Al-faanuus wa niiraanah
1 Wa Allah hajja le Muusa wa gaal : 2 «Guul le Haaruun wakit yirakkib al-sabʼa tiyeesaat le l-naar, khalli yiwajjih al-niiraan le yidawwu al-bakaan al-gaaʼid giddaam al-faanuus.»
3 Wa Haaruun sawwa misil Allah amar beyah Muusa. Rakkab kulla tiyeesaat al-naar wa wajjah niiraanhum achaan gaaʼidiin yidawwu al-bakaan al-gaaʼid giddaam al-faanuus. 4 Wa l-faanuus da madguug be dahab min gaʼarah lahaddi raasah al-gaaʼidiin foogah al-zuhuur hana l-dahab. Wa daggooh hasab wasif al-wassafah Allah le Muusa.
Tihaarat al-Laawiyiin
5 Wa battaan Allah hajja le Muusa wa gaal : 6 «Chiil al-Laawiyiin min Bani Israaʼiil wa sawwiihum taahiriin. 7 Wa daahu al-cheyy al-tisawwiih le yabgo taahiriin. Ruchchuhum be almi al-tathiir wa khalli yizayyunu kulla jilidhum wa yikhassulu khulgaanhum wa be da, khalaas yabgo taahiriin. 8 Wa yichiilu toor wa maʼaayah hadiiye hana dagiig mukhalbat be dihin wa inta tichiil toor aakhar dahiiye le kaffaarat al-zanib. 9 Wa jiib al-Laawiyiin giddaam kheemat al-ijtimaaʼ wa limm kulla mujtamaʼ Bani Israaʼiil. 10 Wa gaddim al-Laawiyiin giddaam Allah. Wa khalli Bani Israaʼiil yukhuttu iideehum foog al-Laawiyiin. 11 Wa Haaruun yigaddim al-Laawiyiin misil hadiiye marfuuʼa al-yigaddumuuha Bani Israaʼiil le Allah. Wa be da, al-Laawiyiin yagdaro yakhdumu le Allah. 12 Wa l-Laawiyiin yukhuttu iideehum fi ruuse al-tiiraan dool wa inta gaddimhum le Allah. Al-toor al-waahid dahiiye le kaffaarat al-zanib wa l-waahid dahiiye muharraga wa da yabga kaffaara le zunuub al-Laawiyiin. 13 Wa jiib al-Laawiyiin giddaam Haaruun wa awlaadah wa gaddimhum misil hadiiye marfuuʼa le Allah. 14 Wa be da, aʼazil al-Laawiyiin min Bani Israaʼiil wa humman yabgo hineeyi ana Allah.
15 «Wa baʼad titahhir al-Laawiyiin wa tigaddimhum leyi misil hadiiye marfuuʼa, khalli yamchu yakhdumu fi kheemat al-ijtimaaʼ. 16 Achaan min kulla Bani Israaʼiil, humman bas hineeyi halaali. Wa ana chiltuhum fi badal kulla awlaad al-bikir min Bani Israaʼiil le yabgo hineeyi ana Allah. 17 Achaan kulla awlaad al-bikir hineeyi. Min yoom ana katalt kulla awlaad al-bikir fi balad Masir, kulla awlaad al-bikir fi Israaʼiil kan min al-naas walla min al-bahaayim kula, ana khassastuhum le yabgo hineeyi ana. 18 Wa laakin hassaʼ ana chilt al-Laawiyiin fi badal kulla awlaad al-bikir min Bani Israaʼiil. 19 Wa ana chilt al-Laawiyiin wa anteethum le Haaruun wa awlaadah achaan yakhdumu le Bani Israaʼiil fi kheemat al-ijtimaaʼ wa yisawwu leehum al-kaffaara. Wa be da, al-waba ma yanzil fi Bani Israaʼiil wakit yaju gariib le l-bakaan al-mukhaddas.»
20 Wa Muusa wa Haaruun wa kulla mujtamaʼ Bani Israaʼiil sawwo kulla cheyy al-bukhuss al-Laawiyiin misil Allah amar beyah Muusa. 21 Wa l-Laawiyiin tahharo nufuushum wa khassalo khulgaanhum wa Haaruun gaddamaahum misil hadiiye marfuuʼa le Allah. Wa sawwa leehum al-kaffaara achaan yabgo taahiriin. 22 Wa baʼad da, al-Laawiyiin gidro khadamo fi kheemat al-ijtimaaʼ tihit muraakhabat Haaruun wa awlaadah. Wa sawwo kulla cheyy al-bukhuss al-Laawiyiin misil Allah amar beyah Muusa.
23 Wa battaan Allah hajja le Muusa wa gaal : 24 «Daahu khidmit al-Laawiyiin. Ayyi waahid al-umrah min 25 sana wa foog, waajib yugumm wa yakhdim fi kheemat al-ijtimaaʼ. 25 Wa kan umrah lihig 50 sana, khalaas khalli yagiif battaan ma yakhdim. 26 Hu yisaaʼid akhwaanah al-gaaʼidiin yahfado wa yakhdumu fi kheemat al-ijtimaaʼ laakin ma yantuuh khidme khaassa leyah. Wa da l-cheyy al-waajib tisawwiih fi l-khidme al-tukhuss al-Laawiyiin.»
© Arabe tchadien (alphabet latin) Bible © Alliance Biblique du Tchad, 2019.
