult leeku : ‹Wassufu leehum kadar ana bas Allah al-Khudduus wa amurgu leehum almi al-humman dawwarooh. Wa da almi Mariiba al-fi Khaadich fi saharat Siin.›»
15 Wa Muusa gaal le Allah : 16 «Inta Allah al-Rabb al-tamluk fi kulla makhluug hayy. Kallif naadum fi raas Bani Israaʼiil dool. 17 Wa l-naadum da yuguudhum, yamrug wa yaji beehum wa yimarrighum wa yidakhkhilhum. Wa be da, chaʼab Allah ma yabgo misil al-khanam al-ma induhum raaʼi.»
18 Wa Allah radda le Muusa wa gaal : «Chiil Yachuuʼ wileed Nuun al-ruuhi gaaʼide foogah wa khutt iidak foogah. 19 Wa waggifah giddaam raajil al-diin Aliʼaazar wa giddaam kulla mujtamaʼ Bani Israaʼiil wa darrijah wa antiih masʼuuliiytah fi giddaamhum. 20 Wa antiih masʼuuliiye min masʼuuliiytak achaan mujtamaʼ Bani Israaʼiil yitiiʼu amrah. 21 Wa kan indah suʼaal yaji giddaam raajil al-diin Aliʼaazar wa Aliʼaazar yasʼal leyah Allah be l-Uriim wa l-Tummiim al-beehum yasʼalo Allah. Wa be da, hu wa kulla mujtamaʼ Bani Israaʼiil yamurgu wa yaju be izin raajil al-diin Aliʼaazar.»
22 Wa Muusa sawwa misil Allah amarah beyah wa chaal Yachuuʼ wa waggafah giddaam raajil al-diin Aliʼaazar wa giddaam kulla mujtamaʼ Bani Israaʼiil. 23 Wa Muusa khatta iidah foogah wa darrajah wa antaah masʼuuliiytah misil Allah gaalah leyah.
© Arabe tchadien (alphabet latin) Bible © Alliance Biblique du Tchad, 2019.
